ހދ.ކުޅުދުއްފުށީގައި ކުރިއަށް ގެންދިޔަ 31 ވަނަ ޕަބްލިކް އޯޑަރ ޓްރޭނިންގ ކޯހުގެ ދަސްވެނިވުން ބާއްވައިފި އެވެ.
ދަސްވެނިވުން ފާހަގަ ކުރުމުގެ ގޮތުން ކުޅުދުއްފުށީ ޕޮލިސް ސްޓޭޝަން ގައި ބޭއްވި ރަސްމިއްޔަތު ޝަރަފުވެރި ކޮށްދެއްވީ ހދ.ކުޅުދުއްފުށި ޕޯރޓް ލިމިޓެޑްގެ ޖެނެރަލް މެނޭޖަރ އިބްރާހިމް ފަރުހޫދު އެވެ.
އެގޮތުން މިރަސްމިއްޔާތުގައި ވާހަކަފުޅު ދައްކަވަމުން އިބްރާހިމް ފަރުހޫދު ވަނީ ދިވެހި ގައުމަށް އަންނަ ކޮންމެ ލޮޅުމަކާއި ޤައުމުގައި ހަމަނުޖެހުން އުފެއްދުމަށް ބަޔަކު މަސައްކަތް ކުރާނަމަ އެކަމުން ރައްޔިތުން ސަލާމަތް ކުރުމަށް ފުލުހުން ހަރަކާތްތެރިވަމުންދާކަމީ ފެންނަން އޮތް ހަގީގަތެއް ކަން ފާހަގަކޮށް އަމަން އަމާންކަން މިގައުމުގައި ގާއިމުކޮށް ރައްޔިތުންނަށް ރައްކާތެރި ތަނަކަށް ހެދުމަށް ފުލުހުން ކުރަމުންދާ މަސައްކަތައް ޝުކުރު އަދާކޮށްފަ އެވެ.
މިކޯހުގެ 3 ބައި ކުޅަ 2 ބައި ބައިވެރިންނަކީ އަޕަރ ނޯތު ޕޮލިސް ޑިވިޒަންއަށް ނިސްބަތްވާ ބައިވެރިންކަން ފާހަގަ ކުރައްވާ އަޕަރ ނޯރތް ޑިވިޝަންގެ ކޮމާންޑަރ އިންސްޕެކްޓަރ އޮފް ޕޮލިސް ނަސްރުﷲ ޖަލީލް ދެއްކެވި ވާހަކަ ފުޅުގައި މިކޯހަކީ ވަރުބަލިކަމާއި ބުރަ އިހްސާސް ކުރަންޖެހޭ ކޯހަކަށްވިޔަސް ފުލުހުންގެ ތެރޭގައި ހެދޭ އެންމެ ޤާބިލް ހުނަރުވެރި އެއް ކޯސްކަން ފާހަގަކުރައްވައި ކޯހުގެ މުއްދަތުގައި އެމުވައްޒަފުން ކުރި ހިތްވަރާއި ކުރި މަސައްކަތުގެ ފޮނި ނަތީޖާ އެމުވައްޒަފުންނަށް މިއަދު ލިބިއްޖެކަމަށް ވިދާޅުވި އެވެ. އަދި އޮޕަރޭޝަނަލީ ގާބިލް ފުލުހަކަށްވުމުގެ މަގު މިކޯހުން ދައްކުވައިދޭކަމަށް ނަސްރުﷲ ވިދާޅުވި އެވެ.
މިކޯހުގައި މައުލޫމާތު ދީފައިވަނީ ފުލުހުންނަށް ލިބިދީފައިވާ ޤާނޫނީ ބާރުތަކާ ކްރައުޑް ކޮންޓްރޯލް ސިޓްއޭޝަންތަކުގައި އާއި ކްރައުޑް ކޮންޓްރޯލްކުރުމަށް ބޭނުންކުރާ ޕާރސަނަލް އިކުއިޕްމެންޓް ބޭނުންކުރާ އިރު ޕާރޝަނަލް ހައިޖީން އަށް ވިސްނަންޖެހޭ ކަންތައްތަކުގެ އިތުރުން ފަބްލިކް އޯޑަރ ޓްރެއިނިންގެ ޑްރިލްތަކާއި ޓެކްޓިކްސް އާއި ޓެކްނިކްސްތަކުގެ އިތުރުން އެއްވުން ރޫޅާލުމަށް ބޭނުންކުރާ ފޯމޭޝަންތަކާއި ހުނަރުވެސް ވަނީ ދަސްކޮށްދީފަ އެވެ.
އޭގެ އިތުރުން މިކޯހުގައި ކިޔަވާ ދެވިފައިވާ މޮޑިއުލްތަކުގެ ތެރޭގައި ޕޮލިސް މަސައްކަތާއި ގުޅުން ހުރި ގާނޫނުތަކާއި ރެސްޓްރެއިނިންގ ޓެކްނިކްސް، ރަޔަޓް ޕޮލިސިންގ ޑްރިލްސް، ޕަބްލިކް އޯޑަރ ކޮންސެޕްޓް އާއި ކްރައުޑް މެނޭޖްމެންޓް ޓެކްނިކްސްގެ އިތުރުން ފިޒިކަލް ޓްރެއިނިންގ ހިމެނެ އެވެ. އެގޮތުން އައުޓްޑޯ މާއްދާތަކުން ޕްރެކްޓިކަލް ޓެސްޓެއްގެ އިތުރުން 04 ކިލޯ މީޓަރ ކޮމްބެޓް ރަނިންގ ޓެސްޓެއް ބައިވެރިންނަށް ދީފައިވެ އެވެ. އަދި އިންޑޯ މާއްދާތަކުން ތިއަރީ ޓެސްޓެއް ވެސް ވަނީ ދީފަ ކަމަށް ފުލުހުން މައުލޫމާތުދީފަވެ އެވެ.
މިކޯހުގެ ކިޔެވުމުގެ މަރުހަލާ ނިންމައި ދަސްވި ތަކެތި އަމަލީ މައިދާނުގައި ބޭނުންހިފާ މިންވަރު ބެލުމުގެ ގޮތުން ކުޅުދުއްފުއްޓާއި ހދ. އަތޮޅުގެ ބައެއް ރަށްރަށުގައި ވަނީ ތަފާތު ސިނާރިއޯތައް ހިމެނޭގޮތަށް 4 ދުވަހުގެ ސިމިއުލޭޝަން އެކްސައިޒްތަކެއް ކުރިއަށް ގެންގޮސްފަކަމަށް ފުލުހުން ބުނެ އެވެ.
މިދިޔަ އޮކްޓޯބަރ މަހު 11 އިން ފެށިގެން މި ނޮވެމްބަރު މަހުގެ 15 އަށް ކުޅުދުއްފުށީގައި ކުރިއަށް ގެންދިޔަ މި ކޯހުގެ މަގުސަދަކީ މޯލްޑިވްސް ޕޮލިސް ސާރވިސްގެ މުވައްޒަފުންގެ ޤާބިލުކަމާއި ހުނަރު އިތުރުކޮށް އަޕަރ ނޯތު ޑިވިޟަންގެ އަމަން ގާއިމު ކުރުމަށް ހާއްސަ ބަޔަކު ތަމްރީނު ކުރުން ކަމަށް އެފަރާތުން ހާމަކުރެ އެވެ.
ޕަބްލިކް އޯޑަރ ޓްރޭނިންގ ކޯހުގައި 30 ބައިވެރިޔަކު، ބައިވެރިވެ ކޯސް ފުރިހަމަ ކޮށްފައިވެ އެވެ. މި ކޯސް ފުރިހަމަ ކޮށްފައިވާ ބައިވެރިންގެ ތެރޭގައި އަންހެން 2 ފުލުހަކު ހިމެނެ އެވެ
ހަނިމާދޫ އެއާޕޯޓްގައި ސީޕްލޭން ޓާމިނަލެއް ގާއިމްކުރަނީ
ރަޖިސްޓްރީނުކޮށް ހުރި ގޯތިތަކާއި ސާފުނުކުރާ ފަޅު ގޯތިތަކުގެ މައްސަލާގައި ކައުންސިލްގެ ހަރުކަށި އެންގުމެއް
ޑޮލަރު މާރުކުރުމަށް ބަދަލުތަކެއް
ކުޑަކުދިންގެ ޑޮކްޓަރު އަފީފް ކުޅުދުއްފުށީ ހާޖީ މެޑިކަލް ކުލިނިކަށް
