އެމްޑީޕީ ދިއްދޫ ދާއިރާއިން ބޭއްވި މަގުމަތީ ބާޒާރާއި ޖަންބަލް ސޭލްއިން 41 ހާހަށް ވުރެ ގިނަ ރުފިޔާ ހޯދައިފި

އެމްޑީޕީގެ ދިއްދޫ ދާއިރާގެ ފަރާތުން ދިއްދޫގައި ބޭއްވި ހާއްސަ ޖަމްބްލް ސޭލާއި މަގުމަތީ ބާޒާރުން 41 ހާހަށްވުރެ ގިނަ ރުފިޔާ ހޯދައިފި އެވެ.

މި ނޫހަށް މައުލޫމާތު ދެއްވަމުން އެމްޑީޕީގެ ދިއްދޫ ދާއިރާގެ ސެކްރެޓަރީ ޖެނެރަލް އަލީ ހާޝިމް ވިދާޅުވީ މި ބާޒާރުން 41،242 ރުފިޔާ ލިބިފައިވާ ކަމަށެވެ.

ހާޝިމް ވިދާޅުވީ ބާޒާރުން ލިބުނު ރުފިޔާ ބޭނުންކުރަން ހަމަޖެހިފައިވަނީ އެމްޑީޕީގެ ހަރަކާތްތައް ދިއްދޫގައި ހިންގުމަށްޓަކައި ކަމަށާއި އެމްޑީޕީ ދިއްދޫ ދާއިރާގެ ދާއިމީ އޮފީހެއް ގާއިމުކުރަން ކަމަށެވެ. އަދި އޮފީހުގެ ފެންވަރު ރަނގަޅުކޮށް ދާއިމީ މުވައްޒަފަކު ހަމަޖެއްސުމަށްވެސް މި ފައިސާ ބޭނުންކުރާނެ ކަމަށް އޭނާ ވިދާޅުވި އެވެ.

މި ބާޒާރުގައި ޖުމުލަ 11 ވިޔަފާރިވެރިން ބައިވެރިވެފައިވާއިރު އޭގެ ތެރޭގައި ހިމެނެނީ ދިއްދޫގެ ބޮޑެތި ވިޔަފާރިވެރިންނާއި ހޯރަފުށީގެ ވިޔަފާރިވެރިއެކެވެ.

މިދިޔަ ހޮނިހިރު ދުވަހު ބޭއްވުނު މި ބާޒާރަށް ދިއްދޫއިން ބޮޑު ތަރުހީބެއް ލިބިފައިވާ ކަމަށާއި 2000 މީހުން މި ބާޒާރަށް ޒިޔާރަތްކޮށްފައިވާ ކަމަށް އަލީ ހާޝިމް ވިދާޅުވި އެވެ. އަދި އިތުރަށް މިފަދަ ބާޒާރެއް ބޭއްވުމަށް ރައްޔިތުން އެދިފައިވާ ކަމަށްވެސް އޭނާ ވިދާޅުވި އެވެ.

އެހެންކަމުން މި ބާޒާރު އަންނަ އަހަރުވެސް ބޭއްވުމަށް ރާވަމުންދާ ކަމަށާއި ސިލްސިލާކޮށް މި ބަޒާރު ބޭއްވުމަށް ވިސްނަމުންދާ ކަމަށްވެސް އޭނާ ވިދާޅުވި އެވެ.