އުތުރުގެ ދެ އަތޮޅަކުން ފަސް ރިޒޯޓެއް ތަރައްގީކުރުމަށް ޝައުގުވެރިވާ ފަރާތްތައް ހޯދުމަށް އިއުލާން ކޮށްފި

ހދ އަތޮޅުގެ 3 ރަށަކާއި ފަޅެއް އަދި ށ އަތޮޅުގެ އެއް ރަށް ރިޒޯޓެގެ ގޮތުގައި ތަރައްގީކުރުމަށް ޝައުގުވެރިވާ ފަރާތްތައް ހޯދުމަށް އިއުލާން ކޮށްފި އެވެ.

އެގޮތުން އަލަށް ރިސޯޓް ހެދުމަށް ހުޅުވާލި ފަސް ރަށަކީ ހދ. ދިއްޕަރުފުއްޓާއި ކަނަމަނާގެ އިތުރުން ކުޑަފަރުފަސްގަނޑާއި ހދ އަތޮޅު އޮންނަ ޖޮއޮގްރަފިކް ފަޅެއް ކަމަށްވާ ކުޑަފަރުފަސްގަނޑުގެ އިތުރުން ށ.ބޮލިއްސަފަރު އެވެ. މީގެތެރެއިން ކަނަމަނަ އާއި ކުޑަފަރުފަސްގަނޑު އާއި ހދ. އަތޮޅުގެ ފަޅު ތަރައްގީ ކުރެވޭނީ އެއް ޕުރޮޖެކްޓެއްގެ ދަށުން ކަމަށް ޓްރިޒަމް މިނިސްޓުރީއިން މައުލޫމާތުދެ އެވެ.

އެ މިނިސްޓްރީއިން ބުނެފައިވަނީ އެ ރިސޯޓްތައް ހެދުމަށް ޝައުގުވެރިވާ ފަރާތްތަކުން ސިޓީއާއެކު ޝައުގުވެރިކަން ހުށަހަޅާ ފަރާތެއްގެ ޕްރޮފައިލް އާއި ޝައުގުވެރިކަން ހުށަހަޅާ ފަރާތަކީ ޓޫރިސްޓް ރިސޯޓު ތަރައްގީކޮށް ހިންގުމުގައި ތަޖުރިބާ ހުރި ފަރާތެއްނަމަ އެކަން އަންގައިދޭ ލިޔުންތަކާއި ޝައުގުވެރިކަން ހުށަހަޅާ ފަރާތަކީ ޓޫރިސްޓް ރިޒޯޓް ތަރައްގީކޮށް ހިންގުމުގެ މާލީ ގާބިލުކަން ހުރި ފަރާތެއްކަން އަންގައިދީ ބޭންކަކުން ދީފައިވާ ލިޔުންތަކާއިއެކު ބީލަން އަންނަ ޑިސެމްބަރ މަހުގެ 4 ވަނަ ދުވަހުގެ ކުރިން ހުށައަޅަންޖެހޭނެ ކަމަށެވެ.

އަދި މި ބީލަމާ ގުޅޭ މައުލޫމާތު ދިނުމުގެ ސެޝަނެއް މިމަހުގެ 27 ވަނަ ދުވަހު މެންދުރު 2:00ގައި ޓޫރިޒަމް މިނިސްޓްރީގައި ބޭއްވުމަށް ނިންމާފައިވާ ކަމަށް އެ މިނިސްޓްރީ އިން ބުނެފައިވެ އެވެ.

އުތުރުގެ 4 ރަށެއް ތަރައްގީކުރުމަށް ޝައުގުވެރިވާ ފަރާތެއް ހޯދުމަށް އިއުލާންކޮށް އެ އިއުލާން މިދިޔަ އަންގާރަ ދުވަހު ވަނީ ބާތިލްކޮށްފަ އެވެ. އެ އިއުލާންގައި އިއްޔެ ނެރުނު އިއުލާންގައި ފަތުރުވެރިކަމަށް ތަރައްގީކުރުމަށް ކަނޑައަޅާ އާއްމުކޮށްފައިވާ ރަށްތަކަކީ ހއ އަތޮޅުން ހއ މާފިނޮޅާއި އިންނަފިނޮޅެވެ. ހދ އަތޮޅުން މަކުނުދޫ ފަޅުގައި އޮންނަ ދިއްޕަރުފުއްޓެވެ. އަދި ށ އަތޮޅުން ބޮލިއްސަފަރެވެ.

އަލަށް މިއަދު މި ނެރުނު އިއުލާނުން ހއ އަތޮޅުގެ ދެ ރަށް އުނިކޮށްފައިވަނީ އެ ދެ ރަށަކީ އައިހެވަން މަޝްރޫއުގެ ދަށުގައި ހިމެނޭ ދެ ރަށަށް ކަމަށްވާތީ ކަމަށް ޓޫރިޒަމް މިނިސްޓްރީގެ ޑެޕިއުޓީ މިނިސްޓަރ ހަސަން ލިރާރް ވިދާޅުވި އެވެ.