ނުރައްކާތެރި ކުށްތައް ހުއްޓުވުމަށް ނުކުޅެދެނީ ސަރުކާރުތަކުން އެކަންކަމުގެ ތެރެއަށް އަތްބޭނިފައި އޮންނާތީ: މެމްބަރު ޣަފޫރު

ގައުމެއްގައި ހިނގަމުންދާ ނުރައްކާތެރި ކަންތައްތައް (ކުށްތައް) ހުއްޓުވުމަށް ސަރުކާރު ނުކުޅެދެނީ، ސަރުކާރުތަކުން އެކަންކަމުގެ ތެރެއަށް އަތްބޭނިފައި އޮންނާތީ ކަމަށް ކުޅުދުއްފުށީ އުތުރު ދާއިރާގެ މެމްބަރު އަބްދުލް ޣަފޫރު މޫސާ ވިދާޅުވެއްޖެ އެވެ.

މެމްބަރު ޣަފޫރު މިހެން ވިދާޅުވީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނަށް ސަރުކާރުން ހުށަހަޅާފައިވާ އިސްލާހާބެހޭގޮތުން މަޖިލީހުގައި ވާހަކަފުޅު ދައްކަވަމުން ނެވެ.

މި ގައުމުގައި ކުށުގެ ވެށި ނުހުއްޓުވިގެން އުޅެނީ ގާނޫނު ނެތިގެނެއް ނޫން ކަމަށާއި އެކަންކަން ނުހުއްޓުވިގެން އުޅެނީ މި ގައުމުގެ ސަރުކާރުގައި އެކަމުގެ އިހްލާސްތެރިކަން ނެތީމައި ކަމަށް އޭނާ ވިދާޅުވެފަ އެވެ.

“ގައުމެއްގައި ހިނގަމުންދާ ނުރައްކާތެރި ކަންތައްތައް ހުއްޓުވުމަށް ސަރުކާރު ނުކުޅެދެނީ، ސަރުކާރުތަކުން އެކަންކަމުގެ ތެރެއަށް އަތްބޭނިފައި އޮންނާތީ” ޣަފޫރު ވިދާޅުވި އެވެ.

އެގޮތުން ސިޔާސީ ލީޑަރުންވެސް މި ކަމަށްޓަކައި މަޝްވަރާކުރަން ޖެހޭކަމަށާއި މި ފަދަ ކަންކަން ހުއްޓުވުމަށް މަސައްކަތް ކުރަންޖެހޭކަން ވެސް ޣަފޫރު ވިދާޅުވި އެވެ. ކުށްމަދު ކުރުމަށްޓަކައި ދޭންޖެހޭ ފައިސާ މި މަޖިލީހުން ދޫކުރަމުންދާއިރު ކުށްތައް މަދުނުވާކަމަށް ވިދާޅުވެ ޣަފޫރުު ވިދާޅުވީ މި ގާނޫނުއަސާސީން ރައްޔިތުންނަށް ލިބިދޭ އެންމެ ބޮޑު އެއް ކަމަކީ ހިމާޔަތާއި ރައްކާތެރިކަން ކަމަށާއި އެހެންނަމަވެސް މި ގައުމުގައި އެއްވެސް ސަރުކާރަކަށް އެކަން ކޮށްދިނުމަށް ވަނީ ނުކުޅެދިފައި ކަމަށެވެ.

އަދި ރައްޔިތުންގެ ފައިސާ ހަވާލުކޮށް ވެރިކަން ކޮށްދޭށޭ ބުނަނީ ރައްޔިތުން އާމާންކަމާ އެކީ ބޭނުންވާ އެހެނިހެން ވަސީލަތްތަކާ އެކު ދިރިއުޅެން ބޭނުންވާތީ ކަމަށްވެސް ޣަފޫރު ވިދާޅުވި އެވެ.

އެގޮތުން އިހްލާސްތެރިކަމާއެކު މި ގައުމުގެ ރައްޔިތުންނަށް އަމާން ވެއްޓެއް ގާއިމުކޮށްދިނުމަށްޓަކައި މަސައްކަތްކޮށް މިގައުމަށް ހަމަޖެހުމާއި ރައްކަތެރިކަން ގެނެސްދިނުމަށް ޣަފޫރު ގޮވާލެއްވި އެވެ. އަދި ވެރިކަމަށް އައުމަށްޓަކައި ނުވަތަ ވެރިކަމުގައި ދެމިހުރުމަށްޓަކައި ގާނޫނީ ގޮތުން ނުވަތަ ގާނޫނާ ހިލާފު ކަންތައްތައް ކުރާ ބައެއްގެ ފަހަތުގައި އޮވެގެނެއް ނަތީޖާއެއް ރަނގަޅެއް ނުވާނެކަމާއި މި ޤައުމުގެ ސަރުކާރުތަކުން މި ދަނީ އެކަމުގެ ހިތިތަޖުރިބާ ކުރަމުން ކަމަށްވެސް ޣަފޫރުގެ ވާހަކާގައި ވިދާޅުވި އެވެ.

ރާއްޖޭގައި ހިނގަމުންދާ އެންމެހައި ގޯސްކަންތަކުގެ ޒިންމާ  ގައުމުގެ ސިޔާސީ ލީޑަރުންނާއި ސިޔާސީ ފަރާތްތަކުން އުފުލަންޖެހޭކަމަށާއި އެކަންކަން ހުއްޓުވުމުގެ ބާރު ރައްޔިތުން ގައުމުގެ ސިޔާސީ ލީޑަރުންނަށާއި މި ގައުމުގައި ގާނޫނީ ގޮތުން އިންތިހާބުވެފައި ތިބި ފަރާތްތަކަށް ދީފައިވާއިރު އެފަރާތްތައް ވަނީ އެކަން ކުރުމަށް ފެއިލްވެފައި ކަމަށްވެސް އޭނާ ވިދާޅުވި އެވެ.

ރައްޔިތުންގެ މަޖިލީހަށް ސަރުކާރުގެ ފަރާތުން ހުށަހަޅާފައިވާ މި ބިލާބެހޭގޮތުން ވާހަކަ ދެއްކެވި ގިނަ ބޭފުޅުން މި ބިލުގައި، ގާނޫނޫއަސާސީން ދީފައިވާ ބައެއް ހައްގުތައް ހަނިކުރާތީ ކަންބޮޑުވުން ފާޅުކޮށްފައި ވެއެވެ.