ނެއްލައިދޫ މެޖިސްޓްރޭޓް ކޯޓް އިމާރާތްކުރުމުގެ އެއްބަސްވުމުގައި ސޮއިކޮށްފި

ހދ ނެއްލައިދޫ މެޖިސްޓްރޭޓް ކޯޓް އިމާރާތްކުރުމުގެ އެއްބަސްވުމުގައި މިއަދު ސޮއިކޮށްފި އެވެ.

ނެއްލައިދޫ މެޖިސްޓްރޭޓް ކޯޓްގެ އިމާރާތްކުރުމުގެ މަސައްކަތްކުރުމަށް ހަވާލުކޮށްފައިވާ ކާފް ހޯލްޑިންސް ޕްރައިވެޓް ލިމިޓެޑާ އެވެ.

ކުޅުދުއްފުށި މެޖިސްޓްރޭޓް ކޯޓާއެކު ކުރެވުނު މި އެއްބަސްވުމުގައި ސޮއިކުރެއްވީ ކުޅުދުއްފުށި މެޖިސްޓްރޭޓް ކޯޓްގެ އެޑްމިނިސްޓްރޭޓަރ އިބްރާހިމް އުމަރާއި ކާފް ހޯލްޑިންސް ޕްރައިވެޓް ލިމިޓެޑްގެ މެނޭޖިން ޑިރެކްޓަރ އަހުމަދު ޝަހީމް އެވެ.

މި ނޫހަށް މައުލޫމާތު ދެއްވަމުން ކުޅުދުއްފުށި މެޖިސްޓްރޭޓް ކޯޓްގެ އެޑްމިނިސްޓްރޭޓަރ އިބްރާހިމް އުމަރު ވިދާޅުވީ މި މަޝްރޫއަކީ 1.49 މިލިއަން ރުފިޔާގެ މަޝްރޫއެއް ކަމަށާއި އިމާރާތުގެ މަސައްކަތް އަންނަ އަހަރުގެ އޭޕްރީލް މަހުގެ 30 ވަނަ ދުވަހުގެ ކުރިން ނިންމަންޖެހޭނެ ކަމަށެވެ.

އަލަށް ބިނާކުރާ މި އިމާރާތުގައި އިދާރީ ބަޔަކާއި ޝަރީއަތްކުރާ ބަޔަކާއި މެޖިސްޓްރޭޓް ރޫމަކާއި ވެއިޓިން ރޫމަކާއި ގުދަނަކާއި އެއް ފާހާނާގެ އިތުރުން ޕޯޓިކޯއެއް ހެދުމަށް ހަމަޖެހިފައިވާ ކަމަށް އިބްރާހިމް ވިދާޅުވި އެވެ.

ސޮއިކުރުމަށް ކުޅުދުއްފުށި މެޖިސްޓްރޭޓް ކޯޓްގައި ބޭއްވި ހާއްސަ ރަސްމިޔާތުގައި ވާހަކަ ދައްކަވަމުން އިބްރާހިމް އުމަރު ވިދާޅުވީ މި ޕްރޮޖެކްޓް ފެށުމަށް ކުޅުދުއްފުށި މެޖިސްޓްރޭޓް ކޯޓްގެ އިސް ގާޒީ އާއި މިނިސްޓްރީގެ ފަރާތުން ބޮޑު އެއްބާރުލެއްވުމެއް ލިބުން ކަމަށާއި މި އިމާރާތުގެ ސަބަބުން ނެއްލައިދޫ ކޯޓަށް ދިމާވެފައިވާ ޖާގައިގެ ދަތި ކަމަށް ލުޔެއް ލިބިގެންދާނެ ކަމަށެވެ.

އަދި މި އިމާރާތުގެ ސަބަބުން ނެއްލައިދޫއަށާއި މުޅި އަތޮޅަށް ފައިދާވެގެން ދާނެ ކަމަށާއި ކުރިއަށް އޮތް ދުވަސްތަކުގައި އަތޮޅުގެ އެހެން ރަށްރަށުގެ ކޯޓް އިމާރާތްތައްވެސް ބިނާކުރެވިގެންދާނެ ކަމަށް އުއްމީދުކުރައްވާ ކަމަށް އޭނާ ވިދާޅުވި އެވެ.

މި ރަސްމިޔާތުގައި އިބްރާހިމް އުމަރާއި ކާފް ހޯލްޑިންސްގެ މެނޭޖިން ޑިރެކްޓަރުގެ އިތުރުން ކުޅުދުއްފުށި މެޖިސްޓްރޭޓް ކޯޓްގެ އިސް ގާޒީ އަދި ނެއްލައިދޫ ކައުންސިލްގެ ބައެއް މެންބަރުން ބައިވެރިވެފައިވެ އެވެ.

މިހާރު ނެއްލައިދޫގެ ކޯޓް ހިންގަމުންގެންދަނީ ނެއްލައިދޫ ކައުންސިލް އިދާރާގެ އިމާރާތުގެ ތެރޭގަ އެވެ.