ނޭކުރެންދޫ ގެޔެއްގެ މަތިން ވެއްޓުނު 16 އަހަރުގެ ކުއްޖާ އައިސީޔޫގައި ފަަރުވާދެމުން ދަނިކޮށް ނިޔާވެއްޖެ

ހދ. ނޭކުރެންދޫ ގެޔެއްގެ މަތިން ވެއްޓުނު 16 އަހަރުގެ ކުއްޖާ  ކުޅުދުއްފުށީ ރީޖަނަލް ހޮސްޕިޓަލުގެ އައިސީޔޫގައި ފަރުވާ ދެމުން ދަނިކޮށް ރޭ ނިޔާވެއްޖެ އެވެ.

މި ނޫހަށް މައުލޫމާދު ދެމުން ނޭކުރެންދޫ ކައުންސިލްގެ ރައީސް މުހައްމަދު ސިޒާން ވިދާޅުވީ އިއްޔެ ހަވީރު 5:50 ހާއިރު ހިނގި މިހާދިސާގައި ވެއްޓިފައިވަނީ 16 އަހަރުގެ ކުއްޖެއް ކަމަށާއި އޭނާ ވެއްޓިފައިވަނީ ނޭކުރެންދޫގައި ހަދަން ފަށާފައިހުރި ގެޔެއް ހިޔާ ކުރަން އުޅުމުގެ ތެރޭގައި ކައްސާލައިގެން ކަމަށެވެ.

މި ހާދިސާގައި ވެއްޓިފައިވަނީ ހދ. ނޭކުރެންދޫ ވިނަރެސް އަހުމަދު ވިޝާމެވެ. އޭނާ ވެއްޓުނުއިރުވެސް ވާތުފަޔާއި ކަނާތު އަތްބިނދިފައި ވާކަމަށާއި އަދި އަނގައިންވެސް ލޭ އައިސްފައިވާކަމަށް ސިޒާން މައުލޫމާތު ދިނެވެ.

ވިޝާމް ކުޅުދުއްފުއްޓަށް ގެނެވިފައިވަނީ ރޭ ގަތްގަނޑަކަށް 7 ޖަހާއިރުކަމަށާއި ކުޅުދުއްފުއްޓަށް ގެނެސްފައިވަނީ ނޭކުރެންދޫ ސިއްހީ މަރުކަޒުން ފަރުވާދިނުމަށް ފަހުކަމަށާއި އިންޓާނަލް ބްލީޑިން ވާކަން އެގުނީ ކުޅުދުއްފުއްޓަށް ގެނައުމުން ކަމަށް ސިޒާން ވިދާޅުވި އެވެ.

ވިޝާމް ނިޔާވީ އިތުރުފަރުވާ ދިނުމަށްޓަކައި މާލެ ގެންދިއުމުގެ މަސައްކަތް ކުރިއަށް ދަނިކޮށެވެ.