މަސްތުވާތަކެތި ވިޔަފާރިކުރަން އުޅުނު މައްސަލައިގައި ސަޓޯ ޖަލަށް ލުމަށް ކުރި ހުކުމް ހައިކޯޓުން ބާތިލުކޮށްފި

މަސްތުވާތަކެތީގެ ވިޔަފާރިކުރަން އުޅުމުގެ ދައުވާ ސާބިތުވެގެން ޖަލަށް ހުކުމްކޮށްފައިވާ ކުޅުދުއްފުށީ، ގުލާބީގެ އަބްދުއްސައްތާރު އަލީގެ މައްޗަށް ކްރިމިނަލް ކޯޓުން ކޮށްފައިވާ ހުކުމް ހައި ކޯޓުން ބާޠިލު ކޮށްފި އެވެ.

މަސްތުވާތަކެތީގެ ވިޔަފާރިކުރުމުން ޖަލަށް ހުކުމްކޮށްފައިވާ އިބްރާހިމް ޝަފާޒް އަބްދުއްރައްޒާގު (ސަފާ) ހިންގި މަސްތުވާތަކެތީގެ ބޮޑު ނެޓްވޯކާ ގުޅިގެން މަސްތުވާތަކެތީގެ ވިޔަފާރިކުރަން އުޅުނު މައްސަލައިގައި ޖަލަށްލި އަބްދުއްސައްތާރުގެ މައްޗަށް ކްރިމިނަލް ކޯޓުގައި ކުރި ދައުވާ ސާބިތުވުމާ ގުޅިގެން 18 އަހަރަށް ޖަލަށް ލުމަށާއި 75000ރ. އިން ޖޫރިމަނާކުރަން މިދިޔަ އަހަރުގެ ތެރޭގައި ކްރިމިނިަލް ކޯޓުން ވަނީ ހުކުމްކޮށްފަ އެވެ.

އަބްދުއްސައްތާރުގެ މައްޗަށް މަސްތުވާތަކެތި ވިޔަފާރިކުރަން އުޅުމުގެ ދައުވާ ސާބިތުނުވާކަމަށް ހައިކޯޓުން ކުރި ހުކުމުގައި ބުނެފައިވަނީ، އޭނާގެ މައްޗަށް ކޮށްފައިވާ ދައުވާ ބިނާ ކޮށްފައިވަނީ ސައްތާރުއާ އެހެން މީހަކާ ދެމެދު ކުރެވުނު ފޯނު ކޯލެއްގެ ރިކޯޑިންގެ މައްޗަށް ކަމަށާއި އަދި ފުލުހުން އެ ފޯން ކޯލް ރިކޯޑު ކޮށްފައިވަނީ ކްރިމިނަލް ކޯޓުން ދީފައިވާ ދެ އަމުރެއްގެ ދަށުން ކަމަށް ދައުލަތުން ބުނެފައިވާ ކަމަށެވެ. އެހެންނަމަވެސް، ކްރިމިނަލް ކޯޓުން ދީފައިވާ ދެ އަމުރުގައި ވަނީ ސަފާގެ ނެޓްވޯކްގައި ހިމެނޭ މ. ކުދެހިގެ ހުސައިން އާތިފް އާއި ތ. ތިމަރަފުށި ކަރަންކާވިލާ އިސްމާއީލް ޝަހީމް ބޭނުންކުރާ ދެ ފޯނުކަން އެ އަމުރުން އެނގެން އޮންނަ ކަމަށް ހައިކޯޓުގެ ހުކުމުގައި ބުނެފައި ވެއެވެ.

ހައިކޯޓުގެ ހުކުމުގައި ބުނެފައިވަނީ ކޮންމެ މީހެއްގެ ޒާތީ އަދި އާއިލީ ދިރިއުޅުމާއި ގޮވަތި ގެދޮރާއި އަނެކުންނާކުރާ ޒާތީ މުއާސަލާތުތަކަކީ ހުރުމަތްތެރިވެގެންވާ ކަންކަމާއި ތަންތަންކަމަށާއި ހަމަކޮންމެމީހަކު މި ހައްގުތަކަށް ހުރުމަތްތެރިކޮށް ހިތަންވާނެ ކަމަށް ގާނޫނުއަސާސީގެ 24 ވަނަ މާއްދާގައި ބުނެފައިވާ ކަމަށާއި އަދި ޝަރުއީ ކޯޓެއްގެ ހުއްދަ އޮވެގެން ނޫންގޮތަކަށް ދެ މީހެއްގެ މެދުގައި ފޯނަކުން ކުރެވިފައިވާ މުއާމަލާތެއްފަދަ ޒާތީ މުއާސަލާތެއް ހެއްކެއްގެ ގޮތުގައި ޝަރީއަތަށް ބަލައިގަތުމަކީ ގާނޫނުއަސާސީގެ 52 ވަނަ މާއްދާއާ ކަނޑައެޅިގެން ހިލާފު ކަމެއް ކަމަށް އެ ހުކުމުގައި ބުނެފައި ވެއެވެ.

ހ. ފަށަން ގޭގެ އެޕާޓްމެންޓެއްގެ ތެރެއިން 800 ގްރާމްގެ މަސްތުވާތަކެއްޗާއެކު 2011 ގައި އަތުލައިގަތް އެ ނެޓްވޯކްގެ އިސްވެރިޔާ ކަމަށް ފުލުހުން ބުނަނީ ސަފާ އެވެ. އެ މައްސަލައިގައި ސަފާ އާއި އަބްދުއްސައްތާގެ އިތުުރުން އިތުރު ހަތަރު މީހަކު ދިގު މުއްދަތަކަށް ޖަލަށްލާން ކްރިމިނަލް ކޯޓުން ހުކުމްކުރީ މިދިޔަ ނޮވެމްބަރު މަހު އެވެ.

ސަފާ އާއި އަބްދުއްސައްތާރާއި އަތީފްގެ މައްޗަށް 18 އަހަރުގެ ޖަލު ހުކުމަކާ އެކު 75،000ރ. ގެ ޖޫރިމަނާއެއް އައިއިރު ހ. ފަށަން ގެއިން ފެނުނު މަސްތުވާތަކެތި ގެންގުޅުނު ތިން މީހުންނަށް އައީ 10 އަހަރުގެ ޖަލު ހުކުމެކެވެ.

އެއީ ހ. ގަސްވާ މުހައްމަދު މީއާދާއި ތ. ތިމަރަފުށީ ކަރަންކާވިލާ އިސްމާއިލް ޝަހީމްގެ އިތުރުން ގދ. ފިޔޯރީ އެވަރެސްޓް އަނަސް އަނީސްގެ މައްޗަށެވެ.