ދިރާގުގެ 4ޖީ ހިދުމަތް ކުޅުދުއްފުއްޓަށް ތައާރަފްކޮށްފި

ދުނިޔޭގެ އެންމެ ކުރި އަރާފައިވާ މޮބައިލް ނެޓްވޯކް ކަމަށްވާ ފޯޖީ އެލްޓީއީ އޭ ނެޓްވޯކް ކުޅުއްދުއްފުށީގައި ތައާރަފުކޮށްފި އެވެ.

4ޖީގެ ހިދުމަތް ތައާރަފުކުރުމަށްޓަކައި މިއަދު ޖަލާލުއްދީން ސްކޫލްގައި ބޭއްވި ހާއްސަ ރަސްމިޔާތެއްގައި މި ހިދުމަތް ތައާރަފުކޮށްދެއްވީ ދިރާގުގެ ޗީފް އެގްޒެކެޓިވް އިސްމާޢީލް ރަޝީދެވެ.

އިސްމާއިލް ރަޝިދު ވިދާޅުވީ 4ޖީ ތައާރަފުވެގެންދިއުމަކީ ރާއްޖޭގެ މުވާސަލާތީ ހިދުމަތުގައި ހޯދުނު ވަރަށް ބޮޑު ކުރިއެރުމެއް ކަމަށާއި މި ހިދުމަތް ރާއްޖޭގެ ކަންކޮޅުތަކަށް ފުޅާކުރުމަށް ދިރާގުން މަސައްކަތްކުރަމުންދާ ކަމަށެވެ. އަދި ކުޅުދުއްފުއްޓަކީ އުތުރުގެ ތަރައްގީގެ ހަބެއް ކަމަށާއި ކުޅުދުއްފުއްޓަށް މި ހިދުމަތް ތައާރަފުވެގެންދިއުމުން މީގެ ފައިދާ މުޅި މި ހިސާބުގެ ރައްޔިތުންނަށް ލިބިގެންދާނެ ކަމަށް އޭނާ ވިދާޅުވި އެވެ.

މި ހާއްސަ ރަސްމިޔާތުގައި އެ ކުންފުނީގެ ޑައިރެކްޓަރ ކަސްޓަމަރ ސަރވިސް އެންޑް ސޭލްސް އަލީ ރިޔާޒް ވިދާޅުވީ މިއަދަކީ ތާރީހުގައި ލިޔެވިގެންދާނެ ދުވަހެއް ކަމަށާއި ކުޅުދުއްފުއްޓަކީ ދިރާގުގެ ހިދުމަތްތަކާއި ވަސީލަތްތައް ތައާރަފުކުރުމަށް ވަރަށް އިސްކަމެއްދޭ ރަށެއް ކަމަށެވެ. އަދި ކުޅުދުއްފުށީގެ ރައްޔިތުންނަކީ އަލަށް ތައާރަފުކުރާ ހިދުމަތްތަކުގެ ބޭނުން ފުރުހަމައަށް ހިފާ ރައްޔިތެއް އުޅޭ ރަށެއް ކަމަށްވެސް އޭނާ ވިދާޅުވި އެވެ.

4ޖީގެ ހިދުމަތަށް ދިރާގުން ތައާރަފުކޮށްފައިވާ ހާއްސަ ސިމް ކަމަށްވާ “ޔޫސިމް” ދައްކާލާ އެ ސިމާ ބެހޭގޮތުން އަލީ ރިޔާޒް ވިދާޅުވީ އެ ސިމަކީ 3ޖީ އާއި 2ޖީގެ ހިދުމަތް ވެސް ލިބޭނެ ސިމެއް ކަމަށާއި އެ ސިމްގައި ތިން ސިމް ޓްރޭ ހިމެނޭ ކަމަށެވެ.

މި ރަސްމިޔާތުގައި ވަނީ ރަސްމިޔާތަށް ދައުވަތު އެރުވުނު ހުރިހާ ފަރާތަކަށް “ޔޫސިމް”އެއް ހަދިޔާކޮށްފަ އެވެ. އަދި ހުރިހާ ހާޒިރީން މެދުގައި ވަނީ ގުރުއަތެއް ނަގައި ނަސީބުވެރީން ހޮވާފަ އެވެ. ފުރަތަމަ އަދި ދެވަނަ ނަސީބުވެރިޔާއަށް އައިފޯން 6 ޕަލްސްއަކާއި، އައިފޯން 6 އެއް ހަދިޔާކުރިއިރު އިތުރު 5 ނަސީބުވެރިއަކަށް ޑޮންގްލްއެއް ދީފައިވެ އެވެ.

ދިރާގުގެ ފަރާތުން ހދ އަތޮޅު ކައުންސިލަށާއި ކުޅުދުއްފުށި ކައުންސިލަށް ވަނީ ހަނދާނީ ފިލައެއް ދީފަ އެވެ. މި ފިލާއާ އަތޮޅު ކައުންސިލްގެ ރައީސް އާދަމް ނަސީރާއި ރަށު ކައުންސިލްގެ ރައީސް އަލީ މުހައްމަދު ހަވާލުވެލެއްވިއިރު މި ހަނދާނީ ފިލާ ދެއްވީ ދިރާގުގެ ޗީފް އެގްޒެކެޓިވް އިސްމާއިލް ރަޝީދެވެ.

ދިރާގުން ބުނީ ދިރާގު މޯބައިލް ނެޓްވޯކް އަޕްގްރޭޑްކޮށް 3ޖީ ސްޕީޑް އެތައް ގުނައެއް ރަނގަޅުކޮށްފައިވާ ކަމަށެވެ. އަދި އެންމެ ޒަމާނީ 4ޖީ ނެޓްވޯކެއް ގާއިމްކޮށް އެލް.ޓީ.އީ ނެޓްވޯކު މެދިވެރިކޮށް 3ޖީ ސްޕީޑްގެ 10 ގުނަ ހަލުވި ސްޕީޑުގައި މިހާރު ހިދުމަތް ލިބޭނެ ކަމަށް ވެސް އެ ކުންފުނިން ބުންޏެވެ.

4ޖީގެ ހިދުމަތް ދިރާގުން މިހާރު ދޫކުރަމުން ގެންދާ ޕެކޭޖުތަކުން ހޯދޭނެ ކަމަށާއި އިތުރު ޕެކޭޖުތަކެއް ވެސް ތައާރަފު ކުރުމަށް ހަމަޖެހިފައިވާ ކަމަށްވެސް ދިރާގުން މައުލޫމާތިދެ އެވެ.

މި ރަސްމިޔާތުގައި ދިރާގުގެ އިސްވެރިންނާއި މުވައްޒަފުން އަދި ކުޅުދުއްފުށީގެ ސަރުކާރުގެ މުވައްސަސާތަކާއި އަމިއްލަ މުވައްސަސާތަކުގެ އިސްވެރިންގެ އިތުރުން ވިޔަފާރިވެރިން ބައިވެރިވެފައިވެ އެވެ.

[yass cats=151]