ކަނޑުބޯޓެއްގައި ކުޅުދުއްފުއްޓަށާއި ދިއްދުއަށް ކުރައްވާ ދަތުރުފުޅެއްގައި ރައީސް ނަޝީދު ފުރާވަޑައިގެންފި

ކަނޑުބޯޓެއްގައި ކުޅުދުއްފުއްޓަށާއި ދިއްދުއަށް ކުރައްވާ ދަތުރުފުޅެއްގައި ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު މިއަދު ފުރާވަޑައިގެންފި އެވެ.

ރައީސް ނަޝީދު މި ދެރަށަށް ކުރައްވާ ދަތުރުފުޅު ފެއްޓެވީ މިރޭ 7 ޖެހިއިރު އެވެ. ދަތުރު ކުރައްވަނީ މަޝްހޫރު ބާދުޝާހް ބޯޓުގަ އެވެ

ރައީސް ނަޝީދު ކުޅުދުއްފުއްޓަށް ވަޑައިގަންނަންވަނީ މާދަމާ ހެނދުނު 7 ޖަހާއިރު ކަމަށް އެމްޑީޕީ ބުނެ އެވެ. އަދި މާދަމާ ކުޅުދުއްފުށީގެ އެމްޑީޕީގެ އިސްވެރިންނާ ނަޝީދު ބައްދަލުކުރެއްވުމަށް ހަމަޖެހިފައިވާކަމަށް އެޕާޓީ ބުނެ އެވެ.

ކުޅުދުއްފުށީ ދެކުނު ދާއިރާގެ އެމްޑީޕީ ރައީސް ހަސަން ސުޖާ “ކުޅުދުއްފުށީ އޮންލައިނަން” ވިދާޅުވީ ރައީސް ނަޝީދުގެ ބައިވެރިވެވަޑައިގަންނަވާ ހާއްސަ ޖަލްސާއެއް މާދަމާ ރޭ 9 ޖަހާއިރު ކުޅުދުއްފުށީ ބަންޑާރަ މައިދާނާ ދިމާ ވެލިގަނޑުގައި އޮންނާނެކަމަށެވެ.

ހުކުރު ދުވަހުގެ މެންދުރު ފަހުގެ ވަގުތެއް ބާދުޝާހް ބޯޓުގައި ރައީސް ނަޝީދު ދިއްދުއަށް ފުރާވަޑައިގަންނަވާނެވެ. އަދި އެދުވަހުގެ ހަވީރު 4:30 އެހާއިރު ދިއްދުއަށް ވަޑައިގަތުމަށް ފަހު އެރަށުގައި އެރޭ އެމްޑީޕީގެ ހާއްސަ ޖަލްސާއެއް ވެސް އޮންނާނެކަމަށް އެމްޑީޕީ ބުނެ އެވެ.

ދިއްދުއަށް ވަޑައިގަތުމަށް ފަހު އެބުރި ހޮނިހިރު ދުވަހު ކުޅުދުއްފުއްޓަށް ރައީސް ނަޝީދު ވަޑައިގަތުމަށް ފަހު ކުޅުދުއްފުށީގައި 12 ކޮޓަރީގެ ގެސްޓް ހައުސެއްގެ އިމާރާތްކުރުމުގެ ބިންގާ އެޅުއްވުމަށް ހަމަޖެހިފަ އެވެ. އަދި ހަމަ އެދުވަހު ސަހާމާ ގެސްޓް ހައުސް ހުޅުވައްދެއްވާނީ ވެސް ރައީސް ނަޝީދު ކަމަށް އެމްޑީޕީ ބުނެ އެވެ.

ރައީސް ނަޝީދު ދަތުރުފުޅު ނިންމާލުމަށް ފަހު މާލެއަށް ފުރާވަޑައިގަތުމަށް ހަމަޖެހިފައިވަނީ ހޮނިހިރު ދުވަހު ހަވީރު ކުޅުދުއްފުށިން ބާދުޝާހް ބޯޓްގަ އެވެ.