ބީ.އެމް.އެލް އިން ޑޮލަރު ޖަމާކޮށް އަދި ޑޮލަރު ނެގޭ އޭޓީއެމް ތަޢާރަފްކޮށްފި

ބޭންކް އޮފް މޯލްޑިވްސް އިން ފުރަތަމަ ފަހަރަށް ޑޮލަރު އޭޓީއެމް ތަޢާރަފްކޮށްފިއެވެ. ކޮންމެ ވަގުތެއްގައިވެސް ޑޮލަރު ނެގުމާއި ޖަމާކުރުމުގެ ޚިދުމަތް ލިބޭ މި އޭޓީއެމް ބަހައްޓަފައިވަނީ ބޭންކުގެ ހެޑް އޮފީސް ތިރީ ބުރީގައެވެ.

ބީއެމްއެލް އިން މައުލޫމާތު ދޭ ގޮތުގައި އަލަށް ތަޢާރަފްކުރެވުނު ޑޮލަރު އޭޓީއެމް އިން ޑޮލަރު ނެގޭނީ ބީއެމްއެލް ޑެބިޓް ކާޑެއް ބޭނުންކޮށްގެން ޑޮލަރު އެކައުންޓުންނެވެ. މިގޮތުން ޑެބިޓް ކާޑު ބޭނުންކޮށްގެން ދުވާލަކު 640 ޑޮލަރު ނެގޭނެއެވެ. މިއީ އެއްވެސް ފީ އަކާ ނުލައި ބޭންކުން ދޭ ޚިދުމަތެކެވެ.

ބޭންކުން މިއަދު ބެހެއްޓި އޭޓީއެމް އަށް އެއްފަހަރާ 180 ނޫޓް ޖަމާކުރެވޭ އިރު، ޑޮލަރު ނެގުމާ ޑޮލަރު ޖަމާކުރުމަށް ބޭނުންކުރެވޭނީ 10، 20 ،50 އަދި 100 ޑޮލަރުގެ ނޫޓެވެ.

މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ބޭންކުގެ ސީއީއޯ އަދި މެނޭޖިންގ ޑައިރެކްޓަރ އެންޑްރޫ ހީލީ ވިދާޅުވީ މިއީ ކަސްޓަމަރުންނަށް ޚިދުމަތް ހޯދުމުގައި ލުއި ފަސޭހަގޮތްތަކެއް ހޯދައިދިނުމަށް ބޭންކުން ކުރަމުންދާ މަސައްކަތުގެ ދަށުން ހާސިލުކުރެވުނު މުހިންމު ލަނޑުދަނޑިއެއް ކަމަށެވެ.

“ސެލްފް ސާވިސް ބޭންކިންގ ތަޢާރަފްކުރި އިރު އަޅުނގަޑުމެންވާނެ ޑޮލަރު އޭޓީއެމް ތަޢާރަފްކުރާނެ ކަން ހާމަކޮށްފަ. މިޚަބަރުވެގެން ގޮސްފައިވަނީ ބްރާންޗްތަކުގައި ކިއޫގައި މަޑުކުރައްވައިގެން ކިދުމަތް ހޯއްދަވާ ކަސްޓަމަރުން ވަރަށް ބޮޑަށް ބަލައިގެން ޚަބަރަކަށް. މިހާރު 24 ގަޑިއިރު ޑޮލަރު ނެގުމާއި ޖަމާކުރުމުގެ ޚިދުމަތް ކަސްޓަމަރުންނަށް ލިބިގެންދާނެ. މިޚިދުމަތް ކަސްޓަމަރުން ބޭނުންކުރާ ނިސްބަތަށް ބަލައި އަޅުގަނޑުމެން މިއަންނަ އަހަރުގެ ތެރޭގައި އިތުރު އޭޓީއެމް ބަހައްޓާނަން.” ސީއީއޯ އެންޑްރޫ ވިދާޅުވި އެވެ.

އެންޑްރޫ ވިދާޅުވީ ދާދިއަވަހަށް އެއާޕޯޓްގައި އިތުރު ޑޮލަރު އޭޓީއެމްއެއް ބަހައްޓާނެ ކަމަށާއި އަދި ޑޮލަރަށް ހާއްސަ އިތުރު 5 އޭޓީއެމް މިއަންނަ އަހަރު ތެރޭގައި ބަހައްޓަވާނެ ކަމަށެވެ.

ދާދި ފަހުން މާލޭގެ ފަސް ސަރަހައްދެއްގައިޤާއިމު ކުރެވުނު 22 އޭޓީއެމްގެޚިދުމަތާ ގުޅޭގޮތުން އެންޑްރޫ ވިދާޅުވީ ބްރާންޗުތަކުގައި ކިއޫގައި މަޑު ނުކުރައްވައި މި އޭޓީއެމްތަކުން ޚިދުމަތް ހޯދި ކަސްޓަމަރުންގެ ނިސްބަތާ މެދު އުފާކުރައްވާކަމަށެވެ.

“ވޭތުވެދިޔަ 3 ހަފްތާ ތެރޭ ފަނަރަ ހާހަށްވުރެ ގިނަ ކަސްޓަމަރުންވަނީ ބްރާންޗުގެ ކިޔުގައި މަޑުނުކުރައްވައި އާ އޭޓިއެމްތައް މެދުވެރިކޮށް ފައިސާ ނެގުމާއި ޖަމާކުރުމުގެ ޚިދުމަތް ހޯދާފައި. މީގެ ތެރެއިން ޑިޕޮސިޓްކުރުމުގެ ޚިދުމަތްވެސް ވަނީ ވަރަށް ބޮޑަށް ބޭނުންކޮށްފައި. ނަމަވެސް އަޅުގަނޑުމެންނަށް ފެނޭ ވަރަށް ގިނަ ކަސްޓަމަރުން މި ލުއިފަސޭހަ ޚިދުމަތް ބޭނުން ނުކުރައްވައި ބްރާންޗްތަކުގެ ކިޔުގައި ތިއްބަވާތަން. އަޅުގަނޑުމެން އިތުރަށް މަސައްކަތްކުރާނަން މި އޭޓީއެމްތަކަކީ ރައްކާތެރި އަދި ބޭނުންކުރަން ފަސޭހަ އޭޓީއެމްތަކެއްކަން ކަސްޓަމަރުންނަށް އަންގައިދިނުމަށް. “އެންޑްރޫ އިތުރަށް ވިދާޅުވިއެވެ.