“އަމާން ވެއްޓަކަށް ބޮޑުތިލަދުންމަތި” ނަމުގައި ޓްރެފިކް އޮޕަރޭޝަނެއް ފަށައިފި

ކުޅުދުއްފުށީ ޕޮލިސް ސްޓޭޝަންގެ ޓްރެފިކް ޕޮލިސް ޔުނިޓުން “އަމާން ވެއްޓަކަށް ބޮޑު ތިލަދުންމަތި” މި ޝިއާރުގެދަށުން ކުރިއަށްގެންދާ އޮޕަރޭޝަނެއް ފަށައިފި އެވެ.

އެގޮތުން މި އޮޕަރޭޝަނުގެ ދަށުން މިދިޔަ އަންގާރަ ދުވަހު ވަނީ ކުޅުދުއްފުށި ކައުންސިލާ ފުލުހުން ބައްދަލުކޮށްފަ އެވެ. މި ބައްދަލުވުމުގައި ޓްރެފިކް ޕޮލިސް ޔުނިޓުން ހިންގާ މި އޮޕަރޭޝަނާބެހޭ މައުލޫމާތު އެ ކައުންސިލްގެ މެމްބަރުންނާ ހިއްސާކޮށް މަޝްވަރާކޮށްފައިވެ އެވެ.

“އަމާން ވެއްޓަކަށް ބޮޑުތިލަދުންމަތި” މި އޮޕަރޭޝަނުގެ ދަށުން ކުޅުދުއްފުށީގެ ދެ ޓެކްސީ ސެންޓަރު ކަމަށްވާ ގްރީން ޓެކްސީ ސެންޓަރާއި ފުރޮޅު ޓެކްސީ ސެންޓަރުގެ ޑްރައިވަރުންނަށް ޓުރެފިކާ ބެހޭ މައުލޫމާތުދީފައިވާ ކަމަށް ފުލުހުން މައުލޫމާތުދެ އެވެ.

އަދި މިމަހުގެ 7 ވަނަ ދުވަހު ހދ ނޭކުރެންދޫގައި ޓްރެފިކް މައުލޫމާތުދިނުމުގެ ޕްރޮގްރާމެއް ހިންގުމަށް ހަމަޖެހިފައިވާއިރު މި މަހުގެ އެކި ދުވަސްތަކުގައި ހދ އަތޮޅުގެ އެކި ރަށްރަށުގައި މި ޕްރޮގްރާމް ހިންގުމަށް ހަމަޖެހިފައިވާކަމަށް ކުޅުދުއްފުށީ ޕޮލިސް ސްޓޭޝަނުން ބުނެ އެވެ.

މި އޮޕަރޭޝަނަކީ 1 ޑިސެމްބަރުން 31 ޑިސެމްބަރުގެ ނިޔަލަށް ކުޅުދުއްފުށީ ޓްރެފިކް ޕޮލިސް ޔުނިޓުން ހިންގާ މި އޮޕަރޭޝަނެކެވެ.