ފުރާވަރު ކުދިންނަށާއި ޒުވާނުންނަށް ހާއްސަކޮށް ކުޅުދުއްފުށީގައި ކްލިނިކެއް ހުޅުވައިފި

ފުރާވަރު ކުދިންނާއި ޒުވާނުންނަށް ހާއްސަކޮށްގެން އެޑޮލެސެންޓް އެންޑް ޔޫތް ފްރެންޑްލީ ހެލްތް ސަރވިސަސްގެ ނަމުގައި މިއަދު ކުޅުދުއްފުށީގައި ކްލިނިކެއް ހުޅުވައިފި އެވެ.

މިއަދު ހެނދުނު ކުޅުދުއްފުށީ ޕަބްލިކް ހެލްތަ ޔުނިޓުގައި ކުރިއަށް ދިޔަ މި ހަފްލާ ޝަރަފްވެރިކޮށްދެއްވީ ހެލްތް މިނިސްޓްރީގެ ސްޓޭޓް މިނިސްޓަރ އައިޝަތު ރަމީލާ އެވެ. މީގެ އިތުރުން ޔޫތް މިނިސްޓްރީ އާއި ހެލްތް ޕްރޮޓެކްޝަން ޔުނިޓުގެ ބޭފުޅުން ވެސް ވަނީ މި ރަސްމިއްޔާތުގައި ބައިވެރިވެފަ އެވެ.

މި ކްލިނިކަކީ ފުރާވަރު ކުދިންނާއި ޒުވާނުންނަށް ރައްޓެހި މާހައުލެއްގައި ސިއްހީ ފަރުވާދީ އެކި ބަލިތަކާ ބޭހޭގޮތުން މައުލޫމާތު ދިނުމަށްޓަކައި ގާއިމް ކުރެވިގެންދާ ކުލިނިކެކެވެ. އެގޮތުން ފުރާވަރަށް އަރަމުން އަންނަ ކުދިންނަށް އަންނަ ނަފްސާނީ އަދި ޖިސްމާނީ ބަދަލުތަކާ ބެހޭގޮތުންނާއި ސިއްހަތަށް ސަމާލުކަން ދިނުމުގެ މުހިއްމުކަމާ ބެހޭގޮތުން މި ކްލިނިކުން މައުލޫމާތު ލިބިގެންދާނެ އެވެ.

ކްލިނިކް ހުޅުވާދެއްވުމަށް ފަހު ޝަރަފުވެރި މެހެމާނާ އައިޝަތު ރަމީލާ ދެއްވި ވާހަކަފުޅުގައި މިފަދަ ކްލިނިކެއް ހުޅުވިގެން ދިއުމަކީ ރަށަށް ވަރަށް ބޮޑު ޝަރަފެއްކަމަށާއި މިއީ ފުރާވަރު ކުދިންނަށާއި ޒުވާނުންނަށް ހުޅުވިގެންދިޔަ ވަރަށް ރަނގަޅު ފުރުސަތެއް ކަމަށެވެ. އަދި މި ކްލިނިކްގެ މަގުސަދަކީ ފުރާވަރު ކުދިންނަށް އެކުދިންނާ ރައްޓެހި މާހައުލެއްގައި ސިއްހީ ހިދުމަތް ފޯރުކޮށްދިނުން ކަމަށް ވެސް އައިޝަތު ރަމީލާ ވިދާޅުވި އެވެ.

އެގޮތުން މި ކުލިނިކްގެ އަމާޒަކަށް ވާނީ ފުރާވަރަށް އަރަމުން އަންނަ ކުދިންގެ ސިއްހަތަށާއި އުޅުމަށް އަންނަ ބަދަލުތަކާއި ބެހޭގޮތުން މައުލޫމާތު ފޯރުކޮށްދީ މުސްތަގުބަލުގައި ރަނގަޅު ސިއްހަތެއްގައި ހުރުމަށް އަށަގަންނުވަންވީ އާދަތަކާއި ގެންގުޅެންވީ އުސޫލުތަކާ ބޭގޮތުން މައުލޫމާތު ފޯރުކޮށްދެއްވުން ކަމަށް ވެސް އައިޝަތު ރަމީލާ ވިދާޅުވި އެވެ.

މި ކުލިނިކްގައި ފަރުވާ ދެއްވުމަށް ހަމަޖެހިފައިވަނީ އެކަމަށް ތަމްރީން ކުރިވިފައިވާ ބޭފުޅުން ކަމަށް ޕަބްލިކް ހެލްތުން މައުލޫމާތުދެ އެވެ.

ކްލިނިކް ހުޅުވިފައި ހުންނާނީ ކޮންމެ ބުދަދުވަހެއްގެ ހަވީރު 4 ން 6 ށެވެ.

[yass cats=156]