17 އަހަރުގެ އަންހެން ކުއްޖަކާ ބަދުއަހުލާގީ އަމަލު ހިންގި 2 މީހަކު ކުޅުދުއްފުށިން ހައްޔަރުކޮށްފި

17 އަހަރުގެ އަންހެން ކުއްޖަކާ ބަދުއަހުލާގީ އަމަލު ހިންގި ކަމުގެ ތުހުމަތުގައި ކުޅުދުއްފުށިން 2 މީހަކު ފުލުހުންގެ ބެލުމުގެ ދަށަށް ގެންގޮސްފި އެވެ.

މި ނޫހަށް މައުލޫމާތު ލިބިފައިވާ ގޮތުން މި މައްސަލާގައި ހައްޔަރުކޮށްފައިވަނީ ކުޅުދުއްފުށީ ކަރަންކާގެ އަހުމަދު އާދަމް އާއި މަލްމަލްގެ މުހައްމަދު އާދަމް (ގަލްބެ) އެވެ.

ފުލުހުން ބުނީ މި މައްސަލާގައި ފުލުހުންގެ ބެލުމުގެ ދަށަށް ގެނެސްފައި ވަނީ 26 އަހަރުގެ ދިވެހި ދެ ފިރިހެނުން ކަމަށެވެ.

މި ދެމީހުން ފުލުހުންގެ ބެލުމުގެ ދަށަށް ގެނެސްފައި ވަނީ މި ޑިސެމްބަރު މަހުގެ 7 ވަނަ ދުވަހު 01:50 ހާއިރު މި ކުއްޖާ ގޮވައިގެން ކުޅުދުއްފުށީ ގެއެއްގެ ކޮޓަރީގައި ތިއްބަ ކަމަށް ފުލުހުން މައުލޫމާތުދެ އެވެ.

މި ނޫހަށް އެނގިފައިވާ ގޮތުން އެ އަންހެން ކުއްޖައަކީ އެ ދެމީހުންނާ ލޯބީގެ ގޮތުން ގުޅިގެން އުޅޭ ކުއްޖެކެވެ. އަދި މި އަމަލު ހިންގާފައިވަނީ އެ އަންހެން ކުއްޖާގެ ގަބޫލުގައި ކަމަށްވެސް މި ނޫހަށް އެނގިފައިވެ އެވެ.

މި މައްސަލާގައި އެދެމީހުން ފުލުހުންގެ ބެލުމުގެ ދަށަށް ގެނެސް ކުޑަކަމުދާތަކެތި ތަހުލީލުކުރިއިރު މަސްތުވާތަކެއްޗަށް ޕްޒިޓިވްވެފައިވާ ކަމަށްވެސް ފުލުހުން ބުނެ އެވެ.

މި މައްސަލާގައި ފުލުހުންގެ ބެލުމުގެ ދަށަށް ގެނެސްފައިވާ ދެމީހުންގެ ބަންދާމެދު ގޮތެއް ނިންމުމަށްޓަކައި ހދ ނޮޅިވަރަންފަރު މެޖިސްޓްރޭޓް ކޯޓަށް ހާޒިރުކުރުމުން ވަނީ މިނިސްޓްރީ އޮފް ހޯމްއެފެއަރޒްއިން ކަނޑައަޅާތަނެއްގައި ބަންދުގައި ބަހައްޓައިގެން ތަހުގީގް ކުރިއަށް ގެންދިޔުމަށް 15 ދުވަހުގެ މުއްދަތެއް ދީފަ އެވެ.

ފުލުހުން މައުލޫމާތުދޭ ގޮތުގައި މި މައްސަލައާ ގުޅިގެން ފުލުހުންގެ ބެލުމުގެ ދަށަށް ގެނެސްފައިވާ ދެ މީހުންނަކީ މަސްތުވާތަކެއްޗާއި ވައްކަމާއި މާރާމާރީގެ އިތުރުން އަމުރަށް ނުކިމަންތެރިވުމުގެ މައްސަލަތަކުގެ ރެކޯޑު އޮންނަ މީހުން ކަމަށެވެ.

މި މައްސަލަ ކުޅުދުއްފުށީ ޕޮލިސް ސްޓޭޝަނުން ދަނީ ތަހުގީގު ކުރަމުންނެވެ.