ކުޅުދުއްފުށީގެ ބޮޑު ބަޔަކުން ކަރަންޓު ކެނޑިއްޖެ

ކުޅުދުއްފުށީގެ ބޮޑު ބަޔަކުން ކަރަންޓު ކެނޑިއްޖެ އެވެ.

ކުޅުދުއްފުށީގެ ބަޔަކުން ކަރަންޓްގެ ހިދުމަތް މެދުކެނޑިފައި ވަނީ މިރޭ 8:30 ހާއިރު އެވެ. ކަރަންޓް ކެނޑިފައިވަނީ ގުލާބީމަގާއި ނިކަގަސްމަގާ ދެމެދުގައި އަމީނީމަގުގެ އިރުމަތިން ހުރި ގެތަކުންނެވެ.

މިކަމާ ގުޅޭގޮތުން ކުޅުދުއްފުށީ އޮންލައިންއަށް މައުލޫމާތު ދެއްވަމުން ފެނަކަ ކޯޕަރޭޝަންގެ ރީޖަނަލް މެނޭޖަރ އާދަމް މުހައްމަދު ވިދާޅުވީ، ކަރަންޓްގެ ހިދުމަތް މެދުކެނޑުމަށް ދިމާވާ ސަބްސްޓޭޝަނެއްގައި މައްސަލައެއް ދިމާވެގެން ކަމަށެވެ. އަދި މައްސަލަ ހައްލު ކުރުމަށް ޓެކްނީޝަނުން މަސައްކަތް ކުރަމުން އަންނަ ކަމަށާއި ނަމަވެސް ކަރަންޓްގެ ހިދުމަތް ފޯރުކޮށްދެވޭނެ ވަކި ވަގުތެއް ދަންނަވަން ދަތި ކަމަށެވެ.

ސަބްސްޓޭޝަނުގައި ދިމާވި މައްސަލައިގެ އިތުރު ތަފްސީލެއް އާދަމް ހާމައެއް ނުކުރައްވަ އެވެ.

މައުލޫމާތު ލިބިފައިވާ ގޮތުގައި ކަރަންޓް ކެނޑިފައިވަނީ ކުޅުދުއްފުށީ، ލައްގާހުރާ ކައިރީގައި ހުންނަ ސަބްސްޓޭޝަން (2 ނަންބަރު ސަބްސްޓޭޝަން) ގެ ޓްރާންސްފޯމަރެއް ހަލާކުވެގެންނެވެ. އަދި މިހާރު ވަގުތީ ޓްރާންސްފޯމަރެއް ބެހެއްޓުމުގެ މަސައްކަތް ދަނީ ކުރަމުންނެވެ.