އުއްތަމަ ފަނޑިޔާރުކަމަށް އަބްދުﷲ ސައީދު އައްޔަންކުރައްވައިފި

ދިވެހިރާއްޖޭގެ އުއްތަމަ ފަނޑިޔާރުގެ މަގާމަށް ސްޕްރީމް ކޯޓުގެ ފަނޑިޔާރު އަބްދުﷲ ސައީދު އައްޔަން ކުރައްވައިފި އެވެ.

ރައީސް އޮފީހުން ބުނިގޮތުގައި އެ އޮފީހުގައި ރޭ ބޭއްވި ރަސްމިއްޔާތެއްގައި އުއްތަމަ ފަނޑިޔާރު ވަނީ މަގާމުގެ ހުވާ ކުރައްވާފައެވެ. އެ މަނިކުފާނަށް ހުވާލައިދެއްވީ ސްޕްރީމް ކޯޓުގެ ފަނޑިޔާރު އަލީ ހަމީދެވެ.

ކޯޓުތަކާބެހޭ ގާނޫނަށް ގެނެވުނު އިސްލާހާ ގުޅިގެން، ކުރިން އުއްތަމަ ފަނޑިޔާރު ކަމުގެ މަގާމުގައި ހުންނެވި އަހުމަދު ފާއިޒް ހުސައިން އާއި ފަނޑިޔާރު މުއުތަސިމް އަދުނާނު އިއްޔެ ވަނީ ފަނޑިޔާރުކަމުގެ މަގާމުން ވަކި ކުރައްވާފައެވެ.

އުއްތަމަ ފަނޑިޔާރު ކަމަށް އަބްދުﷲ ސައީދު އައްޔަންކުރައްވާފައިވަނީ ރައްޔިތުންގެ މަޖިލީހުގައި ރޭ ބޭއްވި ކުއްލި ޖަލްސާގައި އެ މަގާމަށް އަބްދުﷲ ސައީދު އައްޔަންކުރައްވަން ފެންނަކަމަށް މަޖިލީހުން ފާސްކުރެއްވުމާ ގުޅިގެންނެވެ.

އަބްދުﷲ ސައީދަކީ ދިވެހިރާއްޖޭގެ އިންތިގާލީ ސްޕްރީމް ކޯޓުގެ އުއްތަމަ ފަނޑިޔާރުގެ މަސްއޫލިއްޔަތު އަދާކުރެއްވި ފަނޑިޔާރެވެ.