ދުވާލަކު އާފަލެއް ކައިގެން ދުޅަހެޔޮ ސިއްހަތެއްގައި ހުރެވިދާނެ

ކޮންމެ ދުވަހަކު އާފަލެއްކައިގެން ބަލިތަކުން ދުރުވުމަށް މަގުފަހިވާނަމަ މިއީ ކުރުން މާ އުގަނގޫ ކަމަކަށް ނުވާނެ އެވެ. އާފަލަކީ ރާއްޖެއިން ފަސޭހައިން ލިބެން ހުންނަ މޭވާ އެކެވެ. އަދި ހަށިގަނޑަށް އެހާފައިދާވެސް ހުރި މޭވާ އެކެވެ.

އާފަލަކީ ގިނަ އަދަދަކަށް ފައިބާ، ވިޓަމިން މިނެރަލް، ޕްރޮޓީން އަދި ތަފާތު އެކި ނިއުޓްރިއެންޓްސް ހިމެނޭ މޭވާ އެކެވެ. އެގޮތުން ހަށިގަނޑުގައި ކޮލެސްޓްރޯލް އަދި ހަކުރު މައްޗަށް ދާނަމަ ކެއުމުގައި އާފަލު ހިމެނުމަކީ ފައިދާ ހުރި ކަމެކެވެ.

އާފަލުގައި ހިމެނޭ މިނަރަލްތަކުގެ ތެރޭފައި ޒިންކް، ކޮޕާރ، މެގްނީސިއަމް، ޕޮޓޭސިއަމް، އަދި އަޔަން ހިމެނެ އެވެ. މިއީ ކޮންމެ ދުވަހެއްގައިވެސް އަހަރެންމެންގެ ހަށިގަނޑަށް ބޭނުންވާނެ މާއްދާތަކެކެވެ.

ގަވައިދުން ޖިމަށްދާ ބޭފުޅުންނަށާއި ޑައިޓުގައި އުޅުއްވާ ބޭފުޅުންނަށް އާފަލަކީ ރަގަޅު ޑައިޓެކެވެ. ސަބަބަކީ ލޭގައި ހިމެނޭ ސަރުބީތައް ނައްތާލާ ރަނގަޅަށް ލޭ ދައުރު ކުރުމަށް އެހީތެރިވެ ދެއެވެ. އެގޮތުން ކޮންމެ ދުވަހަކު އާފަލެއް ކެއުމުގައި ހިމަނައިފި ނަމަ ސްޓްރޯކު ޖެހުމުން މީހާ ދުރުކޮށްދެ އެވެ.

އާފަލަކީ ހަންގަނޑަށް ވެސް ރަގަޅު މޭވާ އެކެވެ. އާފަލުގައި ހިމެނޭ ވިޓަމިން ސީ ހަންގަނޑުގައި ހިމެނޭ ސެލްތައް ހަލާކުވުން ދުރުކޮށްދިނުމަށާއި ހަމުގެ ކެންސަރު ޖެހުމުން ދުރުކޮށްދެ އެވެ. އަދި އާފަލުގައި ހިމެނޭ އެންޓި އޮކްސިޓެންޑްގެ ސަބަބުން ހަންގަނޑު ދޮންކޮށް އޮމާންކަން ގެނެސްދިނުމަށް އެހީތެރިވެދެ އެވެ. ހާއްސަކޮށް ފެހި އާފަލަކީ ހަމުގެ މައްސަލަތަކަށް ހައްލުކުރުމަށް ރަގަޅު މޭވާ އެކެވެ. ސަބަބަކީ ފެހި އާފަލުގައި ގިނައިން ވިޓަމިން އޭ، ބީ އަދި ސީ ހިމެނެތީ އެވެ. ހާއްސަކޮށް މޫނުގައި ބިހި ނަގާ ނުވަތަ ލޯ ކައިރި ކަޅުވާ ބޭފުޅުން ގަވައިދުން ކެއުމުގައި ފެހި އާފަލު ހިމަނާނަމަ މިފަދަ މައްސަލަތައް ހައްލުވެގެންދާނެ އެވެ.

އޭގެ އިތުރުން އާފަލަކީ އިސްތަށިގަނޑަށް ވެސް ފައިދާ ހުރި މޭވާ އެކެވެ. ބޮލުން ހަންފޮޅުން ހުއްޓުވުމަށާއި އިސްތަށި ފޭބުން ފަދަކަންކަމަށް އާފަލަކީ ރަގަނޅު މޭވާ އެކެވެ.

އާފަލަކީ ތައިރޮޑްގެ މައްސަލަތަކާއި އެސްތުމާ އަދި ޑައިބެޓިކްސް ހުންނަ ބޭފުޅުންނަށް ވެސް ރަގަޅު މޭވާއެކެވެ. އަދި އާފަލުގައި ހިމެނޭ ފައިބާގެ ސަބަބުން ގޮހޮރުގެ މައްސަލަތައް ޖެހުމުން ދުރުކޮށްދެ އެވެ.

މީގެ އިތުރުން ވެސް އާފަލުގައި އެތަކެއް ފައިދާ ތަކެއް ހިމެނެ އެވެ. ކޮންމެ ދުވަހަކު އެންމެ އާފަލެއް ކެއުމުގައި ހިމަނައިފި ނަމަ ހަށިގަނޑަށް ގިނަގުނަ ފައިދާތަކެއް ލިބޭއިރު ކޮންމެ ދުވަހަކު އާފަލެއް ކެއުމަށް އާދަކުރުން ކިހިނެއްވާނެތޯ އެވެ.