ރެޑްކްރެސެންޓް ހދ ގޮފީގެ ބެސްޓް ވޮލެންޓިއާގެ އެވޯޑް އިބްރާހިމް ޒިޔާދަށް ލިބިއްޖެ

ރެޑްކްރެސެންޓް ހދ ގޮފީގެ ބެސްޓް ވޮލެންޓިއާގެ އެވޯޑް ކުޅުދުއްފުށީ ފެންފިޔާޒުގެ އިބްރާހިމް ޒިޔާދު ހޯދައިފި އެވެ.

ދަރުމަވެރީންގެ ދުވަސް ފާހަގަކުރުމަށް ދިވެހި ރެޑްކްރެސެންޓުން ރޭ ބޭއްވި ހާއްސަ ހަފުލާގައި އިބްރާހިމް ޒިޔާދަށް މި އެވޯޑް ހަވާލުކޮށްދެއްވީ ރާއްޖޭގެ ރައީސުލް ޖުމްހޫރިއްޔާ އަބްދު ﷲ ޔާމީނެވެ.

ދިވެހި ރެޑްކްރެސެންޓްގެ ކޮމިއުނިކޭޝަން އޮފިސަރ ރިފްހާން މި ނޫހަށް މައުލޫމާތު ދެއްވަމުން ވިދާޅުވީ ކުޅުދުއްފުއްޓާއި ނޮޅިވަރަމް ހިމެނޭ ހދ ގޮފީން މި އަހަރު 723 ގަޑިއިރާއި 44 މިނެޓްގެ ވޮލެންޓިއާ މަސައްކަތް ކޮށްފައިވާ ކަމަށާއި އޭގެތެރެއިން 200 ގަޑިއިރާއި 55 މިނެޓް ޒިޔާދު ވަނީ ވޮލެންޓްރީކަން ކޮށްދީފަ ކަމަށެވެ.

މި އަހަރު ތެރޭގައި ޒިޔާދު ވަނީ ރެޑް ކްރެސެންޓުން ހިންގި 12 އިވެންޓެއްގައި ހަރަކާތްތެރިވެފަ އެވެ.

“ކުޅުދުއްފުށި އޮންލައިންނާ” ވާހަކަ ދައްކަމުން ޒިޔާދު ބުނީ ވޮލެންޓިއާކޮށް މަސައްކަތް ކުރުމަކީ އަބަދުވެސްކުރާ ހިތްވާ ކަމެއް ކަމަށާއި އުއްމީދުނުކޮށް ހުއްޓާ މިފަދަ އެވޯޑެއް ލިބުމުން ވަރަށް އުފާކުރާ ކަމަށެވެ. އަދި ކުރިއަށްއޮތްތާގަވެސް ރެޑްކްރެސެންޓަށާއި ގައުމަށް ހިދުމަތްކޮށްދިނުމުގައި ދެމިހުންނާނެ ކަމަށް ޒިޔާދު ބުންޏެވެ.

މި އަހަރުގެ ސެޕްޓެމްބަރު މަހުގެ ނިޔަލަށް ދިވެހި ރެޑްކްރެސެންޓް ހދ ބްރާންޗްގައި 213 ވުރެ ގިނަ ދަރުމަވެރިން ރެޖިސްޓަރވެފައިވެ އެވެ. އަދި 70އަށްވުރެ ގިނަ މެމްބަރުން މި ބްރާންޗްގައި ހަރަކާތްތެރިވެ އެވެ.

ރޭ ހަފުލާގައި ރައީސް ޔާމީން ވަނީ ބެސްޓް ވޮލެންޓިއާގެ އެވޯޑް ހާސިލުކުރި ހުރިހާ ފަރާތްތަކަކަށް އެވޯޑް ހަވާލުކޮށްފަ އެވެ.