މޫސުން ގޯސްވުމުގެ ސަބަބުން އުތުރުގެ ފެރީ ވިއުގައަށް ބުރޫއަރަފި

މޫސުން ގޯސްވެ ކަނޑުގަދަވުމުގެ ސަބަބުން ހއ، ހދ އަދި ށ އަތޮޅުގެ ފެރީ ވިއުގައަށް ބުރޫއަރައިފި އެވެ.

ކުޅުދުއްފުށީ އޮންލައިނަށް މައުލޫމާތު ދެއްވަމުން ހދ އަތޮޅު ކައުންސިލްގެ މީޑިޔާ ކޯޑިނޭޓަރ އަބުދުލް މުހައިމިން ވިދާޅުވީ ރޭގައި މަޝްވަރާކުރުމަށްފަހު މިއަދު ޝެޑިއުލްކޮށްފައިވާ ހުރިހާ ފެރީއެއް ކެންސަލް ކޮށްފައިވާނެ ކަމަށާއި މޫސުން ރަނގަޅުނަމަ ފެރީތައް އޮންނަ ގޮތަށް ރޭގައި ނިންމެވި ކަމަށެވެ.

މުހައިމިން ވިދާޅުވެފައިވަނީ މިއަދު ކުޅުދުއްފުއްޓަށް އެއްވެސް ފެރީއެއް ދަތުރުކޮށްފައިނުވާ ކަމަށާއި އުތުރުގެ 3 އަތޮޅުގެ ހުރިހާ ފެރީއެއްވެސް މިއަދު ކެންސަލްކޮށްފައިވާ ކަމަށެވެ.

މިއަދު ކެންސަލްކުރި ދަތުރުތަކުގެ ބަދަލުގައި މާދަމާ ފެރީ ޝެޑިއުލްކުރާނެ ކަމާމެދު މިރޭ ގޮތެއް ނިންމާނެ ކަމަށް މުހައިމިން ވިދާޅުވި އެވެ.