އެމްޑީޕީގެ ދިއްދޫ ދާއިރާގެ އޮފީސް އިމާރާތްކުރުމަށް ބޭނުންވާ 1200 އަށް ވުރެ ގިނަ ގައު އަޅައިފި

އެމްޑީޕީގެ ދިއްދޫ ދާއިރާގެ ދާއިމީ އޮފީސް އިމާރާތް ކުރުމަށް ބޭނުންވާ  1200 އަށް ވުރެ ގިނަ ގައު، އެ ދާއިރާގެ މެމްބަރުންގެ އެހީތެރިކަމާއެކު އަޅައިފި އެވެ.

މި މަހުގެ 5 ވަނަ ދުވަހު އެމްޑީޕީގެ ރައީސް މުހައްމަދު ނަޝީދު ބިންގާ އަޅުއްވާ ދެއްވި އެމްޑީޕީ ދިއްދޫ ދާއިރާގެ އޮފީހަކީ، ދިއްދޫގެ އެމްޑީޕީގެ މެމްބަރުންނާ ހެޔޮ އެދޭ ފަރާތްތަކުގެ އެހީގައި އެޅޭ އިމާރާތެއް ކަމުގައި ދާއިރާގެ ސެކްރެޓަރީ ޖެނެރަލް އަލީ ހާޝިމް މި ނޫހަށް މައުލޫމާތު ދެއްވަމުން ވިދާޅުވި އެވެ.

މި މަސައްކަތުގައި އެމްޑީޕީގެ ފިރިހެން މެމްބަރުންނާ ބައިވެރިވުމަށްޓަކައި ދިއްދޫގެ އެމްޑީޕީ އަންހެނުންގެ ރޫހުގެ ފަރާތުން ވަނީ ދަފި ނަގައި ހަވީރުގެ ސައި ތައްޔާރުކޮށް ގިނަ ހަރަކާތްތަކެއް ހިންގާފަ އެެވެ.

އެމްޑީޕީގެ ދިއްދޫ ދާއިރާ މި އަހަރުގެ ނޮވެމްބަރު މަހުގެ 1 ވަނަ ދުވަހު އަލުން ހަރަކާތްތެރިވާން ފަށާފައިވާއިރު، މި ދާއިރާއަކީ ރާއްޖޭގެ އެންމެ ހަރަކާތްތެރި އަދި އެންމެ މުއްސަނދި ދާއިރާ ކަމުގައި ހަދަން ބޭނުންވާ ކަމަށް ވެސް އަލީ ހާޝިމް ވިދާޅުވ ިއެވެ.

އަދި ރައީސް ނަޝީދާއި އެމްޑީޕީގެ ޓީމް ދިއްދުއަށް ކުރެއްވި ދަތުރުފުޅާ ގުޅިގެން ޕާޓީގެ މެމްބަރުންނަށް އާ ހިތްވަރަކާއި ޖޯޝެއް ލިބިގެން ގޮސްފައިވާ ކަމަށާއި ދިއްދޫގެ ގިނަ އަދަދެއްގެ ޒުވާނުންނާއި އަންހެނުން މިހާރު ޕާޓީއަށް ސޮއިކުރަމުންދާ ކަމަށްވެސް އޭނާ ވިދާޅުވި އެވެ.

ދިއްދޫ ދާއިރާ އަލުން ހަރަކާތްތެރި ވާން ފަށާފައިވާއިރު، ރޭޑިއޯ ސްޓޭޝަނެއް ހިންގުމަށާއި، ހަފްތާ ނޫހެއް ނެރުމަށް ވެސް ދާއިރާގެ ފަރާތުން މަސައްކަތް ފަށާފައިވާ ކަމަށާއި ކޮންމެ މަހަކު ވެސް ދާއިރާގެ ފަރާތުން ގިނަ ހަރަކާތްތަކެއް ހިންގައި، ސިޔާސީ ގޮތުން ދިއްދޫގައި އެންމެ ހަރަކާތްތެރި ޕާޓީއަކީ އެމްޑީޕީ ކަމުގައި ހެދުމަށް މަސައްކަތްކުރާނެ ކަމަށްވެސް އޭނާ ވިދާޅުވ ިއެވެ.

އަދި މި މަސައްކަތުގައި އެމްޑީޕީގެ މެމްބަރުން ދެއްވާ އެއްބާރުލެއްވުމަށް ޕާޓީގެ ފަރާތުން ނިހާޔަތަށް ޝުކުރުއަދާކުރާ ކަމަށްވެސް އޭނާ ވިދާޅުވި އެވެ.