އަތޮޅުގެ ކަންކަން ނިންމުމުގެ ބާރު އަތޮޅުގެ ދަރިންނަން ލިބެންޖެހޭ: އަތޮޅު ކައުންސިލަރު ލަތީފް

އަތޮޅު ހިންގައި އަދި އަތޮޅެއްގެ ކަންކަން ނިންމުމުގެ ބާރު އެ އަތޮޅެއް ނިސްބަތްވާ ދަރިންނަން ލިބެންޖެހޭނެ ކަމަށް ހދ އަތޮޅު ކައުންސިލުގެ ކުޅުދުއްފުށީ ދެކުނު ދާއިރާގެ ކައުންސިލަރު އަބުދުއް ލަތީފް ހަސަން ވިދާޅުވެއްޖެ އެވެ.

ރާއްޖޭގެ 71 ވަނަ ގައުމީ ދުވަހުގެ މުނާސަބަތުގައި ގައުމީ ދިދަ ނެގުމަށް މިއަދު ހެނދުނު އަތޮޅު ކައުންސިލު އިދާރާގައި ބޭއްވި ރަސްމިއްޔާތުގައި ވާހަކަ ދައްކަވަމުން އެމްޑީޕީއަށް ނިސްބަތްވާ އަބުދުއްލަތީފް ވިދާޅުވީ މަދު އަހަރު ތަކެއް ކުރިން އެއަތޮޅެއްގެ ކަންކަން ނިންމުގެ ބާރު އެއަތޮޅެއްގެ ކަމުވޮށިވެގެންވާ މީހުންނަށް އޮތް ކަމަށެވެ.

“އަޅުގަނޑުމެން މިއަދު ބޭނުންވަނީ އަޅުގަނޑުމެންގެ އަމާޒުތަކަށް ދަތުރުކުރަން. މީގެ މަދު އަހަރުތަކެއް ކުރިން މި (ހދ) އަތޮޅުގެ ކަންކަން ނިމުމުގެ ބާރު (އަތޮޅުގެ މީހުންނަށް އޮތް). ނަމަވެސް މިއަދު އަޅުގަނޑުމެން މަގާމުގެ ދަހިވެތިކަމާ ލިބޭ ހަދިޔާތަކުގެ ސަބަބުން ބައެއް ފަހަރު ވަކާލާތު ކުރެވެމުން އެބަދޭ އެބާރުތައް މާދުރު ރަށެއްގައި އިންނަ ބޭފުޅެއްގެ އަތްމައްޗަށް ލުމަށް. މިކަންކަން އަޅުގަނޑުމެން ބަދަލުކުރަން އެބަޖެހޭ “ލަތީފް ވިދާޅުވި އެވެ.

އޭނާ ވިދާޅުވީ މިއަދު މަސައްކަތް ކުރަންވީ ލިބިފައިވާ ބާރުތަކާއި މަގާމުތައް ބޭނުން އެކި ފަރާތްތަކަށް މިސްރާބު ބަދަލުކުރުމުގެ ބަދަލުގައި ކަނޑައެޅިފައިވާ ރަނގަޅު މިސްރާބުގައި ތިބުމަށް ކަމަށެވެ.

ދިދަ ނެގުމުގެ ރަސްމިއްޔާތުގައި އަތޮޅު ކައުންސިލް ކުޅުދުއްފުށީ ދެކުނު ދާއިރާގެ ކައުންސިލަރު އަބުދުލް ލަތީފް ވާހަކަ ދައްކަވަނީ–ފޮޓޯ: ވާހިދު

އުތީމު ތަކުރުފާނުގެ ޒިކުރާ އައުކުރައްވަމުން ލަތީފް ވިދާޅުވީ އެބޭފުޅުން ގައުމު މިނިވަން ތަނެއްގެ ގޮތުގައި ދެމެހެއްޓުމަށް ކުރެއްވި ޖިހާދުން އިބުރަތް ހާސިލުކުރަންޖެހޭ ކަމަށެވެ. އަދި މިއަދު އަޅުގަނޑުމެންނަން ދިމާވެފައިވާ ގޮންޖެހުންތަކުން އަރައިގަތުމަށްޓަކައި ކުރެވެން ހުރީ ކޮންކަމެއްތޯ ބަލައި، އެކަންކަން ކުރުމަށް ކާބަފައިން ފަދައިން އަޒުމާއި ސާބިތުކަމާ އެކު ކުރިއަށްދާން ޖެހޭ ކަމަށެވެ.

ގައުމަށްޓަކައި ކާބަފައިން ހިޔާރުކުރެއްވީ އަމިއްލަ މުއްސަނދިކަމާއި ޖީބު ބޮޑު ކުރުމެއް ނޫންކަމަށް ލަތީފް ފާހަގަކުރެއްވި އެވެ.

މިރަސްމިއްޔާތުގައި ކުޅުދުއްފުށީ މުއައްސަސާތަކުގެ ވެރިންނާއި މުވައްޒަފުން ބައިވެރިވި އެވެ.

[yass cats=158]