އަންނަ އަހަރުގެ ތެރޭގައި ނޮޅިވަރަންފަރުގައި ނަރުދަމާ ނިޒާމުގެ ގާއިމު ކުރުމަށް ވަނީ ހަމަޖެހިފައި: އެންވަޔަރމެންޓް މިނިސްޓްރީ

ހދ ނޮޅިވަރަންފަރުގައި އަންނަ އަހަރުގެ ތެރޭގައި ނަރުދަމާ ނިޒާމު ގާއިމުކުރުމަށް ހަމަޖެހިފައިވާ ކަމަށް އެންވަޔަރމެންޓް މިނިސްޓްރީން ވިދާޅުވެއްޖެ އެވެ.

“ކުޅުދުއްފުށި އޮންލައިނަ”ށް މައުލޫމާތު ދެއްވަމުން އެންވަޔަރމެންޓް މިނިސްޓްރީގެ ސްޓޭޓް މިނިސްޓަރ އަބްދުލް މަތީން މުހައްމަދު ވިދާޅުވީ ނޮޅިވަރަންފަރުގައި ގާއިމުކުރާ ނަރުދަމާގެ ނިޒާމުގެ މަސައްކަތަށް ބޭނުންވާ ފައިސާ އިސްލާމިކް ޑިވެލޮޕްމެންޓް ބޭންކުން (އައިޑީބީ) މިހާރު ލިބިފައިވާ ކަމަށެވެ.

އޭގެ އިތުރުން އެރަށުގައި ގާއިމުކުރާ ނަރުދަމާ ނިޒާމް ޑިޒައިން ކުރާނެ ފަރާތެއް ހޯދުމަށް އިއުލާންކޮށް އެކަމަށް ޝައުގުވެރިވާ ފަރާތްތަކަށް ޕްރޮޕޯސަލް ހުށަހެޅުމުގެ ފުރުސަތު ވާނީ މިހާރު ހުޅުވާލާފައި ކަމަށް ވެސް މަތީން ވިދާޅުވި އެވެ.

އެގޮތުން ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް ހަމަޖެހިފައިވަނީ އަންނަ ޖެނުއަރީ މަހު 8 ގަ އެވެ.

މަތީން ވިދާޅުވީ ހުށަހަޅާ ޕްރޮޕޯސަލްތަކަށް ބެލުމަށްފަހު މަސައްކަތް ކުރިއަށްދާގޮތް ބަލަހައްޓައި، ކޮންޓްރެކްޓަރ ޑޮކިއުމްންޓް ބަލަހައްޓާނެ ފަރާތެއް ހަމަޖެެެއްސުމަށްފަހު ނަރުދަމާ ނިޒާމުގެ އަމަލީ މަސައްކަތް ކުރާނެ ފަރާތެއް ހޯދުމަށް އިއުލާން ކުރާނެ ކަމަށެވެ.

މި ޕްރޮޖެކްޓަކީ ނޮޅިވަރަންފަރުގެ އިތުރުން 4 ރަށަކަށް ހާއްސަ ކުރެވިގެން 20 މިލިއަން ޑޮލަރުގެ ބަޖެޓެއްގެ ދަށުން ކުރިއަށްދާ މަޝްރޫއެކެވެ.

ދާދި ފަހުން ނޮޅިވަރަންފަރަށް ކުރި ވިއްސާރާގައި އެރަށުގެ މަގުތަކުގައި ފެންބޮޑުވެ، ޖަންގްޝަން ތަކުން ނަޖިސް ވަނީ ބޭރުވެފަ އެވެ. އަދި ޖަންގްޝަންތައް ހިއްކުމުގެ މަސައްކަތް ކޮށްފައިވަނީ ފުލުހުންނާއި ސިފައިންނެވެ.