ދެ އަހަރު ވަންދެން އަހަރީ ރިޕޯޓާއި ހިސާބު ހުށަނާޅާ ޖަމިއްޔާތަކަށް 2 ދުވަސް އިތުރު ކޮށްދީފި

ވިދިވިދިގެން ދެ އަހަރު ވަންދެން އަހަރީ ރިޕޯޓާއި އަހަރީ ހިސާބު ހުށަނާޅާ ޖަމިއްޔާތަކަށް އިތުރު ދެ ދުވަސް ހޯމް މިނިސްޓްރީން އަނެއްކާވެސް ދީފި އެވެ.

މައުލޫމާތު ހުށަނާޅާ ޖަމިއްޔާތަކާއި މުއްދަތު ހަމަވުމުން ވެސް ހިންގާ ކޮމިޓީގެ އިންތިހާބު ނުބާއްވާ ޖަމިއްޔާތަކަށް އެކަންތައްތައް ކުރުމަށް މިދިޔަ ޑިސެމްބަރ މަހުގެ ނިޔަލަށް މިދިޔަ އަހަރުގެ އޯގަސްޓް މަހު ފަހުކޮޅު ވަނީ ފުރުސަތު ދީފަ އެވެ.

އެ މުއްދަތު މިދިޔަ ހަފުތާގެ ބުދަ ދުވަހަށް ހަމަވެފައިވީ ނަމަވެސް ހޯމް މިނިސްޓްރީން މައުލޫމާތު ދޭގޮތުގައި އެންމެ ފަހު ވަގުތު ވެސް ޖަމިއްޔާތަކުން ތަކެތި ހުށަހަޅަމުންދާތީ މިއަދާއި މާދަމާ ވެސް ތަކެތި ބަލައިގަންނަމުން އަންނަ ކަމަށާއި އޭގެ ފަހުން އެފުރުސަތު ބަންދު ވެގެން ދާނެ ކަމަށެވެ.

ހޯމް މިނިސްޓްރީން ކުރިން ކޮށްފައިވާ އިއުލާނުގައިވާ ގޮތުން މީގެ ކުރިން ފުރުސަތު ދިން ނަމަވެސް އެ ފުރުސަތުގެ ބޭނުން ނުހިފައި ލިޔެކިޔުންތައް ހުށަނާޅާ ޖަމިއްޔާތަކަށް އެ ފުރުސަތު ނުދޭނެ ކަމަށާއި ފުރިހަމަ ކުރަންޖެހޭ ކަންތައްތައް ފުރިހަމަކުރުމަށް ފަހު 1،500ރ. ގެ ޖޫރިމަނާއަކާ އެކު ހުށަހެޅުމުން ބަލައިގަންނާނެ ކަމަށެވެ.

އޭގެއިތުރުން އެ މުއްދަތުގެ ތެރޭގައި ހިންގާ ކޮމިޓީ އާއި އަހަރީ ރިޕޯޓާއި އަހަރީ ހިސާބު ހުށަނާޅާ ކްލަބު ޖަމިއްޔާތުގެ ނަން ޖަމިއްޔާތުގެ ދަފްތަރުން އުނިކުރާނެ ކަމަށް ވެސް ކުރިން ކޮށްފައިވާ އިއުލާނުގައި ބުނެފައިވެ އެވެ.

ކުޅުދުއްފުށީގައި ވެސް ރަޖިސްޓްރީ ކޮށްފައިވާ ގިނަ ޖަމިއްޔާތަކެއް އޮވެއެވެ. ނަމަވެސް މީގެތެރެއިން ހަރަކާތްތެރިވަނީ މަދު ޖަމިއްޔާއެކެވެ.