ވިލާ ކޮލެޖުން މިއަހަރު ފަށާ ކޯސްތަކަށް ރަޖިސްޓަރީ ކުރަން ފަށައިފި

ވިލާ ކޮލެޖުން މިއަހަރު އަލަށް ފަށާ ކޯސްތަކުން ޖާގަ ލިބުނު ފަރާތްތައް އެކޯސްތަކުގައި ރަސްމީގޮތުން ބައިވެރިވުމަށް ރަޖިސްޓަރީ ކުރުމުގެ ކަންކަން މިއަދު ފަށައިފި އެވެ.

މި ޖެނުއަރީ މަހު އެކޮލެޖުން ފަށާ ކޯސްތަކަށް ފޯމު ފުރައި އެ ކޯސްތަކުން ޖާގަ ލިބުނު ފަރާތްތަކުން ރަޖިސްޓަރީ ކުރުމުގެ ކަންތައްތައް މިއަދު، މާދަމާ އަދި ބުދަ ދުވަހުގެ ނިޔަލަށް ކުރިއަށް ދާނެ ކަމަށް ވިލާ ކޮލެޖުން މައުލޫމާތު ދެ އެވެ.

އެގޮތުން މިއަދު ރަޖިސްޓަރީ ކުރުމަށް ހަމަޖެހިފައިވަނީ އަލަށް ފަށާ ކޯސްތަކުގެ ދަރިވަރުންނެވެ. އަދި 6 ވަނަ ދުވަހާއި 7 ވަނަ ދުވަހު ރަޖިސްޓަރީ ކުރުމަށް ހަމަޖެހިފައިވަނީ މިހާރުވެސް އެކިއެކި ކޯސްތަކުގައި ކިޔަވަމުންގެންދާ ދަރިވަރުންނެވެ.

ރަޖިސްޓަރީ ކުރުމަށް އަންނަ އިރު ކޯހަށް ހޮވިފައިވާ ކަމުގެ ލިޔުން ގެނައުމަށް ވިލާ ކޮލެޖުން އިލްތިމާސް ކުރެއެވެ.

7 ޖެނުއަރީގައި ރަޖިސްޓަރީ ކުރުމުގެ މަސައްކަތްތައް ނިމުމާއެކު އަލަށް ކޯސްތަކަށް ވަންނަ ދަރިވަރުންގެ އޮރިއެންޓޭޝަން ޕްރޮގްރާމުތައް ފެށޭނެ ކަމަށް ވެސް ވިލާ ކޮލެޖުން މައުލޫމާތު ދެ އެވެ. މި ޕްރޮގްރާމްގެ ބޭނުމަކީ ކޯހުގައި ކިޔަވަމުން ދާއިރު ދަރިވަރުންނަށް ތައުލީމީ ކަންކަމާބެހޭގޮތުން ކޮންމެހެން އެނގެންޖެހޭ މުހިންމު މައުލޫމާތު ދިނުމާއި އެކި ކަންކަމަށް ކަނޑައަޅާފައިވާ އުސޫލުތަކާއި ގަވައިދުތައް ދަރިވަރުންނަށް ހާމަކޮށް ދިނުމެވެ.

މިފެށޭ ސެމެސްޓަރގައި ވިލާ ކޮލެޖްގައި ކިޔަވައިދޭން ފެށުމަށް ހަމަޖެހިފައިވަނީ 11 ޖެނުއަރީ 2015 ވާ އާދީއްތަ ދުވަހުގައެވެ.