ކަސްޓަމާ ކެއަރއަށް އަހުލުވެރި ކުރުމުގެ ޕްރޮގުރާމެއް ކުޅުދުއްފުށީގައި ހިންގައިފި

ސަކްސަސް ފެކްޓަރީ އާއި ކުޅުދުއްފުށީ ޕޮލިސް ސްޓޭޝަން ގުޅިގެން މިމަހުގެ 4 އަދި 5 ވަނަ ދުވަހުގެ ނިޔަލަށް ކަސްޓަމަރުންނާ މެދު އަމަލުތައް ބަހައްޓަންވީ ގޮތާ ބެހޭގޮތުން މައުލޫމާތު ދިނުމުގެ ޕްރޮގުރާމެއް ހިންގައިފި އެވެ.

ހދ. އަތޮޅު ތައުލީމީ މަރުކަޒުގައި ހިންގި މި ޕްރޮގުރާމުގައި ކުޅުދުއްފުށީ ރީޖަނަލް ހޮސްޕިޓަލުގެ 11 ބޭފުޅަކާއި ޖަލާލުއްދީން ސްކޫލުގެ 3 ބޭފުޅެއްގެ އިތުރުން ހދ. އޭއީސީގެ 3 ބޭފުޅެއް އަދި ޕޮލިސް ސްޓޭޝަނުގެ 3 ބޭފުޅަކު ބައިވެރިވި އެވެ.

ޖުމުލަ 21 ބައިވެރިންނާއެކު ހިންގި މި ޕްރޮގުރާމުގައި މައުލޫމާތު ދީފައިވަނީ ސަކްސަސް ފެކްޓަރީގެ ފަރާތުން މި ޕްރޮގުރާމް ނަންގަވައި ދެއްވުމަށް ވަޑައިގެން ހުންނެވި ޕޮލިސް ސާޖަންޓު އަހުމަދު އަނީސް އެވެ. އޭނާ ވިދާޅުވީ މި ޕްރޮގުރާމުގެ ސަބަބުން ބަދަލުތަކެއް އަންނަން ޖެހޭނެ ކަމަށާއި ކިޔަވައި ދިން ތަކެތީގެ ބޭނުން މަސައްކަތު މާހައުލުގައި ހިފާނެކަމަށް އުންމީދު ކުރާ ކަމަށެވެ.

ޕްރޮގުރާމު ނިންމުމުގެ ރަސްމިއްޔާތުގައި ޝަރަފުވެރި މެހެމާނު، ޖަލާލުއްދީން ސްކޫލުގެ ޕްރިންސިޕަލް މަހުދީ ޝާހިދު ދެއްކެވި ވާހަކަފުޅުގައި ކަސްޓަމަރ ރިލޭޝަން އަކީ ވަޒީފާ އަދާކުރާ ކޮންމެ ތަނަކަށް ވެސް ވަރަށް މުހިންމު ޕްރޮގުރާމެއް ކަމަށާއި ކަސްޓަމާ ކެއަރ އަކީ އަޅުގަނޑުމެންގެ މެހެމާނަކަށް އޯގާތެރިކަމާއި ހިތްހެޔޮކަމާއެކީ ވާހަކަ ދައްކާ އޭނާ އެއައި ކަމެއް ހިތްހެޔޮކަމާއެކީ ކޮށްދިނުން ކަމަށް ވިދާޅުވި އެވެ. އަދި މީގެ އިތުރުން ކަސްޓަމަރ ވަދެގެން އައިސް ކައުންޓަރާ ހަމައަށް އައިސްފިނަމަ އެމީހަކަށް ސަމާލުކަން ދީ އެކަން އެމީހާއަށް އެގެން ޖެހޭނެ ކަމަށާއި އެމީހާ ނިމިގެން ދާން ޖެހޭނީ ވަރަށް އުފަލާ އެކު އެއްވެސް ހިތްހަމަ ޖެހުމެއް ނެތި ކަމަށް އޭނާ ވިދާޅުވި އެވެ.

މިރަސްމިއްޔާތުގައި ކުޅުދުއްފުށީ ޕޮލިސް ސްޓޭޝަންގެ އިންޗާޖް އިންސްޕެކްޓަރ އަލީ ރަޝީދާއި ޖަލާލުއްދީން ސްކޫލުގެ ކޮލިފައިޑް ޓީޗަރު ޝަހީދާ އަލީގެ އިތުރުން ރީޖަނަލް ހޮސްޕިޓަލުގެ ލެބޯޓަރީ ޓެކްނޮލޮޖިސްޓް ހަދީޖާ އަލީ ވެސް ބައިވެރިވެ ވަޑައިގެންނެވި އެވެ.