ޖަލާލުއްދީން ސްކޫލްގައި މި އަހަރު “ދަސްވާރު” ޕްރޮގްރާމް ފަށަނީ

ގްރޭޑް ދިހައެއްގައި ކިޔަވާ ކުދިންނަށް ފަންނީ މަސައްކަތް ދަސްކޮށް ދިނުމަށް  ސަރުކާރުން ކުރިއަށް ގެންދާ “ދަސްވާރު” ޕްރޮގްރާމް މި އަހަރު ޖަލާލުއްދީން ސްކޫލްގައި ފެށުމަށް ހަމަޖެހިއްޖެ އެވެ.

ޖަލާލުއްދީން ސްކޫލްގެ ޕްރިންސިޕަލް މަހުދީ ޝާހިދު ވިދާޅުވީ މިފުރުސަތު ހުޅުވާލެވިފައިވަނީ ހަމައެކަނި ގްރޭޑް 10 ގެ ދަރިވަރުންނަށް ކަމަށާއި އެގޮތުން މި އަހަރު މި ޕްރޮގްރާމްގައި 35 ދަރިވަރަކު ބައިވެރިވެފައިވާ ކަމަށެވެ.

ދެ ކުލާހަށް ބަހާލައިގެން ކުރިއަށް ގެންދާ މި ޕްރޮގްރާމުގައި އިލެކްޓްރީޝަން، ފޮޓޯގްރަފީ، މެނޭޖްމެންޓް ފަދަ ދާއިރާއެއް އިހްތިޔާރުކުރުމަށް ދަރިވަރަށް ފުރުސަތު ދީފައިވާނެ ކަމަށާއި އަދި އެ ދަރިވަރަކަށް މަސައްކަތް ކުރާނެތަނެއް ސްކޫލުގެ ފަރާތުން ހަމަޖައްސައި ދީފައިވާނެ ކަމަށްވެސް މަހުދީ ވިދާޅުވި އެވެ.

އެގޮތުން ފެނަކަ ކޯޕަރޭޝަން، ދިރާގު، ކައުންސިލް އިދާރައިގެ އިތުރުން ބައެއް ވޯކްޝޮޕްތަކުގެ އެހީތެރިކަން ލިބިފައިވާ ކަމަށް މަހުދީ ވިދާޅުވި އެވެ.

ދަސްވާރު ޕްރޮގްރާމުގެ ފުރަތަމަ ބުރުގައި އެ ޕްރޮގްރާމު ފުރިހަމަކުރި 86 ކުދިންނަށް މިދިޔަ މަހުގެ ތެރޭގައި ވަނީ ސެޓްފިކެޓް ހަވާލުކޮށްފައެވެ.

ދަސްވާރު ޕްރޮގްރާމަކީ ވަރަށް ކާމިޔާބު ޕްރޮގްރާމެއް ކަމަށް އެޑިޔުކޭޝަން މިނިސްޓްރީން ވަނީ ބުނެފައެވެ.