ޝެއިހް އާދަމް ޝަމީމުގެ ދަރުހެއް ހަނިމާދޫ އާއި އިހަވަންދޫގައި ބާއްވަނީ

ރާއްޖޭގެ މަޝްހޫރު ދީނީ އިލްމްވެރިޔާ ޝެއިހް އާދަމް ޝަމީމްގެ ދަރުހެއް ހދ ހަނިމާދޫ އާއި ހއ އިހަވަންދޫގައި ބާއްވަން ހަމަޖެހިއްޖެ އެވެ.

ކުޅުދުއްފުށީ އޮންލައިނަށް މައުލޫމާތު ދެއްވަމުން ދަރުސް އިންތިޒާމްކުރާ ފަރާތްކަމުގައިވާ އަލް އަސްރުގެ އިވެންޓް އޯގަނައިޒަރ އަހުމަދު އަފްސަލް ވިދާޅުވީ މި ޕްރޮގުރާމަކީ ރައްޔިތުންގެ މެދުގައި ދީނީ ހޭލުންތެރިކަން އިތުރު ކުރުމުގެ މަގުސަދުގައި ބާއްވާ ދަރުސްތަކެއް ކަމަށެވެ.

ދަރުސް ކުރިއަށް ގެންދިއުމަށް އެރަށްރަށުގެ ކައުންސިލުތަކާއި ޖަމްއިއްޔާތަކުން ދެއްވި އެއްބާރުލުން ފާހަގަކޮށް އެފަރާތަކަށް ޝުކުރު ދެންނެވި އެވެ.

އަލް އަސްރުއިން ކުރިއަށްގެންދާ މިދަރުސް ޕްރޮގުރާމްގައި ހަނިމާދޫގައި ދަރުސް ދިނުމަށް ހަމަޖެހިފައިވަނީ “މަރު” މި މައުލޫއަށެވެ.

ހަނިމާދޫގައި ދަރުސް އޮންނާނީ އެރަށު ސްކޫލުގައި މިރޭ 8:30 ގަ އެވެ. ދަރުސް ދެއްވުމަށް ހަމަޖެހިފައި ވަނީ ޝެއިހް އާދަމް ޝަމީމްގެ އިތުރުން ޝެއިހް މޫސާ ޝިފާއު އެވެ.

އިހަވަންދޫގައި ބާއްވާ ދަރުހުގެ މަޢުލޫއަކީ “ފުރުސަތުގެ ބޭނުން ހިފާށޭ” އެވެ. އިހަވަންދޫގައި ސްކޫލުގައި ބާއްވާ މިދަރުސް އޮންނާނީ މާދަމާ ރޭ 8:30 ކަމަށް އަލްއަސްރުއިން ބުނެ އެެވެ. މި ދަރުސް ދެއްވުމަށް ހަމަޖެހިފައިވަނީ ޝެއިހް އާދަމް ޝާމީމް އެވެ.

އަހުމަދު އަފްސަލް ވިދާޅުވީ މިއަހަރު އިތުރު ރަށްތަކެއްގައި ދަރުހާއި އަޤީދާ ވޯކްޝޮޕް އަދި ނަމާދު ކޭމްޕްތައް ކުރިއަށް ގެންދިއުމަށް ހަމަޖެހިފައިވާ ކަމަށެވެ.