ކުޅުދުއްފުށީގައި ހިންގި ގާރީ ކޯސް ނިންމި ދަރިވަރުންނަށް ސެޓްފިކެޓް ހަވާލުކޮށްފި

ގުރުއާނާ ބެހޭ މަރުކަޒާއި ކުޅުދުއްފުށީ ކައުންސިލް ގުޅިގެން ކުޅުދުއްފުށީގައި ހިންގި ގާރީ ކޯސް ލެވެލް 1 ނިންމި ދަރިވަރުންނަށް ސެޓްފިކެޓް ހަވާލުކޮށްފި އެވެ.

މިއަދު ހަވީރު މިކަމަށްޓަކައި ތިލަދެކުނު ސިނަމާގައި ބޭއްވި ހާއްސަ ރަސްމިއްޔާތުގައި ކޯހުގައި ބައިވެރިވި 109 ދަރިވަރުންގެ ތެރެއިން 104 ދަރިވަރުން ވަނީ ކޯސް ފުރިހަމަކޮށް ސެޓްފިކެޓް ހޯދާފަ އެވެ.

މި ރަސްމިޔާތުގެ ސަރަފުވެރި މެހެމާނު ޖަލާލުއްދީން ސްކޫލްގެ ޕްރިންސިޕަލް މަހުދީ ޝާހިދު ވާހަކަފުޅުގައި ވަނީ ޖަލާލުއްދީން ސްކޫލުން އިސްނަގައިގެން ރަށު ފެންވަރުގައި ގުރުއާން މުބާރާތެއް ބޭއްވުމަށް ތައްޔާރުވަމުންދާ ކަމަށް އިއުލާންކޮށްފަ އެވެ. އަދި ގުރުއާން ކިޔެވުމުގެ މުހިންމު ކަމާއި ގުރުއާން ޅަފަތުން ފެށިގެން ހުއްޓުމެއްނެތި ކިޔަވާ ގުރުއާނަށް އަހުލުވެރިވުމަށް މަހުދީ ވަނީ ނަސޭހަތްތެރިވެފަ އެވެ.

ގާރީ ކޯހުގެ ބައިވެރިވި ބައެއް އަންހެން ދަރިވަރުންތަކެއް ފޮޓޯއަށް ހުއްޓިލައިގެން–ފޮޓޯ:ނާޒިމް

ޤުރުއާނާ ބެހޭ މަރުކަޒުން ދެއްވާ ސެޓްފިކެޓާއި ކުޅުދުއްފުށީ ކައުންސިލުން ދެއްވާ އިނާމް ދަސްވެނިވި ދަރިވަރުންނަށް ހަވާލުކޮށްދެއްވީ ކުޅުދުއްފުށީ ކައުންސިލްގެ ނައިބު ރައީސް މުހައްމަދު އައިމަން އާއި ހދ އަތޮޅު ކައުންސިލްގެ މެމްބަރު އަހުމަދު އިބްރާހިމް އާއި އަފީފުއްދީން ސްކޫލްގެ ޕްރިންސިޕަލް އާދަމް މޫސާ އަދި ޖަލާލުއްދީން ސްކޫލްގެ ޕްރިންސިޕަލް މަހުދީ ޝާހިދެވެ.

މި ޖަލްސާގައި ކުޅުދުއްފުށީ ކައުންސިލްގެ ނައިބު ރައީސް މުހައްމަދު އައިމަން ވާހަކަ ދައްކަވަމުން ވަނީ ގާރީ ކޯސް ލެވެލް 2 ކުޅުދުއްފުށީގައި ފެށުމަށް ތައްޔާރުވަމުންދާ ކަމަށް އިއުލާންކޮށްފަ އެވެ. އަދި މި މަހުގެ 27 ގެ ނިޔަލަށް ކޯހުގައި ބައިވެރިވުމަށް އެދޭ ފަރާތްތަކުގެ އެޕްލިކޭޝަން ފޯމް ބަލައިގަތުން ކުޅުދުއްފުށި ކައުންސިލް އިދާރާގައި ކުރިއަށްދާނެ ކަމަށް އައިމަން ވިދާޅުވި އެވެ.

ގާރީ ކޯސް ލެވެލް 1 ގައި ކިޔަވައިދެއްވާފައިވަނީ މުހައްމަދު އާދަމް، ހުރާ އަދި ޝިޔާމާ އިބްރާހިމް، ކަސަބުގެ އެވެ. މި ރަސްމިޔާތުގައި ކޯސް ހިންގުމަށް އެކި ގޮތްގޮތުން އެހީތެރިވެ ދެއްވި ފަރާތްތަކަށްވެސް ވަނީ ހަނދާނި ލިޔުން ދީފަ އެވެ.

މި ކޯހަކީ ކުޅުދުއްފުށީ ކައުންސިލުން އިސްނަގައިގެން ކުޅުދުއްފުށީގައި ހިންގި ފުރަތަމަ ގުރުއާން ދަސްކޮށްދޭ ކޯހެވެ.