ކުޅުދުއްފުށީ ފިހާރައެއްގައި ރޯކޮށްލާފައިހުރި އަލިފާންގަނޑެއް ފުލުހުން ނިއްވާލައިފި

ކުޅުދުއްފުށީ އައިލެންޑް ފްރީޒް ފިހާރާގައި ރޭ ފަތިހު ރޯކޮށްލާފައިހުރި އަލިފާންގަނޑެއް ފުލުހުން ނިއްވާލައިފި އެވެ.

މި ނޫހަށް މައުލޫމާތު ދެއްވަމުން އެ ފިހާރައިގެ ވެރިޔާ ހުސެއިން އަލީ ވިދާޅުވީ އަލިފާން ރޯކޮށްލާފައިވަނީ ފިހާރަ ބޭރުގައި ބަހައްޓާފައިހުރި ކާށި ގޯންޏަކާއި ސަތަރި ގަނޑެއްގައި އަދި ފުޅިމަދު ފޮށިތަކެއްގަ ކަމަށެވެ.

ފިހާރައިގެ އެތެރެއަށް އަލިފާންގެ އަސަރު ކުރުމުގެ ކުރިން ފުލުހުން މި އަލިފާންގަނޑު ނިއްވާލާފައިވާއިރު ހުސެއިން ވިދާޅުވީ މި ހަދިސާގައި އެ ފަރާތަށް 5000 ރުފިޔާގައި ގެއްލުންވެފައިވާ ކަމަށެވެ.

މިހާދިސާގައި ފިހާރައިގެ ބޭރުގައި ޖަހާފައިހުރި މުށިގަނޑުތަކަށާއި ސީލިންގ އަށް ގެއްލުންވެފައިވާއިރު މިއީ ބަޔަކު ގަސްތުގައި ކޮށްފައިވާ އަމަލެއްކަމަށް ބެލެވެ އެވެ

ފިހާރައިގައި އަލިފާން ރޯކޮށްލިކަން އޭނާއަށް އެންގީ ރޭ ފަތިހު 4:20ގައި ފުލުހުން ކަމަށާއި އޭނާ ފިހާރައަށް އައިއިރު ފުލުހުން އަލިފާންގަނޑު ނިއްވާލާފައިވާ ކަމަށް ހުސެއިން ވިދާޅުވި އެވެ.

މި ހާދިސާއާ ބެހޭ ގޮތުން ފުލުހުންގެ ބަހެއް އަދިވަނީ ލިބޭގޮތް ނުވެފަ އެވެ.