ބަނދަރުގެ ބޭނުން ކުރާ ފަރާތްތަކަށް ރައްކާތެރިކަން ހޯދައިދޭން މިއަންނަނީ މަސައްކަތް ކުރަމުން: ކައުންސިލް

ކުޅުދުއްފުށީ ބަނދަރު ބޭނުންކުރާ ފަރާތްތަކުގެ ސަލާމަތަށާއި ރައްކާތެރިކަމަށް ކައުންސިލުން ވަރަށް ބޮޑު ސަމާލުކަމެއްދޭ ކަމަށާއި އެކަމަށް މަސައްކަތްތަކެއް ކުރެވެމުންދާ ކަމަށް ކުޅުދުއްފުށީ ކައުންސިލްގެ ރައީސް އަލީ މުހައްމަދު ވިދާޅުވެއްޖެ އެވެ.

މި ނޫހަށް ދެއްވި ބަސްދީގަތުމެއްގައި އަލީ މުހައްމަދު ވިދާޅުވީ ބޮޑެތި ބޯޓު ފަހަރު ބަނދަރުގެ ސިޑި ކުރިމަތިގައި އަޅާފައި އޮތުމުން ކުދި ދޯނި ފަހަރުން ފައިބާ މީހުންނަށް ދަތިތަކާ ކުރިމަތިވާ ކަމަށާއި އެގޮތަށް ގަވާއިދާ ހިލާފަށް އޮޑިފަހަރު އަޅާ ފަރާތްތަކަށް ތަކުރާރުކޮށް ނަސޭހަތް ދެވިފައިވާ ކަމަށެވެ.

އެހެންނަމަވެސް އެކަމަށް އަދިއެއް ހައްލެއް ލިބިފައިނުވާ ކަމަށާއި ގިނަ ފަރާތްތަކުން ކައުންސިލުންދޭ ނަސޭހަތުގައި ނުހިފާ ކަމަށް އަލީ ވިދާޅުވި އެވެ. އޭނާ ވިދާޅުވީ ކައުންސިލުން އެކުލަވާލާފައިވާ ގަވައިދުގެ ދަށުން ނަސޭހަތްދީފައިވާނެ ކަމަށާއި ނަމަވެސް މިހާތަނަށް އެއްވެސް ފަރާތެއް ޖޫރިމަނާކޮށްފައިނުވާނެ ކަމަށެވެ. އެއީ ޖޫރިމަނާ ކުރުމަކީ “ސޮލިއުޝަނެއް” ކަމަށް ކައުންސިލުން ނުދެކޭތީ ކަމަށް ރައީސް ވިދާޅުވި އެވެ.

ކުޅުދުއްފުށީ ކައުންސިލްގެ ރައީސް އަލީ މުހައްމަދު ވިދާޅުވީ ގަވައިދެއް ހަދާފައި އޮތްނަމަވެސް ގިނަ ފަރާތްތަކުން އެއަށް އަމަލުނުކުރާ ކަމަށާއި ފިޔަވަޅެއް އަޅައިފިނަމަ ކައުންސިލަށްވުރެ ނުލަފާތަނެއް ނޯންނަ ކަމަށެވެ.

ސިޑި ބަރި ކުރިމަތި ބަލައިދިނުމަށް މިހާރު ކައުންސިލުން ފުލުހަށް އަންގާފައިވާނެ ކަމަށް ރައީސް ވިދާޅުވި އެވެ.

އޮޑިފަހަރު ބަނދަރުކުރުމުގައި ދަތިތަކާ ކުރިމަތިވާނެ ކަމަށްވެސް ގަބޫލުކުރާ ކަމަށާއި ނަމަވެސް ގަވައިދަށް ހުރުމަތްތެރިކޮށްހިތުމަށް ރައީސް އެދިލެއްވި އެވެ.

އޭނާ ވިދާޅުވީ ބައެއް ފަރާތްތަކުން އަމިއްލަ ރަށުގެ ފަޅު ވީމާ ބޭނުން ގޮތަކަށް ކަންތައް ކުރަނީ ކަމަށާއި މާލެ ފަޅުގައި އެ ފަރާތްތަކުން ކިތަންމެ ކުޑަތަންކޮޅެއް އޮތް ކަމަށް ވިއަސް ކޮޅަށް ބަނދަރު ކުރަނީ ކަމަށެވެ.

ކުޅުދުއްފުށީ ބަނދަރު ބެލެހެއްޓުމާ ބެހޭ ގޮތުން ކުޅުދުއްފުށީ ކައުންސިލުން އެކުލަވާލާފައިވާ ގަވައިދުގެ 13 ވަނަ މާއްދާގެ (ހ) ގައި ބުނެފައިވަނީ ރަސްމީ ޖެޓީ ނުވަތަ ރަސްމީ ފާލަމުގެ ބޭނުން ހިފުމަށް ދަތިވާގޮތަށް، ފާލަން ނުވަތަ ޖެޓީ ކައިރީގައި އެއްވެސް އުޅަނދެއް އަޅާފައި ބާއްވައިގެން ނުވާނެ ކަމަށެވެ.

އަދި އެގަވާއިދާ ހިލާފުވާ ފަރާތްތަކަށް ނަސޭހަތްދީ އިސްލާހު ނުވެއްޖެ ނަމަ 500 ރުފިޔާ އާއި 5000 ރުފިޔާގެ ދެމެދުގެ އަދަދަކުން ޖޫރިމަނާ ކުރެވޭނެ ކަމަށް ބުނެފައިވެ އެވެ.