ހއ އަތޮޅު ކަނޑުގެ ސަރަހައްދުން ކިނބޫ ފެންނާތީ އެކަމަށް ސަމާލުވުމަށް އަންގައިފި

ހއ އަތޮޅުގެ ބައެއް ރަށްރަށުގެ މޫދު ސަރަހައްދުން ކިނބޫ ފެންނަތީ އެކަމަށް ސަމާލުވުމަށް އެމްއެންޑީއެފްގެ ނޮދަން އޭރިޔާއިން ކައުންސިލުތައް މެދުވެރިކޮށް އަންގައިފި އެެވެެ.

އެމްއެންޑީއެފްގެ މީޑީއާ ކޯޑިނޭޓަރ ” ކުޅުދުއްފުށި އޮންލައިނަށް ” ވިދާޅުވީ ހއ އަތޮޅުގެ ބައެއް ސަރަހައްދުން ކިނބޫ ފެންނަކަމުގެ ރިޕޯޓް ލިބެމުންދާތީ އެ ސަރަހައްދުން ދަތުރު ކުރާ ފަރާތަކަށާއި މޫދަށް އެރި އުޅޭ ފަރާތަކަށް އަދި މަސްވެރިންނަށް އެކަމަށް ސަމާލުވުމަށް އެމްއެންޑީއެފްގެ ނޮދަން އެރީއާއިން ކައުންސިލުތައް މެދުވެރިކޮށް އަންގާފައިވާ ކަމަށެވެ.

އޭނާ ވިދާޅުވީ މިއަދު ހއ ހުވަހަންދޫ ކައިރީން ކިނބުލެއް ފެނިގެން ކުރި ރިޕޯޓަކީ އެހާ “ކަށަވަރު” މައުލޫމާތެއް ކަމަށް ނުބެލެވޭ ކަމަށެވެ.

އޭނާ ވިދާޅުވީ ފިއްލަދޫ ކައިރީން ފެނުނު ކިނބޫ ހިފުމުގެ މަސައްކަތް މިހާރުވެސް ކުރަމުންދާ ކަމަށާއި އެގޮތުން ފަޅު ރަށްރަށުް ކިނބޫ އަރާފައިވާކަމުގެ ނިޝާނެއް ހުރިތޯ ބެލުމަށް އެއަތޮޅުގެ ފަޅުރަށްތަކުގެ ގޮނޑުދޮށްތައް ވެސް ބަލަމުން އަންނަކަމަށް އޭނާ ވިދާޅުވި އެވެ.

ކިނބޫ ފެންނިއްޖެ ނަމަ އެ އެއްޗަށް އެއްވެސް ގޯނާއެއް ނުކޮށް ވީހާވެސް އަވަހަކަށް ސިފައިންނަށް އެގުމަށް އޭނާ އެދިލެއްވި އެވެ.އަދި ކަނޑުގެ ސަރަހައްދު ވެސް ބަލަމުންދާ ކަމަށާއި އަދި ކިނބޫ ހިފިފައިނުވާ ކަމަށް އޭނާ ވިދާޅުވި އެވެ.

މަހަށް ނުކުމެ އުޅުނު ބަޔަކަށް ހއ.ރަސްފުށި ކައިރިން 10 ވަރަކަށް ފޫޓް ކިނބުލެއް ފެނިގެން ސިފައިންނަށް ރިޕޯޓްކޮށްފައިވަނީ މިހުސްވި މަހު 31 ގަ އެވެ. އޭގެ ފަހުން ވެސް އެސަހައްދުން ކިނބޫ ފެނިގެން ރިޕޯޓްކޮށްފައިވާއިރު އެސަރަހައްދުގައި 2 ކިނބޫ އުޅޭކަމަށް ބައެއް ފަރާތަކު ބުނެ އެވެ .