އަމީނީ މަގުގައި ކަފިހި ހުރަހާއި، ދުވެލިމަތަ ހެދުމުގެ މަސައްކަތް މިހާރު ވަނީ އެމްއާރުޑިސީއާ ހަވާލުކޮށްފަ: ކައުންސިލް

ކުޅުދުއްފުށީގައި ތާރު އަޅައިގެން ހަދާފައިވާ އަމީނީ މަގުގައި ކަފިހި ހުރަހާއި، ދުވެލިމަތަ ހަދަން މިހާރު ވާނީ މޯލްޑިވްސް ރޯޑް ޑިވެލްޕޮމެންޓް ކޯޕަރޭޝަން (އެމްއާރުޑީސީ)އާ ހަވާލުކޮށްފައި ކަމަށް ކުޅުދުއްފުށީ ކައުންސިލްގެ މެމްބަރު އިބްރާހިމް ރަޝީދު ވިދާޅުވެއްޖެ އެވެ.

މި ނޫހުން ކުރި ސުވާލަކަށް ޖަވާބު ދެއްވަމުން އިބްރާހިމް ރަޝީދު ވިދާޅުވީ ކައުންސިލާއި ޓްރެފިކް ޕޮލިހުން ގުޅިގެން މިދިޔަ އަހަރުގެ ޖުލައި މަހު އަމީނީ މަގުގައި ކަފިހި ހުރަހާއި ދުވެލި މަތަ ހަދާނެ ތަންތަން ކަނޑައަޅާ ފަހާގަ ޖަހާފައި ކަމަށެވެ. އަދި މަގުގައި ކަފިހި ހުރަހާއި ދުވެލި މަތަ ހެދުމަށް އެމްއާރުޑީސީއާ މިހާރު ހަވާލުކޮށްފައިވާ ކަމަށް އޭނާ ވިދާޅުވި އެވެ.

ނަމަވެސް މިހާތަނަށްވެސް އެ މަސައްކަތް ވަނީ ނުފެށި އެވެ. އިބްރާހިމް ވިދާޅުވީ މަސައްކަތް ނުފެށިވާ ސަބަބެއް ކައުންސިލަށް އަންގާފައިނުވާ ކަމަށާއި ނަމަވެސް އެމްއާރުޑީސީއިން ބުނެފައިވަނީ ބަންޑާރަ މަގުގައި ތާރުއެޅުމުގެ މަސައްކަތް ކުރާއިރު ކަފިހި ހުރަހާއި ދުވެލިމަތަ ހެދުމުގެ މަސައްކަތްވެސް ކުރާނެ ކަމަށެވެ. އަދި އެ މަސައްކަތް ފަށާނެ ތާރީހެއްވެސް އެމްއާރުޑީސީން ކައުންސިލަށް އަންގާފައިނުވާ ކަމަށްވެސް އޭނާ ވިދާޅުވި އެވެ.

ކައުންސިލުން ވަނީ ޓްރެފިކް ފުލުހުންގެ އެހީތެރިކަމާއެކު ކުރިއަށް ގެންދިޔަ އެ މަސައްކަތުގެ ތަފްސީލުތައް އެމްއާރުޑީސީއަށް ފޮނުވާފަ އެވެ.

ކުޅުދުއްފުށީގެ އިތުރު މަގުތަށް ހެދުމަށް އެމްއާރްޑީސީ އާ ހަވާލު ކުރެވިފައި ވީނަމަވެސް މިވަގުތު އިތުރު މަގެއްގެ މަސައްކަތް ކުރިއަށް ނުދާކަން ފާހަގަކޮށްލެވެ އެވެ.

ކުޅުދުއްފުށީ އަމީނީމަގުގެ މަސައްކަތާއި ރަށުގެ އިތުރު މަގުތަށް ރަނގަޅު ފެންވަރަކަށް ހެދުމުގެ މަސައްކަތްވެސް ހަވާލުކޮށްފައިވަނީ އެމްއާރުޑީސީ އަށެވެ.