އައު ގާނޫނު އުގޫބާތަށް ފުލުހުން ހޭލުންތެރިކުރުމަށް ކުރިއަށް ގެންދިޔަ މަސައްކަތު ބައްދަލުވުން ނިންމާލައިފި

އައު ގާނޫނު އުގޫބާތަށް ފުލުހުން ހޭލުންތެރިކުރުމަށް ކުރިއަށް ގެންދިޔަ މަސައްކަތު ބައްދަލުވުން ނިންމާލައިފި އެވެ.

ނޮދަން ޕޮލިސް ޑިވިޝަންގެ އިންވެސްޓިގޭޝަންގެ ފުލުހުންނަށް ހާއްސަކޮށްގެން ކުރިއަށް ގެންދިޔަ މި މަސައްކަތުގެ ބައްދަލުވުން ނިންމާ މިއަދު ހަވީރު ބޭއްވި ހާއްސަ ރަސްމިޔާތެއްގައި ބައިވެރިންނަށް ވަނީ ހަނދާނީ ލިޔުން ހަވާލުކޮށްފަ އެވެ.

ޖުމްލަ 34 އިންވެސްޓިގޭޝަން އޮފިޝަލުން ބައިވެރިވި މި ބައްދަލުވުމުގައި ކިޔަވައިދެއްވާފައިވަނީ ކުރީގެ ޑެޕިއުޓީ ޕްރޮސެކިއުޓަރ ޖެނަރަލް އަދި މިހާރުގެ ޔޫއެންޑީޕީގެ ކޮންސަލްޓެންޓް ހުސެއިން ޝަމީމެވެ.

3 ގެ މުއްދަތަށް ކުރިއަށް ގެންދިޔަ މި މަސައްކަތު ބައްދަލުވުމަކީ ޔޫއެންޑީޕީ އާއި ޕްރޮސެކިއުޓަރ ޖެނަރަލް އޮފީހާއި އެޓާނީ ޖެނަރަލް ގުޅިގެން ކުރިއަށް ގެންދިޔަ ބައްދަލުވުމެކެވެ.

މަސައްކަތު ބައްދަލުވުން ނިންމުމަށް މިއަދު ބޭއްވި ރަސްމިޔާތު ޝަރަފުވެރިކޮށްދީފައިވަނީ ކުޅުދުއްފުށީ މެޖިސްޓްރޭޓް ކޯޓުގެ މެޖިސްޓްރޭޓް އަލީ އާދަމެވެ. މި ރަސްމިޔާތުގައި ހއ.ހދ އަދި ށ އަތޮޅު ޕޮލިސް ސްޓޭޝަނުންގެ ކޮމާންޑަރުނާއި އަޕަރ ނޯތް ޕޮލިސް ޑިވިޝަން ކޮމާންޑަރ އިންސްޕެކްޓަރ އޮފް ޕޮލިސް ނަސްރުﷲ ޖަލީލް ބައިވެރިވި އެވެ.