ކިނބުލެއް ކަމަށް ބެލެވޭ އެއްޗެއް ނޮޅިވަރަމަށް ލައްގައިފި

ހދ ނޮޅިވަރަމް ގޮނޑުދޮށަށް ކިނބުލެއް ކަމަށް ބެލެވޭ އެއްޗެއް ލައްގާފައި އޮތްވާ ފެނިއްޖެ އެވެ.

މި ނޫހަށް މައުލޫމާތު ދެއްވަމުން ނޮޅިވަރަމް ކައުންސިލްގެ ނައިބު ރައީސް އަބުދުﷲ ވިދާޅުވީ އެ ރަށު ދެކުނު ފަރާތަށް ކުނިވެ ސިފަ ގެއްލިފައިވާ އެއްޗެއް ލައްގާފައިވާ ކަމަށާއި އެ ބޮޑަށް ބެލެވެނީ މަރުވެ ކުނިވެފައިވާ ކިނބުލެއް ކަމަށެވެ.

އަބުދުﷲ ވިދާޅުވީ އާންމު ފަރާތަކުން ކައުންސިލަކަށް އެ ލައްގާފައިވާކަން އެންގުމުން ކައުންސިލުން ގޮސް އެތަން ބަލާފައިވާ ކަމަށާއި މިހާރު ކަމާބެހޭ ފަރާތަކަށާއި އަތޮޅު ކައުންސިލަށް އެކަން އެންގުމުގެ މަސައްކަތް ކުރަމުންދާ ކަމަށެވެ.

އިއްޔެ ވަދާ ގޮސް އުޅުނު ބަޔަކަށް ނޮޅިވަރަމްފަރު ކައިރިން ކިނބުލެއް ފެނިގެން ވަނީ ރިޕޯޓްކޮށްފަ އެވެ. އެކަމާ ގުޅިގެން ހދ އަތޮޅުގެ ރައްޔިތުން ކިނބުލަށް ސަމާލުވުމަށް ފުލުހުން ވަނީ އަންގާފަ އެވެ.