ވައިކަރަދޫ ކައުންސިލް ރައީސްގެ ސައިކަލަށް ގެއްލުންދީ، ރަށުން ބައެއް ތަކެތި ހަލާކުކޮށްފި

ހދ ވައިކަރަދޫ ކައުންސިލުގެ ރައީސް އިބުރާހިމް މުހައްމަދުގެ ސައިކަލަށް ބަޔަކު ގެއްލުންތަކެއް ދީފި އެވެ.

” ކުޅުދުއްފުށި އޮންލައިނަށް ” މައުލޫމާތު ދެއްވަމުން އިބުރާހިމް މުހައްމަދު ވިދާޅުވީ ސައިކަލަށް ގެއްލުން ދީފައިވަނީ މިދިޔަ ބުދަ ދުވަހުގެ ދަންވަރުގެ ވަގުތެއްގައި އޭނާގެ ގޭގެ ބޭރުގައި ބަހައްޓާފައި ހުއްޓާކަމަށެވެ.

އޭނާގެ ސައިކަލުގެ މަޑި ކަފާލައި މަޑި ވަނީ އެއްކޮށްހެން ހަލާކު ކޮށްލާފަ އެވެ. އަދި ސައިކަލުގެ އިންޖީނުގެ ބައެއް ހޮޅިތައް ބުރިކޮށްފައިވާއިރު އަޑީ ތެޔޮ ޓޭންކަށް ވަނީ ވެލިއަޅާ ފުރާލައިފަ އެވެ.

ކައުންސިލުގެ ރައީސް އިބުރާހިމް މުހައްމަދު ވިދާޅުވީ އެރޭ އޭނާގެ ސައިކަލުގެ އިތުރުން އެރަށުގެ ފަޅު ތެރޭގައި އަޅާފައި ހުރި ލޯންޗަކާއި ދޯންޏެއްގެ ވައު ބުރިކޮށްލައި ފަޅު ތެރެއަށް ދޫކޮށްލާފައިވާ ކަމަށެވެ. އަދި ގެއެއްގައި ހުރި ބައިސްކަލެއް ހަލާކުކޮށްލައިފައިވާ ކަމަށެވެ.

ކައުންސިލު ރައީސް ސައިކަލުގެ އަޑީ ތެޔޮ ޓޭންކަށް ވެލިއަޅާފަ

ފުލުހުންގެ މީޑީއާ އޮފިޝަލް މިނޫހަށް ވިދާޅުވީ ރަށުތެރޭގައި ހުރި ބައެއް ތަކެއްޗަށް ގެއްލުންދިން މީހަކު ވައިކަރަދޫއިން ހައްޔަރުކޮށްފައިވާ ކަމަށެވެ.

” ކުޅުދުއްފުށީ އޮންލައިނަށް ” އެގިފައިވާ ގޮތުގައި މިމައްސަލައިގަ ހައްޔަރުކޮށްފައިވަނީ އެރަށު އިންޖީނުގޭގެ އެޑްމިން އޮފިޝަލަކަށް ހުންނަ ޗަބޭލީގޭގެ، އަހުމަދު ޝިފާހް އެވެ. ކުރިން މީނާ ހުރީ ވައިކަރަދޫ ފެނަކަ ކޯޕަރޭޝަނުންގެ އެކްޓިން މެނޭޖަރަކަށެވެ. ސިފާހް އަކީ ގާތްގަނޑަކަށް 28 އަހަރުގެ މީހެކެވެ.

މަސްތުވެގެން ހުރެ ތަކެއްޗަށް ގެއްލުން ދިން މީހަކު ވައިކަރަދޫއިން ހައްޔަރުކޮށްފައިވާ ކަމަށާއި ހައްޔަރު ކުރި މީހާގެ ދިރިއުޅޭ ކޮޓަރިން ވެސް މަސްތުވާތަކެތި ފެނިފައިވާ ކަމަށް ފުލުހުން މައުލޫމާތު ދިނެވެ.

މިމައްސަލަ މިހާރު ދަނީ ކުޅުދުއްފުށީ ޕޮލިސް ޓޭޝަނުން ތަހްގީގު ކުރަމުންނެވެ.

ފަޅު ތެރޭގައި އަޅާފަ ހުރި ބައެއް އޮޑި ފަހަރުގެ ވައު ތައް ކަނޑާލާފަ