އެކްސިޑެންޓުގައި އަނިޔާވި ދުވަސްވީ މީހާގެ ހާލު ސީރިއަސް: އާއިލާ

މިދިޔަ އާދިއްތަ ދުވަހު ހެނދުނު ސައިކަލަކުން ޖެހި އަނިޔާވި ކުޅުދުއްފުށީ ދެބުދާރުގޭ، ރުގިއްޔާ އަލީގެ ހާލު ސީރިއަސް ކަމަށް އޭނާގެ އާއިލާއިން ބުނެފި އެވެ.

ރުގިއްޔާ އަލީގެ ގައިގާ ސައިކަލުން ޖެހިފައިވަނީ އޭނާގެ ގޭގެ ކުރިމަތީގައި ހުރި ގެއަށް ވަންނަ ޕޭމެންޓަށް އަރަނިކޮށެވެ. އޭނާ އެކްސިޑެންޓްވީ އަމީނީމަގުން އުތުރުން ދެކުނަށް ބާރު ސްޕީޑްގައި ނުގަވައިދު ފަޅިން ދުއްވާފަ އައި ސައިކަލެއްގައި ޖެހި އެވެ.

އުމުރުން 70 އަށް ވުރެ މަތީގައި އުޅޭ ރުއްގިޔާ އަލީގެ ގައިގާ ސައިކަލުން ޖެހި އެކްސިޑެންޓްވިއިރު ސައިކަލު ދުންވަން އިނީ 18 އަހަރު ނުވާ ކުއްޖެކެވެ.

މި އެކްސިޑެންޓްގައި ރުއްގިޔާއަށް ވަނީ ވަރަށް ބޮޑަށް އަނިޔާވެ ހާލު ސީރިއަސްވެފަ އެވެ. އޭނާގެ ގައިގެ 5 ތަނަކުން ބިންދައިގެން ގޮސްފަވެ އެވެ.

އާއިލާގެ ފަރާތުން ވާހަކަ ދައްކަމުން ރުއްގިއްޔާގެ ދަރިފުޅު ޝަފީގާ ބުނީ މަންމަ ހާލު ވަރަށް ދެރަ ކަމަށެވެ. ޝަފީގާ ބުނީ ރުގިއްޔާގެ ކަނާތު އަތް 3 ތަނުން ބިއްދައިގެން ގޮސްފައިވާއިރު ކަނާތު ފައިގެ ކަށިމަތިން 2 ތަނުން ބިއްދިފައިވާ ކަމަށެވެ.

އަދި ވާއަތު ފައި އުކުޅުވަޅުން ނެއްޓުނުއިރު ވައަތު އަތް ކޮނޑުހުޅުން ވެސް ވަނީ ނެއްޓިފަ ކަމަށް ޝަފީގާ ކިޔައިދިނެވެ.

އާދިއްތަ ދުވަހު ކުޅުދުއްފުށީ ހޮސްޕިޓަލުން ފަރުވާ ދިނުމަށް ފަހު އިތުރު ފަރުވާއަށް ރުގިއްޔާ ވަނީ އެރޭ މާލެ ފޮނުވާލާފަ އެވެ. އެހެންނަމަވެސް އަދި އައިޖީއެމްއެޗުން ރުގިއްޔާއަށް އެކަށީގެންވާ ފަރުވާއެއް ދެވިފައިނުވާ ކަމަށް އާއިލާއިން ބުނެ އެވެ.

ޝަފީގާ ބުނީ ވޯޑުން އެނދެއް ނުލިބިގެން އަދިވެސް ރުގިއްޔާ އޮތީ އަވަސް ފަރުވާދޭ ކޮޓަރީގަ ކަމަށާއި އޮޕަރޭޝަން ކުރެވޭނެ ދުވަހެއް އަދި ނޭނގެ ކަމަށެވެ.