ފައުންޑާސް ޑޭގެ ނަމުގައި ސްކައުޓުންގެ ހަރަކާތްތަކެއް ނޮޅިވަރަމްފަރުގައި ކުރިޔަށް ދަނީ

އުތުރުގައި ގައުމީ ފެންވަރުގައި ފައުންޑާސް ޑޭ ފާހަގަކުރުމުގެ ގޮތުން ނޮޅިވަރަމްފަރުގައި ސްކައުޓުންގެ ހަރަކާތްތަކެއް ކުރިއަށް އެބަދެ އެވެ.

މި ނޫހަށް މައުލޫމާތު ދެއްވަމުން ސްކައުޓް އެސޯސިއޭޝަނުގެ ނޭޝަނަލް ކޮމިޝަނަރ އަޝްރަފް ވަހީދު ވިދާޅުވީ ކޮންމެ އަހަރެއްގެވެސް ފެބްރުއަރީ މަހުގެ 22 ވަނަ ދުވަހު މުޅި ދުނިޔޭގައި ފާހަގަކުރާ ސްކައުޓް “ފައުންޑާސް ޑޭ” ރާއްޖޭގައި ފާހަގަކުރުމުގެ ގޮތުން ސްކައުޓް އެސޯސިއޭޝަށް އޮފް މޯލްޓިވްސް އާއި ސްކައުޓު ގްރޫޕްތަކުން މިއަހަރު ވަނީ ގިނަކަންތަކެށް ކުރުމަށް ނިންމާފައިވާ ކަމަށެވެ.

ސްކައުޓުން ނޮޅިވަރަންފަރުގައި ކުރިއަށްގެންދިޔަ ހަރަކާތަކުގެ ތެރެއިން–ފޮޓޯ:އާބިދާ

މި ގޮތުން ރާއްޖޭގެ އުތުރުގައި މި ދުވަސް ފާހަގަކުރުމުގެ ގޮތުން ނޮޅިވަރަންފަރުގައި “ސްކައުޓް ފައުންޑާސް ޑޭ ޗެލެންޖް 2015” ނަމުގައި ހާއްސަ ހަރަކާތްތަކެއް އިއްޔެ ހެނދުނު ފަށާފައިވާ ކަމަށެވެ. މިހަރަކާތް ކުރިއަށް ގެންދިއުމަށް ހަމަޖެހިފައިވަނީ މިއަދުގެ ނިޔަލަށެވެ.

މި ޗެލެންޖް ފެށުމަށް ބޭއްވި ރަސްމިޔާތުގައި ނޮޅިވަރަމްފަރު ކައުންސިލްގެ ރައީސް ހަސަން ތައުފީގު، މެޖިސްޓްރޭޓަރ އަލީ އަހްމަދު، ސްކައުޓް އެސޯސިއޭޝަންގެ ޗީފް ކޮމިޝްނަރ ހުސެއިން އަބްދުﷲ، ސްކައުޓް އެސޯސިއޭޝަންގެ ކައުންސިލް މެންބަރ ސައިފް އަޒްހަރް، ގިނަ އަދަދެއްގެ ބެލެނިވެރިންނާއި ހެޔޮއެދޭ ފަރާތްތަކުން ވަނީބައިވެރިވެފަ އެވެ.

ސްކައުޓުން ނޮޅިވަރަންފަރުގައި ކުރިއަށްގެންދިޔަ ހަރަކަތަކުގެ ތެރެއިން–ފޮޓޯ:ސްކައުޓް އެސޯސިއޭޝަން

“”ސްކައުޓް ފައުންޑާސް ޑޭ ޗެލެންޖް 2015” ގެ ނަމުގައި ކުރިއަށްދާ ހަރަކާތްތައް ރާވައި އިންތިޒާމްކުރި ނޮޅިވަރަންފަރު ސްކޫލްގެ ޕްރިންސިޕަލް އަދި ގްރޫޕް ސްކައުޓް ލީޑަރ އަލީ އަހްމަދު ވިދާޅުވިގޮތުގައި މި ޗެލެންޖްގައި ރާއްޖޭގެ އުތުރުން 5 ސްކޫލަކާއި އަދި މާލެއިން އަރަބިއްޔާ ސްކޫލް ބައިވެރިވެ އެވެ.

މިހަރަކާތުގައި 185 ސްކައުޓުން، ލީޑަރުނާއި ސްކޫލްގެ ޓީޗަރުން އަދި ހެޔޮއެދޭފަރާތައް ހިމެނޭ ގޮތަށް 32 ފަރާތަކާއި 60 ބެލެނިވެރިން ބައިވެރިވެ އެވެ.

މި ހަރަކާތްތަކުގެ ބޭނުމަކީ މިއަތޮޅުގެ ސްކޫލްތަކުގެ ހުރިހާ ސްކައުޓުން އެއްތަނަކަށް އެއްވެ އެކުދީންގެ ހުނަރުތައް ދައްކާލުމާއި މުޖުތަމައުއަށް އެހީވުމުގެ ގޮތުން އެންމެން ގުޅިގެން ހަރަކާތެއް ހިންގުން ކަމަށް އަލީ އަހްމަދު ވިދާޅުވި އެވެ.

ސްކައުޓުން ނޮޅިވަރަންފަރުގައި ކުރިއަށްގެންދިޔަ ހަރަކަތަކުގެ ތެރެއިން–ފޮޓޯ:ސްކައުޓް އެސޯސިއޭޝަން

މި ޗެލެންޗުގައި ފާހަގަ ކޮށްލެވޭ ހަރަކާތްތަކު ތެރޭގައި މަސް ބޭނުން، ފަންގި ވިއުން، ނާށީގައި ބިސްގަޑު އެޅުން، ވާމަތީ ހިނގުން، ބޮނބީގައި ދޯނި ހެދުން އަދި އަމިއްލަ ރަށްނޫން އެހެންރަށެށްގެ ރަޙހުމަތްތެރިން ހޯދުން ހިމެނޭނެ ކަމަށް އަޝްރަފް ވިދާޅުވި އެވެ.

އަދި މީގެއިތުރުން ފައުންޑާސް ޑޭ އާއި ގުޅޭގޮތުން ރާއްޖޭގެ ދެ ސަރަހައްދެއްގައި ގިނަ ހަރަކާތަކެއް ފާހަގަކުރާގޮތަށް ވަނީ ހަމަޖެހިފަ އެވެ. މިގޮތުން 27 ފެބްރުއަރީ 2015 ގައި މާލޭގައި ހިންގުމަށް ހަމަޖެހިފައިވަނީ މާލެ ތެރެ ސާފުކުރުމުގެ ޕްރޮގްރާމާއި ކުޑަ ކުދިންގެ ހަވީރު ހިމެނޭ ކަމަށް އަޝްރަފް މައުލޫމާތުދިނެވެ. އަދި ތިނަދޫގައި މި ދުވަސް ފެށުމުގެ ގޮތުން ހުރިހާ ސްކައުޓުން ޖަމާއަތުގައި ފަތިސް ނަމާދު ކުރުމަށް ވަނީ ހަމަޖެހިފައިވާއިރު ސާފުކުރުމުގެ ޕްރޮގްރާމަކާއި ފްރެންޑްޝިޕް ސާރކަލްއެށް ބޭވުމަށްވެސް ވަނީ ހަމަޖެހިފައި ކަމަށް އޭނާ ވިދާޅުވި އެވެ.