ނަޝީދު ހައްޔަރުކުރުން ކުށްވެރިކުރަން، އެއީ ސިޔާސީ ދައުވާއެއް: ވައިކަރަދޫ ކައުންސިލް

ރާއްޖޭގެ ކުރީގެ ރައީސުލްޖުމްހޫރިޔާ އަދި އިދިކޮޅު އެމްޑީޕީގެ ރައީސް މުހައްމަދު ނަޝީދު ކުއްލިގޮތަށް ހައްޔަރުކުރުން ވައިކަރަދޫ ކައުންސިލުން އެންމެ ހަރުކަށި އިބާރާތުން ކުށްވެރިކުރާ ކަމަށް އެ ކައުންސިލުން ބުނެފި އެވެ.

ވައިކަރަދޫ ކައުންސިލުން ނެރެފައިވާ ނޫސް ބަޔާނެއްގައި ބުނެފައިވަނީ ޓެރަރިޒަމްގެ ދައުވާއެއްގެ ގޮތުގައި އަލުން ދައުވާ ކުރައްވާ ދައުވާއަށް ކޯޓަށް ހާޒިރުވެ ވަޑައިނުގަންނަވައިފާނެ ކަމަށް ތުހުމަތުކޮށް އެމަނިކުފާނަށް ގާނޫނު އަސާސީން ލިބިދޭންޖެހޭ ހިމާޔަތާއި ރައްކާތެރިކަން ބެލުމެއްނެތި ދިވެހި ގައުމުގެ އަމާން އަމާންކަން ގެއްލޭފަދަ ގޮތަކަށް އެމަނިކުފާނު ހައްޔަރުކުރިކުރުން ވައިކަރަދޫ ކައުންސިލުން އެންމެ ހަރުކަށި އިބާރާތުން ކުށްވެރިކުރާ ކަމަށެވެ.

ގާނޫނު އަސާސީއިން ކަށަވަރުކޮށްދޭ ހަމަހަމަކަމާއި ލިބިދޭންޖެހޭ ހައްގުތައް އެއްވެސް ތަފާތުކުރުމެއްނެތި ކޮންމެ ރައްޔިތަކަށްވެސް ލިބިދިނުމަކީ ދައުލަތުގެ ކޮންމެ މުއައްސަސާއަކަށްވެސް ގާނޫނު އަސާސީގައި ގާނޫނުތަކުން ލާޒިމްކުރާ ކަމަކަށްވާއިރު ރައީސް ނަޝީދުގެ މައްޗަށް ދައުވާކޮށްފައިވަނީ އަދި އެމަނިކުފާނު ހައްޔަރުކޮށްފައިވަނީވެސް ގާނޫނު އަސާސީއާއި ޕްރޮސެކިއުޓަރ ޖެނަރަލްގެ ގާނޫނުގެ ރޫހާ ހިލާފަށްކަން ސާފުކޮށް އެނގެން އޮތުމާއެކު މި ދައުވާއަކީ ސިޔާސީގޮތުން އުފުލާފައިވާ ދައުވާއެއްކަކަމަށް އެ ކައުންސިލުން ދެކޭ ކަމަށް އެ ބަޔާނުގައިވެ އެވެ.

ރައީސް ނަޝީދުގެ މައްޗަށް އުފުލާފައިވާ ދައުވާ އަނބުރާގެންދިއުމަށާއި މިހާރުން މިހާރަށް އެމަނިކުފާނު ދޫކޮށްލެއްވުމަށް ދިވެހި ސަރުކާރާއި ޕްރޮސެކިޔުޓަރ ޖެނަރަލްއަށް ކައުންސިލުން ގޮވާލާ ކަމަށާއި ގާނޫނު އަސާސީއާއި ގާނޫނުތަކުން ދިވެހި ރައްޔިތުންނަށް ލިބިދޭންޖެހޭ ހިމާޔަތާއި ރައްކާތެރިކަން ކަށަވަރުކޮށްދެއްވުމަށާއި ގައުމުގައި އަމަން އަމާންކަން ގާއިމުކޮށްދިނުމަށް ދައުލަތުގެ ވެރިންނަށް އެ ބަޔާނުގައި އިލްތިމާސްކޮށްފައިވެ އެވެ.

ރައީސް ނަޝީދުގެ މައްޗަށް އުފުލާފައިވާ ޖިނާއީ ދައުވާ މިދިޔަ ހަފުތާގެ ހޯމަ ދުވަހު ޕްރޮސެކިއުޓަރ ޖެނަރަލްގެ އޮފީހުން އަނބުރާ ގެންދެވުމަށްފަހު ކުއްލިގޮތަކަށް ޓެރަރިޒަމްގެ ދައުވާ އުފުލާ ރައީސް ނަޝީދު ހައްޔަރުކޮށްފައިވަނީ މިދިޔަ އާދިއްތަ ދުވަހު އެވެ.