ވިލާ ކޮލެޖްގެ އެމް.ބީ.އޭ ކޯހުގެ ސްކޮލަރޝިޕް މަރިޔަމް އަދި ޝަޒިއްޔާ އަށް

ވިލާކޮލެޖުން ކުޅުދުއްފުށީގައި ހިންގާ މާރސްޓަރ އޮފް ބިޒްނަސް އެޑްމިނިސްޓްރޭޝަން(އެމް.ބީ.އޭ) ކޯހުގެ ފުރަތަމަ ބުރުން ހދ އަތޮޅު ކައުންސިލުން ހުޅުވާލި 2 ސްކޮލަޝިޕްގެ ފުރުސަތު ހޯދި ފަރާތަތަކަށް ސްކޮލަޝިޕް ހަވާލުކޮށްފި އެވެ.

މިސްކޮލަރޝިޕް ފުރުސަތަށް އެދި 5 ފަރާތަކުން ހުށައެޅިއިރު ސްކޮލަރޝިޕް ލިބިފައިވަނީ ކުޅުދުއްފުށީ ދަނބުރުއްދޮށުގެ މަރިޔަމް މުޙައްމަދަށާއި، ހދ.ނޮޅިވަރަމް ނިރަލާގެ ޝަޒިއްޔާ މުހައްމަދަށެވެ.

މިދިޔަ ހަފުތާގެ ބުރާސްފަތި ދުވަހު ސްކޮލަޝިޕް ހަވާލުކޮށް ސޮއިކުރުމަށް ބޭއްވި ހަފުލާގައި އެދެފަރާތަށް ސްކޮލަރޝިޕް ޙަވާލުކޮށްދެއްވީ އަތޮޅު ކައުންސިލްގެ ރައީސް އާދަމް ނާސިރެވެ.

މިބައްދަލުވުމުގައި ވާހަކަ ދައްކަވަމުން، އާދަމް ނާސިރު ވިދާޅުވެފައިވަނީ އަތޮޅުގެ ދަރީންނަށް ތަޢުލީމާއި ތަމްރީނުގެ ފުރުސަތު ހޯދުމަށް އަތޮޅު ކައުންސިލުން ގިނަގުނަ މަސައްކަތްތަކެއް ކުރެވެމުންދާ ކަމަށާއި، މި ލިބުނު ސްކޮލަރޝިޕްގެ ބޭނުން ފުރިހަމަގޮތުގައި ހިފުމަށް ދެބޭފުޅުންގެ ހިދުމަތް އަތޮޅަށް ލިބިގެންދާނެ ކަމަށް އުއްމީދު ކުރައްވާ ކަމަށެވެ.

ސްކޮލަރޝިޕްގެ އެއްބަސްވުމުގައިވާ ގޮތުން މިފުރުސަތު ލިބޭ ފަރާތްތައް ކޯސް ފުރިހަމަ ކުރުމުގައި ހިމެނޭ ކަންތައްތަކަށް ހާއްސަ ސަމާލުކަމެއްދީގެން ކޯހުގެ ހުރިހައި ބައިތަކެއް ފުރިހަމަ ކުރުމަށްފަހު ކޯހުގެ ނަތީޖާ ހދ. އަތޮޅު ކައުންސިލަށް ހުށަހަޅަން ޖެހެ އެވެ. އަދި ކޯސް ނިންމުމަށްފަހު މަދުވެގެން 5 އަހަރު ދުވަހު އަތޮޅަށް ހިދުމަތް ކުރަން ޖެހެ އެވެ.

ހދ އަތޮޅުގެ ޒުވާނުންނަށް ތައުލީމާ ތަމްރީނު ހޯދުމުގެ ފުރުސަތުތައް ފަހިކުރުމަށްޓަކައި ހދ އަތޮޅު ކައުންސިލުން ވަނީ ޗައިނާގެ ސަރުކާރަށް ޕްރޮޕޯސަލެއް ހުށައަޅާފައިވާއިރު ރާއްޖޭގެ ގިނަ ކޮލެޖްތަކާއި ގުޅިގެން ސްކޮލަޝިޕްގެ ފުރުސަތުތައް ހޯދުމަށް އެ ކައުންސިލުން ދަނީ މަސައްކަތް ކުރަމުންނެވެ.