ކައުންސިލުން ބަނދަރުގެ ހޮޅިދަނޑިތައް ބަދަލުކޮށްފި

ކުރިން ހުރި ހޮޅިދަނޑިތައް ނަގާ، އައު ހޮޅިދަނޑިތަކެއް ކުޅުދުއްފުށީ ކައުންސިލުން ބަނދަރުގައި ޖަހައިފި އެވެ.

މިމަހު 2 ވަނަ ދުވަހު އޮއިވާލި ކޮންސްޓްރަކްޝަނާ ހަވާލުކޮށްގެން މި މަސައްކަތް އެއްކޮށްނިންމާ ލެވިފައިވަނީ މިދިޔަ އަންގާރަ ދުވަހުކަމަށް ކައުންސިލުން މައުލޫމާތު ދެއެވެ.

1،48،155.50 ރުފިޔާ ކައުންސިލުން ހަރަދުކޮށްގެން ކުޅުދުއްފުށީ އުތުރު ބަނދަރުގައި ޖަހާފައިވަނީ ޑަބަލް އާރމްލައިޓްގެ 15 ހޮޅިދަނޑި އެވެ. ކައުންސިލުން ބުނީ ހޮޅިދަނޑިތައް ގަތުމަށް ކައުންސިލުން 1،21،873.50 ރުފިޔާ ހޭދަކުރިކަމަށެވެ. އަދި ހޮޅިދަނޑިތައް ބަނދަރުގައި ޖެހުމަށް 26،282 ރުފިޔާ ހަރަދުކޮށްފައިވާ ކަމަށް ކައުންސިލުން ބުނެ އެވެ.

ކައުންސިލުން ވިދާޅުވީ ރަށުގެ އެކި ސަރަހައްދުތަކުގައި ހޮޅިދަނޑި ޖެހުމުގެ ވިސްނުން ގެންގުޅޭ ކަމަށާއި އެހެންނަމަވެސް އަދި ވަކި ސަރަހައްދެއް ކަނޑައަޅާފައި ނުވާކަމަށެވެ.