ހއ އަތޮޅު ގުރުއާން މުބާރާތުގައި 11 ރަށަކުން ބައިވެރިވެއްޖެ

ހއ އަތޮޅު ކައުންސިލުން އިންތިޒާމްކުރާ ހއ އަތޮޅު ގުރުއާން މުބާރަތުގައި މިއަހަރު 11 ރަށަކުން ބައިވެރިވެއްޖެ އެވެ.

ކުޅުދުއްފުށީ އޮންލައިނަށް މައުލޫމާތު ދެއްވަމުން އެ ކައުންސިލުގެ ޑިރެކްޓަރ އަބުދުﷲ ޝަފީގު ވިދާޅުވީ ތުރާކުނު، އުލިގަމް އަދި ތަކަންދޫ ފިޔަވާ އަތޮޅުގެ އެހެން ހުރިހާ ރަށަކުން މުބާރާތުގައި ބައިވެރިވެފައިވާ ކަމަށެވެ. އަބުދުﷲ ވިދާޅުވީ މުބާރާތުގައި ބައިވެރިވެފައިވާ ދަރިވަރުންގެ އަދަދު އަދި ނޭނގޭ ކަމަށާއި ދަރިވަރުންގެ ލިސްޓްތައް ކައުންސިލަށް އަދި ލިބިފައިނުވާ ކަމަށެވެ.

މި އަހަރު މިމުބާރާތް ބޭއްވުމަށް ހަމަޖެހިފައިވަނީ މިއަންނަ އޭޕްރިލް މަހު 2 ން 4 ކަށް ހއ ކެލާ ގައެވެ.

މި މުބާރާތުގައި ބައިވެރިވެފައިވާ ރަށްތަކަކީ އަތޮޅުގެ ވެރި ރަށް ދިއްދޫ، ހޯރަފުށި، އިހަވަންދޫ، އުތީމް، ކެލާ، މާރަންދޫ، ބާރަށް، މުރައިދޫ، ފިއްލަދޫ، ވަށަފަރު އަދި މޮޅަދޫ އެވެ.

މި މުބާރާތުގައި ބައިވެރިވާ ދަރިވަރުންގެ ތެރެއިން ގަދަ ފަނަރަ ދަރިވަރުން ހޮވައި އެދަރިވަރުންނަށް ގައުމީ ގުރުއާން މުބާރާތުގައި އަތޮޅު ތަމްސީލުކުރުމުގެ ފުރުސަތު ލިބިގެންދާނެ އެވެ.