މޯލްޑިވިއަންއިން ބެންކޮކަށް ދަތުރުތައް ފަށަނީ

ގައުމީ އެއާލައިން މޯލްޑިވިއަންގެ ދަތުރުތައް ބެންކޮކަށް ޝެޑިއުލްކޮށްފި އެވެ.

އަންނަ ހުކުރު ދުވަހު މޯލްޑިވިއަންގެ ދަތުރުތައް ބެންކޮކަށް ފަށާއިރު ފުރަތަމަ މަސް ދުވަހުގެ ތެރޭގައި ޓިކެޓް އަގަކީ 333 ޑޮލަރެވެ. އެއީ 5134.86 ރުފިޔާ އެވެ.

ދިވެހީންގެ ވިޔަފާރީގެ މަރުކަޒެއްކަމަށްވާ ތައިލެންޑްގެ ވެރިރަށް ބެންކޮކަށް ޝެޑިއުލް ދަތުރިތައް ފެށުމަށް މޯލްޑިވިއަންއިން ނިންމާފައިވާއިރު މާލެއިން ބެންކޮކަށް ކޮންމެ ހަފްތާއެއްގެ ބުދަ ދުވަހާއި ހުކުރު ދުވަހު ދަތުރުކުރުމަށް ވަނީ ނިންމާފައެވެ. އަދި ބެންކޮކުން މާލެއަށް ދަތުރުކުރުމަށް ނިންމާފައިވަނީ ކޮންމެ ހުކުރު ދުވަހަކާއި އާދިއްތަ ދުވަހު އެވެ.

ބެންކޮކް ދަތުރުތަކަށް މޯލްޑިވިއަންއިން ބޭނުން ކުރުމަށް ނިންމާފައިވަނީ އެ އެއާލައިންގެ އެއާބަސް ފުލައިޓުތަކެވެ.

މޯލްޑިވިންގެ ފުލައިޓްތައް އިންޑިޔާގެ ޓްރެވެންޑްރަމް އާއި ޗެންނާއީގެ އިތުރުން ޗައިނާގެ ވޫހަން ސިޓީއަށް ދަނީ ދަތުރުކުރަމުންނެވެ. އެގައުމުތަކަށް ކުރާ ދަތުރުތަކަށް ބޮޑު ތަރުހީބެއް ދަނީ ލިބެމުންނެވެ.