އުތުރުގައި ގާއިމްކުރާ ހައިކޯޓުގެ ގޮފި ކުޅުދުއްފުށީގައި އަޅަނީ

އުތުރުގެ ހައިކޯޓް ގޮފި ކުޅުދުއްފުށީގައި އެޅުމަށް ހަމަޖެހިއްޖެ އެވެ.

ސްްޕްރީމް ކޯޓުން މިދިޔަ ފެބްރުއަރީ މަހު އުތުރާއި ދެކުނަށް ނިސްބަތްވާ ހައިކޯޓްގެ ސަރަހައްދުތައް ކަނޑައަޅާފައި ވާއިރު އުތުރު ސަރަހައްދުގައި އުފައްދާ ހައި ކޯޓްގެ ގޮތްޕަށް ނިސްބަތްވަނީ ހއ، ހދ، ށ، ނ، ރ އަދި ބ. އަތޮޅެވެ.

ސަރަހައްދުތައް ވަކިކުރި ނަމަވެސް، އުތުރުގެ ގޮތްޕާއި ދެކުނުގެ ގޮފި ގާއިމް ކުރާނެ ރަށެއް އެއިރު ކަނޑައަޅުއްވާފަނުވެ އެވެ. އެހެން ނަމަވެސް 2014 ޑިސެމްބަރ 11 ވަނަ ދުވަހު ތަސްދީގް ކުރެއްވި ކޯޓުތަކާ ބެހޭ ގާނޫނަށް ގެނައި އިސްލާހުގައި ބުނެފައިވާ ގޮތުން، އެ ގާނޫނަށް އަމަލު ކުރަން ފަށާތާ 90 ދުވަހުގެ ތެރޭގައި، ހައި ކޯޓްގެ ގޮފިތައް ގާއިމު ކުރާނެ ރަށްތަކާއި ގޮފިތަކަށް ފަނޑިޔާރުން ހަމަޖައްސަންވާނެ ކަމަށް އެގާނޫނުގައި ވެއެވެ.

ހައިކޯޓްގެ އުތުރުގެ ގޮފި ގާއިމް ކުރުމަށް ހަމަޖެހިފައިވަނީ ކުރީގެ ގައުމީ އިދާރާގެ ފުރަތަމަ ފަންގިފިލާގެ ބައެއްގަ އެވެ. މި ގޮފި ގާއިމްކުރުމަށް އެތަނަށް ބައެއް ބަދަލުތައް ގެނައުމަށްޓަކާ އިއުލާން ވެސް ވަނީ ސުޕްރީމް ކޯޓުން ކޮށްފަ އެވެ.

މި އިއުލާނުގައި ވާގޮތުން މި މަސައްކަތް އަމިއްލަ ތަކެތީގައި ކޮށްދެއްވުމަށް އެދޭފަރާތް ތަކުން ކުޅުދުއްފުށީ މެޖިސްޓްރޭޓް ކޯޓަށް 18 މަރޗް 2015 ވާ ބުދަ ދަުވަހު 10:00 އަށް ވަޑައިގެން މައުލޫމާތު ސާފުކުރެއްވުމަށް ފަހު 26 މާރޗް 2015 ވާ ބުރާސްފަތި ދުވަހު 10:00 އަށް އަންދާސީ ހިސާބު ހުށައެޅުވުމަށް އެދިވަޑައިގަންނަވާފައު ވެއެވެ.

އުތުރާއި ދެކުނުގައި ގާއިމުކުރުމަށް ހަމަޖެހިފައިވާ ހައި ކޯޓްގެ ދެ ގޮފިން ބެލުމަށް ހަމަޖެހިފައިވަނީ އެ ސަރަހައްދެއްގެ މެޖިސްޓްރޭޓް ކޯޓުތަކުން ނިންމާ މައްސަލަތަކުގެ އިސްތިއުނާފު ކުރުން އެކަންޏެވެ.