އެމްޑަބްލިއުއެސްސީ: ސާފު ބޯފެން ފޯރުކޮށްދިނުމުގައި 20 އަހަރު

މިއީ ދުނިޔޭގެ ފެނުގެ ދުވަހާ ގުޅިގެން އެމްޑަބްލިއުއެސްސީ އިން ގެނެސްދޭ މެސެޖެކެވެ.

22 މާރިޗު އަކީ ކޮންމެ އަހަރަކުވެސް އެމް.ޑަބްލިއު.އެސް.ސީ.އިން ކުލަގަދަ ގޮތެއްގައި ފާހަގަކުރާ ދުވަހެކެވެ. އިއްޔެއަކީ ދުނިޔޭގެ ފެންވަރުގައި ފާހަގަކުރާ ބައިނަލްއަގްވާމީ ފެނުގެ ދުވަހެވެ.

މިއަހަރުގެ ފެނުގެ ދުވަސް ފާހަގަކުރަމުންދާއިރު އދ އިން 2014 ވަނަ އަހަރަށް ކަނޑައަޅާފައިވާ ފެނުގެ ދުވަހާއި ގުޅޭ ޝިޔާރަކީ “ފެނާއި ދެމެހެއްޓެނިވި ތަރައްގީ” އެވެ. ދެމެހެއްޓެނިވި ގޮތެއްގައި ސާފުބޯފެން އުފައްދާ ގައުމުގެ ތަރައްގީއަށް ހިއްސާ ކުރުމަކީ އެމް.ޑަބްލިއު.އެސް.ސީ.ގެ ވޭތުވެދިޔަ 20 އަހަރު ދުވަހުގެ މަސައްކަތުގެ މައިގަނޑު އަސާސްވެސްމެއެވެ.

އެމް.ޑަބްލިއު.އެސް.ސީ ވުޖޫދަށް އައިސްފައިވަނީ 1995 ތެރޭގައި މާލެއަށް ދިމާވި ބޯފެނުގެ ދަތިކަމަށް ހައްލެއް ގެނައުމުގެ މަގްސަދުގައެވެ. އެ ހިސާބުން ފެށިގެން އެމް.ޑަބްލިއު.އެސް.ސީ.އިން ފަސްނުޖެހި ރައްޔިތުންނާއި ހަމައަށް ސާފުބޯފެން ފޯރުކޮށްދިނުމުގެ މަސައްކަތް ކާމިޔާބު ކަމާއެކީ ވަނީ ކުރިޔަށް ގެންގޮސްފައެވެ. ފެނުގެ ވަސީލަތްތައް މަދު ގައުމަކަށް ވާއިރު ދެމެހެއްޓެނިވި ގޮތެއްގައި ކުންފުނީގެ މަސައްކަތް ފުޅާކޮށް ހިދުމަތް ތަރައްގީކުރުމުގައި މެދުކެނޑުމެއްނެތި ދަނީ މަސައްކަތްތަކެއް ކުރަމުންނެވެ. ތަރައްގީގެ ގިނަ އޮޅިތަކެއް ގިރާކުރަމުން އައިސް މިއަދު އެމް.ޑަބްލިއު.އެސް.ސީ އަކީ މާލެ ހިމެނޭގޮތުން ރާއްޖޭގެ 8 ރަށެއްގައި ރައްކާތެރި ބޯފެނުގެ ހިދުމަތް ފޯރުކޮށްދެމުން އަންނަ ކުންފުންޏެކެވެ.

ކުންފުނިން ފެނުގެ ދާއިރާގައި ހޯދާފައިވާ ތަރައްގީއަށް ނަޒަރު ހިންގާލާއިރު އެމް.ޑަބްލިއު.އެސް.ސީ ގެ 20 އަހަރު ދުވަހުގެ އެންޖިނިއަރިންގ ތަޖުރިބާގެ އެހީގައި މިއަދު މި ކުންފުންޏަކި ރާއްޖޭގައި ފެނުގެ މަޝްރޫއުތައް ހިންގާ އެންމެ ބޮޑުއެއް ކޮންޓްރެކްޓަރެވެ. މިގޮތުން ރަށްރަށުގައި ގާއިމްކުރާ ފެނާއި ނަރުދަމާގެ ނިޒާމުގެ ގިނަ މަޝްރޫއުތަކުގައި އެމް.ޑަބްލިއު.އެސް.ސީ ގެ ބޮޑު ހިއްސާއެއް އޮންނަކަން ފާހަގަކޮށްލެވެއެވެ.

“ރައްކާތެރި ފެން އެންމެންނަށް އަބަދުވެސް” މި ޝިއާރުގެ ދަށުން އެމް.ޑަބްލިއު.އެސް.ސީ އިން 1995 އިން ފެށިގެން ދަނީ ރައްކާތެރި ސާފު ބޯފެން ދެމެހެއްޓެނެވި ގޮތެއްގައި ރައްޔިތުންނަށް ފޯރުކޮށްދެމުންނެވެ. އަދި ރައްކާތެރި ސާފު ފެން ބޭނުންކުރުމުގެ މުހިންމު ކަމާއި ގުޅޭގޮތުން ހޭލުންތެރިކަން އިތުރުކުރުވައި، ނުސާފު ފެން ބޭނުންކުރުމުގެ ނުރައްކަލާއި ނުސާފު ފެން ބޭނުން ނުކުރުމަށް އިލްތިމާސްކުރުމުގެ ގޮތުން ގިނަ ހަރަކާތްތަކެއް ކުންފުނިން ކޮންމެ އަހަރަކުވެސް ކުރިޔަށްގެންދެވެއެވެ.

މިއަހަރުގެ ފެނުގެ ދުވަހުގެ ޝިއާރާ ގުޅޭ ގޮތުން އާންމުން ހޭލުންތެރިކުރުމުގެ ގޮތުން އެމް.ޑަބްލިއު.އެސް.ސީ އިން މިދުވަހާއި ދިމާކޮށް ވަނީ އިންސްޓާގްރާމް ފޮޓޯ މުބާރާތެއް ހުޅުވާލާފައެވެ. މި ފޮޓޯ މުބާރާތުގެ މައިގަނޑު މަގުސަދަކީ މިއަހަރުގެ ފެނުގެ ދުވަހުގެ ޝިއާރާ ގުޅުން ހުރި އެކި އެކި ކަންކަމަށް ރައްޔިތުންގެ ލޯ ހުޅުވުމެވެ. މީގެ ތެރޭގައި، ފެނަކީ ކާނާ، ފެނަކީ ސިއްހަތު، ފެނަކީ ސިނާއަތު، މިފަދަ އެކި ތީމްތަކެއް އދ ގެ ފެނާ ބެހޭ ޖަމްއިއްޔާއިން ވަނީ ކަނޑައަޅާފައެވެ. ވުމާއެކު މި ފޮޓޯ މުބާރާތަކީ ފެނާއި އެއާ ގުޅުން ހުރި ދެމެހެއްޓެނިވި ތަރައްގީއާއި ބެހޭގޮތުން ރައްޔިތުން ހޭލުންތެރިކަން އިތުރުކޮށްދޭނެ ނުވަތަ މިފަދަ ކަންކަމާ ދޭތެރޭގައި ރައްޔިތުންގެ ވިސްނުން ފުޅާކޮށްދޭނެކަމެއް ކަމުގައި ދެކެމެވެ.

އެމް.ޑަބްލިއު.އެސް.ސީ އިން ކަނޑިނޭޅި މަސައްކަތް ކުރަމުން ގެންދަނީ އަދި ކުންފުނީގެ މިޝަންއަކީ ވެސް ރައްކާތެރި ބޯފެނާއި ނަރުދަމާގެ ހިދުމަތުން ރާއްޖޭގެ ދެމެހެއްޓެނިވި ތަރައްގީއަށް ހިއްސާކޮށް ދިވެހި ރައްޔިތުންގެ ދިރިއުޅުން އަދަށްވުރެ ފާގަތިކޮށްދިނުމެވެ.