ހޯރަފުށީގައި މަސައްކަތް ކުރާ ފުލުހުން ތުރާކުނުގައި ހާއްސަ ޕްރޮގްރާމެއް ހިންގައިފި

ބްލޫސް ފޯރ ވީކެންޑް ނަމުގައި ހއ ހޯރަފުށީގައި މަސައްކަތްކުރާ ފުލުހުން އެއަތޮޅު ތުރާކުނުގައި ޕްރޮގްރާމްތަކެއް ހިންގައިފި އެވެ.

މުޖުތަމައުން ކުށްކުރުމުގެ އާދަ ނައްތާލާ ތުރާކުނަކީ އާމާންކަން ގާއިމް ވެފައިވާ ރަށަކަށް ހެދުމަށް ފުލުހުން ކުރިއަށް ގެންދިޔަ މި ޕްރޮގްރާމް ހިންގާފައިވަނީ މި މަހު 19 ން 21 ށެވެ.

މި ޕްރޮގްރާމްގައި ތުރާކުނު މަދަރުސާގެ ބެލެނިވެރިންނަށް ޑޮމެސްޓިކް ވައިލެންސް އަދި ޗައިލްޑް އެބިއުސް އާ ބެހޭގޮތުން މައުލޫމާތު ދެވިފައިވާނެކަމަށް ފުލުހުން މައުލޫމާތު ދެއެވެ.

އޭގެ އިތުރުން އެރަށުގެ ސަރުކާރު މުއައްސަސާތަކުގެ ހުރިހާ މުވައްޒަފުންނަށް ސްވިމިންގ އެންޑް ރެސްކިއު ސެޝަނަކާއި ހއ.ތުރާކުނު މަދަރުސާގެ ގްރޭޑް 01 ން ގްރޭޑް 05 ގެ ދަރިވަރުންނަށް ބުލީ ކުރުމާއި ކުޑަކުދިންކުރާ ކުށްތަކާއި ކުށްތަކަށް ދެވޭ އަދަބުތަކާއި ބެހޭގޮތުން މައުލޫމާތުދިނުމުގެ އިތުރުން ގްރޭޑް 6 ން ގްރޭޑް 10 ގެ ދަރިވަރުންނަށް ބުލީ ކުރުމާއި ކުޑަކުދިންކުރާ ކުށްތަކާއި ކުށްތަކަށް ދެވޭ އަދަބުތަކާއި ބެހޭގޮތުން މައުލޫމާތުދިނުމާއި މަސްތުވާތަކެއްޗަށް ހޭލުންތެރިކުރުމާއި ސްޓަޑީ ސްކިލްސް އާއި ބެހޭގޮތުން މައުލޫމާތުދެވިފައި ވާނެ ކަމަށްވެސް ފުލުހުން މައުލޫމާތު ދެއެވެ.

އަދި ފުލުހުން ވަނީ އެރަށުގައި މީހުން ދިރިއުޅޭ ހުރިހާ ގެޔަކަށް ޒިޔާރަތްކޮށް ފުލުހުންގެ މަސައްކަތްތަކާއި ގުޅޭގޮތުން މައުލޫމާތު ދިނުމުގެ ޕްރޮގްރާމެއްވެސް ހިންގާފަ އެވެ.