ށ. އަތޮޅު ގުރުއާން މުބާރާތުގެ އެއްވަނަ މިލަންދޫ ސްކޫލު ހޯދައިފި

ށ އަތޮޅު ގުރުއާން މުބާރާތުން އެންމެ މޮޅު ސްކޫލަށް ށ މިލަންދޫ ސްކޫލް ހޮވިއްޖެ އެވެ.

މި މަހު 19 ން 21 ށް ގޮއެދޫގައި ކުރިއަށް ގެންދިޔަ މި މުބާރާތުގައި ށ. އަތޮޅު މަދަރުސާ 2 ވަނަ ހޯދާފައިވާއިރު 3 ވަނަ ހޯދާފައިވަނީ ފުނަދޫ ސްކޫލުން ނެވެ.

ބަލައިގެން ކިޔެވުމުގެ ގޮފިން އެއްވަނަ ށ މިލަންދޫ ސްކޫލްގެ މުހައްމަދު ފަރާޒް ހޯދިއިރު ދެވަނަ ހޯދާފައިވަނީ މިލަންދޫ ސްކޫލްގެ ހަސަން އަވްސަމް އެވެ. އަދި ތިން ވަނަ ހޯދާފައިވަނީ ވެސް މިލަންދޫ ސްކޫލްގެ 2 ދަރިވަރުން ކަމަށްވާ ފާތިމަތު ފައިހާ އަދި މަރިޔަމް ޝަހުމާ އަހުމަދެވެ.

ނުބަލާ ކިޔެވުމުގެ ގޮފިން 1 ވަނަ އެއްވެސް ދަރިވަރަކަށް ލިބިފައެއް ނުވެއެވެ. މި ގޮފިން 2 ވަނަ ލިބިފައިވަނީ މިލަންދޫ ސްކޫލްގެ އާއިޝަތު އިސްމާ އެވެ. އަދި 3 ވަނަ ހޯދާފައިވަނީ ހަމަ އެސްކޫލްގެ އާއިޝަތު ތޫލާ އަންވަރު އަދި މުހައްމަދު ރާސިހް ރަމްޒީ އެވެ.

މި މިބާރާތުގައި ދެ ގޮފި އެއްކޮށް ގަދަ 5 ހޮވިފައިވަނީ މިލަންދޫ ސްކޫލްގެ ހަސަން އަވްސަމް، މުހައްމަދު ފަރާޒް، ފާތިމަތު ފައިހާ، މަރްޔަމް ޝަހުމާ އަދި ފުނަދޫ ސްކޫލްގެ އާއިޝަތު އިނާން ރަމްޒީ އެވެ.

މި އަހަރުގެ ގައުމީ މުބާރާތައް ށ އަތޮޅުން ހޮވިފައިވަނީ ބަލައިގެން ކިޔެވުމުގެ ގޮފިން 8 ދަރިވަރަކާއި ނުބަލާ ކިޔެވުމުގެ ގޮފިން 7 ދަރިވަރެކެވެ.

މި އަހަރު މި މުބާރާތުގައި އެ އަތޮޅުގެ 13 ރަށަކުން ޖުމްލަ 151 ދަރިވަރަކު ބައިވެރިވެފައި ވެއެވެ.