އާރތް އަވާރ ޕްރޮމޯޓުކުރުމަށް ކުޅުދުއްފުށީގައި ބައިސިކަލް ބުރެއް ބާއްވައިފި

Mar 28, 2015

މިރޭ ބޭއްވުމަށް ހަމަޖެހިފައިވާ އާރތް އަވާރ ޕްރޮމޯޓު ކުރުމަށް މިއަދު ހަވީރު ކުޅުދުއްފުށީގައި ބައިސިކަލް ބުރެއް ބާއްވައިފި އެވެ.

މި ބައިސިކަލް ބުރު ފެށުނީ 4:30ގައި ޖަލާލުއްދީން ސްކޫލު ކުރިމަތިންނެވެ. ސަރުކާރުގެ މުއައްސަސާތަކުގެ މުވައްޒަފުންނާއި ސްކޫލުތަކުގެ ދަރިވަރުންގެ އިތުރުން ސްކައުޓް އަދި ކެޑޭޓުންނާއި ރެޑް ކްރެސެންޓްގެ ވޮލެންޓިއަރުން އަދި ރަށުގެ ކުދި ބޮޑު ފަރާތްތަކުން ބައިވެރިވި މި ބައިސިކަލް ބުރުގައި މިރޭ އާރތް އަވާރގައި ބައިވެރިވެ އެއްގަޑިއިރުގެ ތެރޭގައި ވީހާވެސް ގިނަ ފަރާތްތަކަކުން ކަރަންޓު ބޭނުންކުރާވަރު މަދުކުރުމަށް އެދިފައިވެ އެވެ.

މީގެ އިތުރުން މި ބައިސިކަލް ބުރުގައި ބައިވެރިންވަނީ ކަރަންޓު ބޭނުންކުރުން މަދުކުރުމަށާއި ތިމާވެށި ހިމާޔަތް ކުރުމަށް ހޭލުންތެރި ކުރުމާއި ބެހޭ ޕޯސްޓަރުތައް ބޭނުން ކޮށްފަ އެވެ.

އާރތް އަވާ ޕްރޮމޯޓްކުރުމަށް މިއަދު ހަވީރު ކުޅުދުއްފުށީގައި ކުރިއަށްގެންދިޔަ ބައިސިކަލް ބުރުގެ ތެރެއިން–ފޮޓޯ:ވާހިދު

މިއަހަރުވެސް ކުޅުދުއްފުށީގައި އާރތް އަވާރ ކުލަގަދަކޮށް ފާހަގަ ކުރަން ނިންމާފައިވާ މި ހަރަކާތް ކުޅުދުއްފުށީގައި އިންތިޒާމްކުރާ ފަރާތްކަމަށްވާ ޖަލާލުއްދީން ސްކޫލްގެ އިކޯ ކުލަބުން އިސްނަގައިގެން މިރޭ ޖަލާލުއްދީން ސްކޫލް ކުރިމަތީގައި ހާއްސަ ޝޯވއެއް ބޭއްވުމަށް ވަނީ ހަމަޖެހިފައެވެ.

މި ޝޯވގައި މިސްގާލްގެ ބޮޑުބެރު ގުރޫޕްގެ ބޮޑުބެރު ހަރަކާތްތަކާއި ޖަލާލުއްދީން ސްކޫލްގެ ދަރިވަރުންގެ އަލިފާނުގެ ކުޅިވަރުތައް ފެނިގެންދާނެއެވެ.

އިކޯ ކުލަބުން ބުނީ އެހެން އަހަރުތަކެކޭވެސް އެއްގޮތަށް މި އަހަރުވެސް ރައްޔިތުންގެ ތަރުހީބު މި ހަރަކާތަށް ލިބޭނެ ކަމަށް އުންމީދުކުރާ ކަމަށާއި ޖަލާލުއްދީން ސްކޫލް ކުރިމަތީ ހިންގާ ހަރަކާތުގައިވެސް ވީހާވެސް ގިނަ ފަރާތްތަކުން ބައިވެރިވުމަށް އެދޭ ކަމަށެވެ.

މިރޭގެ ޝޯވ 8:30 ގައި ފެށުމަށް ހަމަޖެހިފައިވާއިރު ޝޯވ ނިމޭނީ 9:45 ގަ އެވެ.

އަރތް އަވާރ އަކީ ކަރަންޓަށް ކުރާ ހޭދަ ކުޑަކުރުމަށްޓަކާ ރައްޔިތުން ހޭލުންތެރި ކުރުމުގެ ގޮތުން ވޯލްޑް ވައިލްޑް ލައިފް ފަންޑާއި އާރތް އަވާރ ފައުންޑޭޝަނާ ގުޅިގެން ކޮންމެ އަހަރަކު ބާއްވަމުން އަންނަ ހަރަކާތެކެވެ.

މިލިޔުމާއި ގުޅޭ