ސަބްސިޑީ ކަނޑާލުމުން އޭގެ ސީދާ ގެއްލުން ރައްޔިތުންނަށް ފޯރާނެ. އެއީ ރައްޔިތުންނަށް ދެވޭ ދެރައެއް: ކައުންސިލް

އާމްދަނީއަށް ބަދަލެއް ނުގެނެސް ސަބްސިޑީ ކަނޑާލައި އިތުރު ޓެކްސްތައް ތާއަރަފުކުރުމަކީ ރައްޔިތުންނަށް އޭގެ ސީދާ ގެއްލުންލިބި ރައްޔިތުންނަށް ދެވޭ ދެރައެއް ކަމަށް ކުޅުދުއްފުށީ ކައުންސިލްގެ ރައީސް އަލީ މުހައްމަދު ވިދާޅުވެއްޖެއެވެ.

ވިޔަވާފާރީގެ ނަމުގައި ރަޖިސްޓްރީކޮށްފައިވާ ތަންތަނަށް ސަރުކާރުން ދެމުންގެންދާ ކަރަންޓް ސަބްސިޑީ ކަނޑާލުމާ ގުޅިގެން ރައްޔިތުން ކަންބޮޑުވުން ފާޅުކުރަމުންދާ މި ދަނޑިވަޅުގައި ކުޅުދުއްފުށި ކައުންސިލުން ތިބީ ރައްޔިތުންނާ އެކުގައި ކަމަށާއި ރައްޔިތުންނަށް ހެޔޮ މަގެއް ހޯދައިދިނުމަށް ކައުންސިލުން ދެވެން އޮތް އެއްބާރުލުމަކާ އެހީތެރިކަމެއް ދޭނެ ކަމަށް މި ނޫހަށް މައުލޫމާތު ދެއްވަމުން އަލީ މުހައްމަދު ވިދާޅުވިއެވެ.

ރައީސް ވިދާޅުވީ ވިޔަފާރިވެރިންތަކެއް އެކުވެގެން އުފެއްދި ސްޓިއަރިން ކޮމެޓީއާއެކު މިދިޔަ އާދިއްތަ ދުވަހު ބައްދަލުވުމެއް ބޭއްވުނު ކަމަށާއި އެ ބައްދަލުވުމުގައި ވިޔަފާރިވެރިން އެދިފައިވާ ފަދައިން ކައުންސިލްގެ ދެ މެންބަރުން އެ ކޮމެޓީގައި ހިމަނާފައިވާނެ ކަމަށެވެ. އަދި އެ ކޮމެޓިގެ ބައްދަލުވުންތައް ބޭއްވުމަށް ރައްޔިތުންގެ އިމާރާތެއް ކަމަށްވާ “ހިދުމަތް” އިމާރާތުގެ ހޯލު ހިލޭ ދޫކޮށްފައިވާނެ ކަމަށްވެސް އަލީ ވިދާޅުވިއެވެ.

ރައީސް ވިދާޅުވީ ސަބްސިޑީ ކަނޑާލުމުން ވިޔަފާރިވެރިންގެ ވަރަށް ބޮޑު ކަންބޮޑުވުމެއް އެބަހުރި ކަމަށާއި ކުރިން 3000 – 4000 ދެމެދު އުޅޭ ކަރަންޓު ބިލް މިހާރު 12000 އަރައި، ކަރަންޓު ބިލް އަގު ތިން ގުނައަށްވުރެ ބޮޑުވެގެން ގޮސްފައިވާ ކަމަށެވެ. އަދި މިކަމަކީ ހަމައެކަނި ވިޔަފާރިވެރިންނަށް ދިމާވާނެ ދައްޗެއް ނޫން ކަމަށާއި މި ކަމުގެ ދަތި އާންމު ރައްޔިތުންވެސް އުފުލަންޖެހޭނެ ކަމަށެވެ.

އެހެންކަމުން އާންމު ރައްޔިތުން ގުޅިފައިވާ ކަމަކަށްވާތީ ކުޅުދުއްފުށީ ކައުންސިލުން މިކަމަށް އެއްބާރުލުންދޭން ނިންމީ ކަމަށާއި ރައްޔިތުންގެ އަސާސީ ހިދުމަތްތަކަށާއި އިޖުތިމާއީ ކަންކަމުގައި ރައްޔިތުންނަށް ދެވެން އޮތް އެއްބާރުލުމެއް ދޭނެ ކަމުގެ ޔަގީންކަން ރައްޔިތުންނަށް ކައުންސިލްގެ ފަރާތުން އަރުވާ ކަމަށްވެސް ކުޅުދުއްފުށީ ކައުންސިލްގެ ރައީސް ވިދާޅުވިއެވެ.

ސަބްސިޑިގެ މައްސަލައަށް ހައްލެއް ހޯދުމަށް މަސައްކަތް ކުރުމަށް ކުޅުދުއްފުށީ ވިޔަފާރިން އެކުލަވާލާފައިވާ ސްޓިއަރިން ކޮމެޓިގައި ކުޅުދުއްފުށީ ކައުންސިލްގެ ފަރާތުން ތިއްބަވަނީ ކައުންސިލްގެ ރައީސް އަލީ މުހައްމަދާއި ކައުންސިލް މެންބަރު އިބުރާހިމް އައްބާސް އެވެ.