ފެން ތަހުލީލުކުރާ ލެބޯޓަރީގެ ހިދުމަތް އަންނަ މަހު ލިބޭނެ

ކުޅުދުއްފުށީގައި ގާއިމު ކުރުމަށް ހަމަޖެހިފައިވާ ފެން ތަހުލީލު ކުރާ ލެބޯޓަރީގެ ހިދުމަތް އަންނަ މަހު ރައްޔިތުންނަށް ލިބޭނެކަމަށް އަތޮޅު ކައުންސިލުން ބުނެފި އެވެ.

އަތޮޅު ކައުންސިލުގެ މީޑިއާ ކޯޑިނޭޓާރ އަބްދުލް މުހައިމިން ވިދާޅުވީ ލެބޯޓަރީ ގާއިމު ކުރުމަށް ބޭނުންވާ ހުރިހާ އިކުއިޕްމެންޓްތަކެއް ލިބިފައިވާ ކަމަށާއި އެކަމަށް މީހުންވެސް ތަމްރީނު ކުރެވިފައިވާ ކަމަށެވެ.

މުހައިމިން ވިދާޅުވީ ލެބޯޓަރީ ގާއިމު ކުރުމަށް ހަމަޖެހިފައިވަނީ އަތޮޅުގޭގައި ކަމަށެވެ.

ލެބޯޓަރީ ގާއިމު ކުރުމަށް ބޭނުންވާ ބައެއް ތަކެތި ފޮނުވާފައިވަނީ އެންވަޔަރަންމަންޓަލް ޕްރޮޓެކްޝަން އެޖެންސީ (އީޕީއޭ) އިންނެވެ. އަދި އިތުރަށް ބޭނުންވާ މެޝިނަރީ ހޯދައިފައިވަނީ ކައުންސިލުން ހަރަދުކޮށްގެން ނެވެ.

ކުޅުދުއްފުށީގައި ގާއިމް ކުރުމަށް ހަމަޖެހިފައިވާ މި ލެބޯޓަރީގެ އެއްބަސް ވުމުގައި ސޮއި ކޮށްްފައިވަނީ މި އަހަރުގެ ފެބްރުއަރީ 3 ވަނަ ދުވަހު އެވެ.

މި ލެބޯޓަރީ ގާއިމު ކުރެވުމާއެކު ހއ. ހދ އަދި ށ އަތޮޅުގެ ރަށްރަށުގެ ފެން ޓެސްޓް ކުރުމާއި އެންވަޔަރަންމަންޓަލް ޕްރޮޓެކްޝަން އެޖެންސީގެ ފަރާތުން ހަމަޖައްސާ ގޮތެއްގެ މަތީން ފެނުގެ ހާލަތު މޮނިޓަރ ކުރުމާއި ތަހުލީލު ކުރުމަށް ވަނީ ހަމަޖެހިފަ އެވެ.