ސަބްސިޑީ މައްސަލައިގައި ކުރިއަށްދާނެ ގޮތެއް ނިންމުމަށް ކުޅުދުއްފުށީގައި ބޮޑު އެއްވުމެއް ބާއްވަނީ

Apr 4, 2015

ވިޔަފާރީގެ ނަމުގައި ރަޖިސްޓްރީކޮށްފައިވާ ތަންތަނަށް ސަރުކާރުން ދެމުންގެންދިޔަ ކަރަންޓު ސަބްސިޑީ ކަނޑާލުމާއި ގުޅިގެން އުފެދިފައިވާ ކަންބޮޑުވުންތަކަށް ހައްލެއް ހޯދުމަށް ކުރިއަށްދާނެ ގޮތަކާއިމެދު މަޝްވަރާ ކުރުމަށް މިރޭ ކުޅުދުއްފުށީ ރައްޔިތުނާ ކުޅުދުއްފުށީ ވިޔަފާރިވެރިން ބައްދަލުކުރުމަށް ހަމަޖެހިއްޖެ އެވެެ.

މި ނޫހަށް މައުލޫމާތު ދެއްވަމުން ވިޔަފާރިވެރިން ގުޅިގެން އުފައްދާފައިވާ ސްޓެއަރިން ކޮމެޓީގެ މީޑިޔާ ކޯޑިނޭޓަރ އާދަމް ޝަރީފް ވިދާޅުވީ މިރޭ 8:30ގައި ހުކުރު މިސްކިތް ކައިރީގައި ބޮޑު ބައްދަލުމެއް ބޭއްވުމަށް ހަމަޖެހިފައިވާ ކަމަށާއި މި ބައްދަލުވުމަކީ ކުޅުދުއްފުށީ ހުރިހާ ރައްޔިތުންނަށް ދައުވަތު އެރުވިފައިވާ ބައްދަލުވުމެއް ކަމަށެވެ.

އާދަމް ޝަރީފް ވިދާޅުވީ މި ބައްދަލުވުމުގައި ސަބްސިޑީ ކަނޑާލުމުން ވިޔަފާރިވެރިނެކޭ އެއްފަދައިން އާންމު ރައްޔިތުންވެސް އުފުލަންޖެހޭނެ ދަތިތަކާ ބެހޭގޮތުން މައުލޫމާތު ރައްޔިތުންނަށް ފޯރުކޮށްދެވޭނެ ކަމަށާއި ސަބްސިޑީ މައްސަލައިގައި ލިޔުމުން ސަރުކާރަށް ހުށައެޅި ކަންބޮޑުވުންތަކަށް ސަމާލުކަމެއް ލިބިފައިނުވާތީ ދެން އިތުރަށް ކަންތައް ކުރާނެ ގޮތަކާމެދު މަޝްވަރާ ކުރާނެ ކަމަށެވެ.

މިކަމަކީ އެއްވެސް ސިޔާސީ ކުލައެއް ޖެހިފައިވާ ކަމެއް ނޫން ކަމަށް ވިޔަފާރިވެރިން ބުނާއިރު އެ ފަރާތްތަކުން ދަނީ ވިޔަފާރިވެރިންނަށްދޭ ކަރަންޓު ސަބްސިޑީ ކަނޑާލުމުން އޭގެ ދަތި އާންމު ރައްޔިތުންނަށް ފޯރާނެ ކަމަށް ބުނަމުންނެވެ. އަދި އެ ދަތިތަކަށް ހައްލެއް ހޯދައިދިނުމަށް ކުޅުދުއްފުށީ ވިޔަފާރިވެރިން ދަނީ މަސައްކަތްތަކެއް ކުރަމުންނެވެ.

މިލިޔުމާއި ގުޅޭ