މާދަމާ ކުޅުދުއްފުށީގެ ފިހާރަތައް ބަންދުކޮށް، ވިޔަފާރިވެރިން އިހްތިޖާޖު ކުރަނީ

މާދަމާ ކުޅުދުއްފުށީގެ ފިހާރަތަކާއި ރެސްޓޯރެންޓްތައް ބަންދުކޮށް، ވިޔަފާރިވެރިން އިހްތިޖާޖުކުރަން ނިންމައިފި އެވެ.

ވިޔަފާރިތަކަށް ސަރުކާރުން ދެމުންދިޔަ ކަރަންޓ ސަބްސިޑީ ކަނޑާލުމުން އެކަމާ ކަންބޮޑުވުން ފާޅުކޮށް ރައީސް ޔާމީނަށް ކުޅުދުއްފުށީގެ ވިޔަފާރިވެރިން ފޮނުވި ސިޓީއަށް ސަރުކާރުން މިހާތަނަށް އެއްވެސް ޖަވާބެއް ދީފައި ނުވާތީ، ކުޅުދުއްފުށީގެ ރައްޔިތުންގެ ހިޔާލް ހޯދުމަށް މިރޭ ހުކުރު މިސްކިތް ކައިރީގައި ބޭއްވި ބައްދަލުވުމުގައި ވިޔަފާރިވެރިން ނިންމި މިމުމެކެވެ.

މިރޭ ކުޅުދުއްފުށީ ރައްޔިތުންނާއެކު ބޭއްވި ބައްދަލުވުމުގައި ވިޔަފާރިވެރިންގެ ސްޓެއަރިން ކޮމެޓީގެ މެމްބަރު އާދަމް ޝަރީފް ވިދާޅުވީ އެބޭފުޅުން ހަދާފައިވާ ލިސްޓްގައި މިހާރު 87 ވިޔަފާރިވެރިޔަކު މާދަމާ އެފަރާތަކުގެ ވިޔަފާރިތައް ބަންދުކޮށް، އިހްތިޖާޖު ކުރަނާނެ ކަމަށް ސޮއި ކޮށްފައިވާ ކަމަށެވެ.

“މާދަމާ ޕްޓްރޯލް ޝެޑް ހުންނަ ޖެހޭނީ ޕެޓްރޯލް ވިއްކުން ހުއްޓިފަ، ރެސްޓޯރެންޓްތަކުން ޖެހޭނީ ކޮފީ ގިރުން ހުއްޓިފައި” އާދަމް ޝަރީފް ވިދާޅުވި އެވެ.

ކުޅުދުއްފުށީގެ ހުރި ބޮޑެތި ވިޔަފާރި ހުއްޓާލައިގެން ނޫނީ ކުރަން މިއުޅޭ އިހްތިޖާޖް ކާމިޔާބު ނުވާނެ ކަމަށް ވިދާޅުވެ އާދަމް ޝަރީފް ވިދާޅުވީ މިހާރު މި ލިބޭ ރޭޓްގައި ޕެޓްރޯލް ލިބެން ޖެހޭނެކަމަށް ގަބޫލް ނުކުރައްވާ ކަމަށާއި ސަރުކާރުގެ މުވައްސަސާތަކާއި ޕޮލިސް އަދި އެމްއެންޑީއެފްއަށް ޕެޓްރޯލް ވިއްކަންޖެހޭނީ ރައްޔިތުންނަށް ލިބޭ ވަރަށް ވުރެ އަގުބޮޑުކޮށް ކަމަށެވެ.

އޭގެ އިތުރުން ކަރަންޓް ޔުނިޓެއްގެ އަގު ހއ،ހދ އަދި ށ ގައި 7.50 ގައި ހުރި އިރު މާލެގައި ޔުނިޓަކަށް ޖެހެނީ 3 ރުފިޔާ ކަމަށާއި އަދި އައްޑު އަތޮޅުގައި ޔުނިޓަކަށް ޖެހެނީ 4 ރުފިޔާ ކަމަށާއި މިއީ މި ސަރައްހަދުގައި ހިމެނޭ 3 އަތޮޅުން ހާއްސަކޮށް ކުޅުދުއްފުށީ ހިމެނޭ ސަރަހައްދުން ކަންބޮޑުވާން ޖެހޭކަމެއް ކަމަށްވެސް އާދަމް ޝަރީފް ވިދާޅުވި އެވެ.

އާދަމް ޝަރީފް އިތުރަށް ވިދާޅުވީ ސްޓެއާރިން ކޮމިޓީތެރޭގައި މަސައްކަތްކުރެއްވި އެތައްބަޔަކަށް ސަރުކާރުތެރޭންނާއި މާލެއިން އަދި އެކި ކަންކޮޅުތަކުން ތަފާތު ގޮތްގޮތަށް އިންޒާރުތަކެއްދީ ތަފާތުގޮތްތަށް ބިރު ދައްކާފައިވީ ނަމަވެސް މާދަމާގެ އިހްތިޖާޖަށް ނުކުންނާނީ ހައްޔަރު ކުރިއަށް މައްސަލައެއްނެތް ގޮތުގައި ކަމަށެވެ.

ހެދިގޮތެއް ހެދިގެން މިހެންތިބެންވެއްޖެނަމަ މި ކުޅުދުއްފުށި ދާނީ ފަހަތަކަށް ކަމަށާއި ކައިރީ ހުރި އެހެން ރަށްތައް ކުރިއަރައިގެން ގޮސް ކުޅުދުއްފުށީގައި މި ހުރި ރީޖަނަލް ހޮސްޕިޓަލް އަތުން ދޫވެގެން ދާކަށް އެއްވެސް ބޭފުޅަކު ބޭނުން ނުވާއިރު އެންމެ އެކީ އެކައްޗެއް ކިޔައިގެން މި ކަމަށް ހައްލެން ހޯދަންޖެހޭކަމަށް އާދަމް ޝަރީފް ވިދާޅުވި އެވެ.

އޭގެ އިތުރުން ސްޓެއަރިން ކޮމިޓީގެ މެމްބަރު ހުސެއިން އަލީ ވިދާޅުވީ މާދަމާގެ އިހްތިޖާޖުގައި ރައްޔިތުންނަށް ވިޔަފާރި ކުރާ ފިހާރަތައް ބަންދު ކުރެވެން ޖެހޭނެ ކަމަށާއި ސަރުކާރުން ވަކި ޖަވާބެއް ނުދެނީސް އަޅުގަނޑުމެން މިތިބީ މިގޮތަށް ކުރިއަށް ގެންދިއުމަށް ކަމަށް އޭނާ ވިދާލުވި އެވެ.

މާދަމާ ވިޔަފާރި ބަންދު ކުރުމަށް ކުޅުދުއްފުށީގެ ބޮޑެތި ވިޔަފާރި ތަކަކުން ވަނީ ނިންމާފަ އެވެ. އޭގެ ތެރެއިން އާޕޮއިންޓް، އާޕޮއިންޓް ހާރޑްވެއަރ ސަފާޔާ، ފެޝަންވޭ، ހެތުރު އަދި ފެހި ދޫލަ ހިމެނެއެވެ.